صحيفة كورة سودانية الإلكترونية

وأنت البضحكك شنو يا اللخو ؟

1٬245
بالعربي الكسيح
محمد الطيب الأمين
وأنت البضحكك شنو يا اللخو ؟
* أوضح وأجمل قصة حب في العصر السوداني الحديث هي بين (أبو عركي البخيت وزوجته الراحلة عفاف) .
* كثير من الفنانين يبعدون (حياتهم الخاصة) عن الجمهور والإعلام.
* غير أن عركي كان يقدم زوجته الراحلة (عفاف) ، يقدمها للناس بفخر وحب .
* ولذلك كل الشعب السوداني على علم بالمحبة الكبيرة التي تربط عركي بعفاف وهي محبة جعلته (يغني لها) ويُجاهر بأنه (غنى لها) .
* حب عنيف بينمها لدرجة أن (مرض) أحدهما يصيب الطرف الثاني بالمرض.
* ولا يخفى على أحد معاناة عركي الكبيرة بعد رحيل زوجته عليها الرحمة .
* تأثر عركي بشكل ظهر حتى في (جسمه وصوته وضعف رغبته في الغناء) .
* ولعل عركي قد أثبت ما قاله الشاعر العربي الكبير عروة بن حزام وهو ينشد : (وما عجبي موت المُحبين في الهوى ولكن بقاء العاشقين عجيب) .
* عركي (مات في الهوى) وهذا ليس غريباً ولكن الأغرب أن (تحيا وأنت مُحب) .
* وبما أن ذلك كذلك فأن بعض الذين يقولون أن الهلال لا يلعب بدون جمهوره لا ينقصون من قدر الهلال بل هم يعترفون بأن ما يربط الهلال بجمهوره هو أقوى من الذي يربط (عركي بعفاف) .
* الهلال (متعلق) بجمهوره والجمهور (متعلق) بالهلال .
* بينهما حب مستوفي الشروط .
* عندما عاد الدوري بعد كورونا كان الهلال (كعب جداً) .
* المريخاب قالوا الهلال ما بلعب بدون جمهور .
* قالوا كده وفاكرين إنو كلامهم ده بينقص من قدر الهلال .
* يجيك مريخابي ما عارف المطرة صابة وين ويقول ليك : (الهلال ما بلعب بدون جمهوره ويضحك كمان) .
* البضحكك شنو اللخو؟
* يقول ليك الهلال ما بلعب بدون جمهور .
* أي الهلال ما بلعب بدون جمهوره  .
* وين المشكلة ؟
* ده شرف للهلال وجمهوره .
* أنت كده أثبت أن جمهور الهلال صاحب تأثير على نتائج الفريق .
* وده شهادة في حق جماهير الهلال.
* كونو الهلال بيمرض لما يلعب بدون جمهوره دي حاجة تبرز الارتباط العظيم بين الهلال وجمهوره.
* ده حب بيظهر في (النتائج) يا مولانا .
* أنت جمهورك كيف ؟
* مؤثر ؟
* جاوبني؟
* جمهورك كيف ؟
* أنت ما بتلعب بدون (حُكام) .
* وتعال أناقشك.
* أنت كورتك تاميها (تحكيم) .
* اخير الهلال (كورتو تاميها جمهور) لكن أنت كورتك تاميها تحكيم و(تلفون جلكسي) .
* ولا نسيت التلفون الجلكسي ومركوب النمر ؟
* نسيت لما الحكم  الزامبي (حمادة) جا أدار ليك مباراة افريقية ورجع زامبيا وهو مُحمل بالهدايا من شاكلة (لاب توب ومركوب نمر وتلفون جلكسي) ؟
* نسيتوا ولا فاكرين القصة دي ؟
* نعم الهلال ما بلعب بدون (جمهورو) ولكن المريخ لا يلعب بدون (تحكيمو) .
* المهم .
* عرض كورونا متواصل وبالتالي غياب الجمهور عن المدرجات ايضاً متواصل .
* والهلال إذا كان هو يتنفس برئة الجمهور فمؤكد أنهم يعلمون أن لا شئ يسعد الجمهور خلاف الانتصارات.
* والسنة دي طموحاتنا عالية .
* نحسم التأهل للدور القادم من يوغندا.
* نضربهم هناك .
* اصلاً مع كورونا دي مباراة الأرض ومباراة خارج الأرض بقت حاجة واحدة .
* تغلب هناك وتغلب هنا .
* ثقتنا كبيرة في نجوم الهلال ولن نرضى إلا بالفوز ذهاباً واياباً .
* نرجو من الأخ وليد الشعلة أن يساعد الكنغولي فيني في خط المقدمة الهجومية .
* خليك صاحي يا وليد .
* نصل دور ال(٣٢) وبعد داك الغربال ما بقصر .
* وصلوا الهلال دور ال(٣٢) وخلوا الباقي للغربال .
* الغربال بِقدها قدام والأخ غير الشقيق أبو عشرين الشهير ب(لون الدم) بسدها ورا .
* حارسنا مُلقب ب(لون الدم) ومهاجمنا مُلقب ب(لو رجعت السودان ما بلعب إلا للمريخ) .
* هاك البطيخ ده .
* وبمناسبة البطيخ .
* طولت مع حكيت قصة المريخ لما سافر الكنغو لمواجهة مازيمبي .
* القصة دي قاعدة (تعدل مزاجي) .
* إن شاء الله نحكيها بكرة أو بعد بكرة.
* وتبكو بس .. عين قطرة وعين مس .
* ونركب صافنات ونجيبة (عركية) واصلو الزول بيموت والذكرى تفضل حية .
* و..و..
* وبخاف اسأل عليك الناس وسر  …….. (الزامبي حمادة انكشف) .
قد يعجبك أيضا
5 تعليقات
  1. علي الطاهر يقول

