معتصم عبدالسلام ..حلاق العمدة

صابنها

محمد عبد الماجد

معتصم عبدالسلام ..حلاق العمدة

• بتذكر الحلاق (شلطح) وهو حلاق كان بتمرق منه وانت فاقد (اضان) هذا اذا كان حظك جيد ولم تفقدهما الاثنين.
• حلتنا كلها مطلعة (بدل فاقد) للاضان.
• (شلطح) كان فاتح ليه صالون حلاقة في الحلة …صوالين الحلاقة زمان لا فيها (مرايا) ولا فيها (ماكينات حلاقة).
• صوالين الحلاقة كان ما فيها غير (صبارة) موية باردة ومقص.
• الله يسألني الموية ذاتها ما بتكون باردة.
• لكن بتشربها على احساس انها (باردة).
• زمان أي حاجة كانت بالاحساس.
• والصالون زمان كان بتلقى فيه صورة ماردونا كبيرة وصورة طارق احمد آدم.
• شارة الكابتنية في ضراع طارق احمد آدم كانت (هيبة).
• زي شارة الكابتنية في ضراع نزار حامد هذه الايام.
• في واحد قال لي ما شاء الله نزار حامد الايامات دي أي مباراة بجيب فيها (قونين).
• قلت ليه ناس (الحرية والتغيير) لو صبرت عليهم ما بتجيكم عوجة.
• بس انتوا كيف بتصبروا؟
• ما شاءالله على نزار حامد.
• نرجع لموضوع (الحلاقة).
• تتطلعوا الزول من الموضوع زي مناسبة العرس الجنبها حدثت وفاة.
• عندنا زول في الحلة جنو غُلاط – يغالطك في (مرتبك).
• الزول دا مرة صبت مطرة – طنبجت البلد كلها – قال لينا دي ما مطرة؟
• قلنا ليه طيب دي شنو يا فالح؟
• قال لينا دا موكب 25 يناير.
• سكتنا ما قلنا ليه شيء.
• خفنا ندخل معاه في موضوع السياسة دا.
• نرجع للحلاقة.
• الحلاق (شلطح) كان وقت تمشي ليه عشان تحلق شعرك اذا كان مزحوم وما فاضي بقول ليك : والله أنا الليلة ما بقدر احلق ليك ما فاضي ..لكن (برقّد) ليك شعرك ساي.
• يرقد ليك الشعر وتتطلع منه في امان الله.
• بكرة في المدرسة (ابو الفصل) ما بنقش (الحنك) – تمر عادي فيه.
• هسع ناس لجنة الاستئنافات في قضية الهلال والمريخ مع رمضان عجب ومحمد الرشيد وبخيت خميس عملو نفس الشيء.
• ما حلقوا الشعر لكن رقدوه ساي.
• انتوا عارفين الحكاية دي زي شنو؟
• الحكاية دي زي عصير الليمون البجيبوه ليك قبل الغداء.
• يخليك ما تاكل أي شيء.
• خاصة اذا كان سكرو تقيل.
• الزول الغتيت يجيبوا ليك سكرو تقيل.
• وزي ما قال الاستاذ علم الدين هاشم ناس لجنة الاستئنافات ديل وقت الموضوع كدا – ولجنة شئون اللاعبين غير الهواة القضية لا تدخل ضمن اختصاصاتها (العطلة) دي كلها على شنو؟
• قاعدين شهر ونص عشان في النهاية تتطلعوا لينا بالقرار (العبقري) دي.
• رمضان باقى ليه 3 شهور.
• وانتوا قاعدين تجرجروا لينا كدا.
• مرة بتذكر عندنا زول كبير في السن ..كان بيشكي كتير.
• ما في حاجة في جسمو ما شكى منها.
• الزول دا اولاده قادرين …قالوا يودوه لاكبر دكتور في البلد.
• ودوه للدكتور – الدكتور اشتغل فيهم عربي وافرنجي.
• اعمل لينا صورة للرأس.
• اعمل لينا ترسيب للدم.
• ارسم لينا القلب.
• وكرويات الدم الحمراء.
• وصورة اشعة.
• وموجات صوتية.
• ومنظار.
• الدكتور ما خلي ليهم شيء.
• الاولاد نازلين وطالعين مع ابوهم من معمل لي معمل.
• شهر ونص وهم في الحالة دي.
• الاولاد مسكتهم (شفقة) من المعامل الكتيرة.
• بقوا (الاكل) دا ما قاعدين ياكلوه.
• في النهاية الدكتور طلّع (نضارتو) وقال ليهم ابوك دا عندو (ملاريا).
• رغم ان الاولاد فرحوا بهذه النتيجة وما صدقوا – إلّا ان ابوهم عاين للدكتور سمح وقال ليه : يا دكتور وقت الحكاية (ملاريا) ساي كان في داعي للتلتلة والصرف دا كله.
• والله نحن الملاريا ما بتعمل لينا الحبة.
• بتفوت فينا زي الهبوب.
• هسع ناس لجنة الاستئنافات عملوا نفس الشيء.
• اللجنة تجتمع.
