موسم السقوط

0
803

في السلك
بابكر سلك
* سقطت الامطار
* وسقطت الخرطوم بمجاريها ومحافظاتها ومحلياتها وكل هليمانتها الكاذبة وساريناتها وسيراتها التي تزف بها كل مسؤول عن هذا السقوط في حله وترحاله ولو ماشي فاتحه
* سقط الصرف
* وسقط سعر الصرف
* وسقط الصراف الآلي عند مطالبته بالصرف
* وبدون خجلة يسألك
* داير تشوف رصيدك كم ?
* تقول ليهو نعم
* يقول ليك رصيدك كذا لكن انا ماعندي قروش ليك
* الصراف الآلي بقي شغال معانا زي شغل كاس افريقيا مع الهلال
* تشوفي وماتشيلي
* وسقطت جوهرة الكاردينال
* برغم اني لما شفتها بعد اول مطرة افتكرت انو كردنه عمل استاد اولمبي
* يشتغل كرة قدم
* ويشتغل حوض سباحة اولمبي دولي
* ويشتغل مضمار لسباق الكلاب
* سيما وجميعنا شاهد الكلاب تجري علي ارضية ملعب الهلال يوم مباراة المصري ويوم مباراة الموزمبيقي
* اسي عليك الله يافطومة يا اختي
* الحته الدخلن بيها الكلاب ديل ما بتمرق الموية !!!!
* بحر
* من بحر دار لي بحر العرضة شمال
* غيروا الاسم
* من الجوهرة لي تايتنك
* نرجع لموسم السقوط
* سقطت الامطار
* وسقطت المدرسة علي رؤوس تلاميذها
* حتي النيل سقط
* وهو يبتلع فلذات اكبادنا ومعلمتهم بي مركبهم التي سقطت قبلهم
* ماتوا جميها
* فسقط شعار مقتل طالب مقتل امة
* سقطت الامطار
* وسقطت البيئة
* وسقطت الصحه
* وسقطت علينا جيوش الباعوض وارتال الضبان
* ولا زالت السارينات تجوب فينا برغم السقوط
* كأنها تقول
* خلفي احد اهم اسباب السقوط
* حتي نحن سقطنا
* سكتنا فسقطنا
* وسقط منتخبنا للصغار بسيكافا
* سقطت الامطار
* وسقطت المخابز في توفير الخبز
* وسقط الخبز في الحفاظ علي وزنه
* ونجح في رجيم افقده نصف وزنه بكل بشاعة
* ولازالت السارينات تجوب فينا
* ونحن صرنا نشتهي السخينة
* فسقطت السخينة فينا
* اثناء بحثنا عن دقيق الفينا
* انه موسم السقوط
* سقطت الامطار *وسقطت الحكومة في انتزاع الضحكة من حنايانا
* فلا زلنا نضحك
* نضحك من اعماقنا
* واذكر شعار جماعة الجو الرطب الفنية
* الضحكة من اعماقنا ثورة بتفجر الحزن الكتلنا
* وببارارا ببارار ببارارارا ررارا
* في موسم السقوط *سقطت الامطار
* وسقطت خطط الاقتصاد
* وسقطت
* شعارات علي شاكلة رفع المعاناه عن كاهل العباد
* وسقطت الامانة وانتشر الفساد
* سقطت الاخلاق
* ونضافة القليب لو سيدو قال مشتاق
* في هاش تاق
* ولازالت السارينات تجوب فينا
* ايها الناس ان تنصروا الله ينصركم
* اها
* نجي لي شمارات والي الخرتوم
* كان شفت يا والينا
* الضحية السنة دي
* بارك الله في رسولنا الكريم الضبح لينا
* وصلي الله عليك وسلم يا حبيب الله
سلك كهربا
ننساك كيف والكلب قال سقطت الامطار وسقط معها كل شئ ولازال جواكم هتاف
تسقط تسقط الامطار
والي لقاء
سلك

المشاركة

أكتب رد

أدخل تعليقك من فضلك!
أدخل إسمك هنا من فضلك