    عفارم عفارم

  2. بشير المقدم يقول

    الله ما عندك موضوع ي ابو صفر

  3. خالد محمد أحمد يقول

    هههههاي بنضحك ونموت من الضحك كمان ما عاد فيها إلا الهلالاب يتكلمو عن الجمهور والتحكيم و(تعال أناقشك ):-
    1- جمهور الهلال (المريخاب الزعلانين وده اسمكم الحقيقي ) تأثيرهم ليس على اللاعبين انما إرهاب للحكام وتكسير كراسي وبمبان ووواي واااي ما دايرين وكدا … وما عندهم أي مساهمات للنادي وارتباطهم ليس مع اللاعبين انما مع الكراسي والحجارة
    2- بالنسبة للتجكيم بلاش اشاعات في أبوكم الشرعي المريخ يا بتاعين الحكام الهجين وما أدراك ما الهجين حيرتو الاتحاد الافريقي ذاتو لما بقى يجيب ليكم من كل بلد حكم فضحتونا مع الافارقة
    3- وأخيرا الحمد لله بقى عندكم المريخاب المحترفين أيوة المحترفين ذيهم وذي ناس أوتارا (أبو عشرين والغربال) بعد التخرج من الجامعة يدرسوكم الكورة وتلقو ليكم ناس تتكلمو وتتغزلو فيهم بدل ناس بشة ومؤمن واسكندر وسليم ودراج وسموؤل وبوي والضي ويونس وكابو ومش عارف مين

  4. Hajjam يقول

    ياابو صلاح (مسعول) من الخير عمود الدراب بتاع ابو المستعار المندلاوي اختفي وين. ؟ لي مدة ما شفتو. !!!! ترك عمود الدراب وبقي لافي ورا كتاب الهلال زي الدربكين واتفرغ للردم لكن الدراب ظاهر في تعليقاتو مهما تغيرت الاسماء وتعددت الاستعارات 😹😹😹

  5. جلابي الدوحه يقول

    درجة الحراره باستراليا وصلت 19 درجه تحت الصفر ..وهو امر لا يريح الاسترالين لانهم بذلك تساو مع الهلال القابع تحت الصفر ..ختي استراليا ترفض التشبيه بالهلال
    اعود لمحمد صاحبي ياخ والله بنبسط بمقاللتك شديد انت زول واعي وصحفي ما ميؤس منه زي اخرين بالعكس بجي منك يعني باذن الله شوية عشرات من السنين ممكن تكون وصلت للشهره المنشوده ..لكنك زولي والله بتضحك وتضحك معاك الناس .ضحكت للحكم الشال جلاكسي ومركوب ده رخيص خلاص يعني لو قبضوه يكون ضيع مستقبله وسمعته عشان مركوب لانه الجلاكسي ما بشتغل عندهم هناك..مركوب يا ابو حميد كان تزيدها كوز حبه وتقول جزمه وشراب ياخ ضحكتني ..
    المشكله فريقك بالجمهور وبدون جمهور كل يوم يزيد درجه تحت الصفر والحكام والتحاد وشطه والرير والكاردينال والسوباط بكل جبال الاموال واللعب في الاوراق والحكام مازال يقبع صفر ورا صفر بالفعل مختاجين رمضان ولرشيد يغيرو ليكم الحظ حبه بركة يعني اما ابو عشرين ما بغير شي لانه جمال جاكم بقي صفايه وابوعشرين الله يرحمه مع المرمي الهلالي
    رايك شنو يا ابو حميد مقالتك الجايه تكون عن العدس فهو مفيد اكتر من هلالك
    الطلبه تطورو بقو يقرو بالرادي والتلفزيون ..وانتو الهلالاب لسه جارين ورا السراب وكورة الشراب
    الي المقاله القادمه
    عشاق محمد الامين من المريخاب

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد