والله يا رمضان اقوانك في الوادي فرحتنا اكتر من اقوان اطهر في النمور
صابنها
محمد عبدالماجد
والله يا رمضان اقوانك في الوادي فرحتنا اكتر من اقوان اطهر في النمور
· قالوا لي الهلال ح يسجل (…).
· و(…).
· و(…).
· و(…).
· و(…).
· زادوا اتنين من حوش الخليفة!!
· قلت ليهم نقط نقط الاولى عرفتو…يوم الثلاثاء جايب ليه (هدفين) في حي الوادي مفروض مصعب الصاوي يوم الجمعة القادمة يجيبهم لينا في برنامج (اغنيات من البرامج).
· والله يا رمضان عجب فرحت لي اقوانك في حي الوادي اكتر من فرحتي لأهداف اطهر الطاهر في الاهلي شندي.
· برضو الغربال الجديد ليه شدة.
· ونقط ونقط التاني عرفتو….(ما ح اقول ليكم بيلعب ارتكاز …لو كسرتو رقبتكم).
· في زول هسع جاب سيرة (محمد الرشيد).
· مالكم انتوا؟
· الحاصل عليكم شنو؟
· محمد الرشيد منو؟
· ونقط نقط الثالث عرفتو….حارس مرمى اسمو بقع بين واحد وعشرين واتنين وعشرين.
· اوعكم تفهمونا غلط وتقولوا ابوعشرين…(هسع في زول جاب سيرة ابوعشرين).
· ابوعشرين منو؟
· ونقط ونقط الرابع عرفتو…لكن ما بقول ليكم اسمو…(ما بقدر اقول ما بقدر اصرح).
· لكن نقط ونقط الخامس دا منو؟
· دا كمان جبتوه من وين يا ناس الهلال؟
· والله انتوا يا ناس الهلال بي حركاتكم دي بتكتلوا ليكم (مريخابي).
· قلوب المريخاب الايامات دي شغالة بالهبابة.
· زي نار الحطب!!
· قالوا لي نقط نقط الخامس دا ما ظاهر – دا (سوداكال).
· السوداكال مفكوك.
· ناس الاتحاد قالوا سوداكال (مفكوك) مع ناس رمضان عجب.
· السوباط عاوز يجيب أي لاعب في المريخ.
· قال ليهم أي لاعب مفكوك جيبوه لي.
· ان شاءالله نعمل ليه اعارة لجزيرة الفيل.
· اصلو ما في مشكلة.
· ناس غرفة تسجيلات الهلال – خموا من طرف.
· لقوا سوداكال قدامهم – رفعوه معاهم.
· ناس غرفة تسجيلات الهلال رمضان عجب من سوداكال ما بفرزوا.
· الرئيس واللاعب عندهم واحد.
· بشيلوا من طرف.
· زي (السيل).
· السيل كمان بتفاهم.
· في سيل يوم دقّ ليه (باب)!!
· يعني السيل وقت يشيل ليه بيت ما بفرز غرفة من غرفة.
· بشيل ساي.
· مرة جانا (سيل)…الباسطة في التلاجة دخل شالها.
· ما في سيل بشيل ليه (بيت)..وبخلي ليه (غرفة) عشان (مطرفة) او عشان فيها (مكيفات).
· السيل ما برحم.
· تسجيلات الهلال السنة دي بعنوان (السيل).
· ح نشيل من طرف.
· والله يا مزمل السنة دي انت لو مفكوك …بنجيبك (الجوهرة).
· ان شاءلله تمسك لينا العلاج الطبيعي.
· ناس المريخ فكوا رمضان عجب.
· وفكوا محمد الرشيد.
· وفكوا ابوعشرين.
· وفكوا السماني الصاوي.
· وفكوا ضياءالدين.
· وفكوا التاج يعقوب.
· وفكوا منجد النيل.
· وفكوا (سوداكال) ذاتو.
· اسمعوها مني السنة دي موسم (الفكاك) من المريخ.
· موسم الهجرة الى الهلال.
· رمضان عجب قال ليهم عاوز ألعب في المجموعات.
· الولد مسكين …من اتسجل في المريخ بطلع من (التمهيدي).
· التش قال ليهم يا فكوني امشي الهلال يا اكسروا لي (ترقوتي)…أنا تاني ما بلعب ليكم.
· انا فترت من ناس صلاح نمر.
· الناس ديل قنعوا من المريخ.
· شغالين في المريخ بتحويل الرصيد.