• النصاب لم يكتمل.
• الرئيس غائب.
• نائب الرئيس يكلف للنظر في القضية.
• شهر ونص ونحن في الحتة دي.
• ننزل ونطلع.
• واخر حاجة قالوا لجنة شئون اللاعبين غير مختصة بالنظر في هذه القضية.
• يعني معتصم عبدالسلام قاعد ينظر ساي.
• ما خلي ليه شيء.
• زولكم طلع غير مختص.
• ولا عندو اختصاص.
• المريخاب اصلهم كدا.
• الواحد بتشوبر بدون اختصاص.
• الزول دا بقى قاعد في (الصدى) اكتر من مزمل ابوالقاسم.
• كل يوم عندو تصريح.
• بصرح في الجرايد اكتر من حمدوك.
• شكلو كدا عاوز يبقى رئيس اتحاد.
• المشكلة ان لجنة الاستئنافات والتى اكدت بطلان تلك القرارات وعدم اختصاص اللجنة التى اصدرت القرارات التى طعن فيها …الاتحاد اعاد ليها القضية تاني.
• نفس الحلاقة.
• تاني رجّعوا القضية لنفس اللجنة غير المختصة.
• عشان اللجنة تصدر نفس القرار المعاب.
• وعشان الهلال والمريخ تاني يطعنوا في القرار.
• ونقعد نحكي.
• ونقعد نقص.
• وعشان لجنة الاستئنافات تقعد ليها (6) شهور تاني عشان تفصل لينا في القضية.
• عليكم الله الموضوع دا ما زي موضوع (شلطح).
• لجنة شئون اللاعبين غير الهواة ما ح يحلقوا – ح يرقّدوا الشعر تاني.
• ومعتصم عبدالسلام – تنطبق عليه مواصفات الحلاق شلطح.
• حلاق العمدة.
• حلاق المريخ.
• زي ما عاوزين ناس المريخ بطلع ليهم القرار.
• امانة فيكم …معتصم عبدالسلام دا شوفوا ليه خانة في القطاع الرياضي بتاع المريخ مع ايمن عدار.
• انتوا قايلين ايمن عدار جاء للمريخ من وين؟
• من الاتحاد.
• من الفريق القومي.
• في الاتحاد العام قالوا ليك في زول اسمو معتز الشاعر وقت المريخ يجيب ليه قون بفرح اكتر من صلاح نمر.
• نوع ديل منتظرين منهم عدالة.
• المضحك ان الشاعر مقدم شكوى في الدكتور كمال شداد.
• دي مزمل ابوالقاسم ما عملها.
• معقولة بس.
• كمال شداد وقت كان بيظهر في التلفزيون …التلفزيون كان شغال بالاريل.
• وعالم الرياضة يوم الجمعة بيجي مرة واحدة في السنة.
• شداد دا لمن كان في اتحاد الكرة المريخ ذاتو ما كان اسمو المريخ.
• ما تخلونا نتكلم ساكت.
• غايتو الشاعر دا فعلا شاعر.
• المهم يا جماعة نحن القضية دي تنظر فيها لجنة الاستئنافات..ما عندنا مشكلة.
• لجنة شئون اللاعبين غير الهواة ما عندنا مشكلة.
• لجنة فض النزاعات.
• ما عندنا مشكلة.
• بالاجتماع المباشر.
• بالتمرير.
• برضو ما عندنا مشكلة.
• كل ديل ما عندنا فيهم (ثقة).
• ان شاءالله القضية تنظر لينا فيها لجنة مكافحة الملاريا.
• اصلو ما عندنا مشكلة.
• ولا شغالين بالموضوع دا.
• ادوني بس القرار وخلصوني.
• المحامي البرتغالي بدرو قالوا قاعد على جمر.
• منتظر القرار عشان يتحرك.
• بدرو لا بعرف الشاعر.
• ولا بعرف معتصم عبدالسلام.
• بتوقع كدا معتصم عبدالسلام يكتب ليه عمود في الايام القادمة في الصدى او في الاحمر الوهاج.
• اصلو ما بعيدة عليه.
• حلاق العمدة!!
• ……………
متاريس
• نزار حامد جاب ليه قونين في ناس قالوا ليه زوران ما بلعب جيسي.
• روفا شارك في المباراة – قالوا وين بوجبا.
• انتوا الناس ديل (النجيلة) القائمة في استاد الهلال عندهم فيها نص.
• والله انا ما عارفهم عاوزين شنو؟
• الايام القادمة ايام الغربال.
• احجزوا مقاعدكم من الآن.
• في حاجات حلوة كتيرة في الطريق.
• اصبروا بس.
• نسيت اكتب ليكم عن الكورونا.
• ناس المريخ لسه شابكين في (الاشانتي).
• انيمبا غلبهم ..وبتكلموا عن الاشانتي.
• فرحانين بالتأهل.
• بكرة نشوف موضوع الكورونا دا.
• والله ما بنخليه.
• نسكو لمن نصل معاه باب الحوش.
• ……..
• ترس اخير : عيد مقدم دا جاب لينا العيد قبل رمضان.