· الطريف في الامر ناس المريخ امام حي الوادي نيالا ريحوا صلاح نمر لمباراة القمة.
· صلاح نمر نفسو مقطوع من مباراة القمة الماضية.
· مرة وليد الشعلة دا عمل ليه عميلة في صلاح نمر – لغاية الآن صلاح نمر تلفونو مقفول.
· قاطع شحن.
· نمشي على مباراة الهلال الاخيرة امام الاهلي شندي.
· ما عاوزين نقول بصمة فوزي المرضي (الفنية) ظهرت.
· لكن عاوزين نقول بصمة فوزي المرضي (النفسية) في المباراة ظهرت.
· العامل النفسي مهم.
· عليك الله يا الفاتح النقر …لاعب زي نزار حامد دا بختوه في الكنبة وبدخلوه في اخر 10 دقائق.
· الهلال عندما لعب مباراة ودية امام الشرطة قدم نزار حامد مستوى فوق التخيل.
· نزار حامد قدم نفسه وسجل في تلك المباراة هدفين.
· لكن مع ذلك الفاتح النقر كان لا يشرك نزار حامد.
· نزار حامد امام الاهلي شندي اثبت انه لاعب (فلتة).
· لاعب كبير.
· نحن كنا في حاجة للاعب في مثل هذا المستوى عشان نغلب المريخ.
· الفاتح النقر كان بيشرك مؤمن عصام وبخلي نزار حامد برة.
· تفاصيل مباراة الهلال امام الاهلي شندي بتأكد ان الهلال سوف يفوز بالممتاز ان شاءالله.
· الاهلي شندي اضاع ضربة جزاء قبل ان يسجل الهلال.
· اضاعة هذه الضربة – دليل بطولة ان شاءالله.
· يمكن الاقدر قصدت كدا.
· قصدت ان نمر بهذه المعاناة.
· وتلك التلتلة….التى حرقنا فيها اعصابنا.
· عشان فرحتنا تكون بالممتاز كبيرة.
· نحن قاصدين كدا.
· قاصدين نستفز المريخ.
· عشان يعشموا.
· ويقعدوا يتفاصحوا.
· ونجي يوم السبت نفوز عليهم ان شاءالله ونشيل كاس الممتاز.
· السنة دي النقول ليكم.
· السنة دي ما في (كاس).
· يعني حكاية (الجرسة) قدام بوابة الاتحاد ما بتفعكم.
· حكاية لململة القروش عشان تمشوا المحكمة الرياضية ما بتحلكم.
· اقول ليكم بالواضح كدا.
· انتوا شيلتوا (كاس) الممتاز بصورة ما كويسة.
· شلتوا البطولة من الهلال عن طريق (كاس).
· السنة دي نحن في يوم واحد ان شاءالله ح نشيل كاس الممتاز.
· ونشيل رمضان عجب.
· ونشيل محمد الرشيد.
· ونشيل ابوعشرين.
· ونشيل السماني الصاوي.
· ونشيل (سوداكال) برة من المريخ.
· السنة دي ح تفهموا حاجة.
· يوم السبت الهلال يلعب امام المريخ مباراة صعبة.
· لا بد من القول ان المريخ يمر في هذه الايام بافضل حالاتها.
· المريخ (فنيا) افضل من الهلال.
· لكن الهلال الافضل (اداريا).
· ما يصعب مباراة القمة ان الهلال يلعب بفرصة واحدة.
· لو الهلال (جاهز) بشكل تام – كان قلنا الفرصة الواحدة ما مشكلة.
· من هنا بتأتي صعوبة المباراة.
· الهلال يلعب بفرصة واحدة امام فريق اكثر منه جاهزية.
· نطمع ان تفعّل الكرة بند (الاستثناءات).
· نسأل الله ان يكون (التوفيق) مع الهلال.
· ونسأل الله ان يكون الهلال يوم السبت يوم الهلال.
· الهلال في ظل المؤامرات التى تعرض لها ان شاءالله يكون عنده الدافع الاكبر لتحقيق لقب الممتاز.
· سوف نعيد اللقب (ميدانيا).
· وكمان بنشيله من (الميدان) بفرصة واحدة.
· في قوة عين اكتر من كدا.
· في فراسة اكتر من دي.
· ادعموا الهلال.
· وفعلوا كل الصفحات.
· خلوا الدنيا لونها (ازرق).
· فلتكن ثقتكم في الهلال كبيرة.
· النصر سوف يكون للفريق الاكثر ثقة وأكثر رغبة في تحقيق الانتصار.
· السبت (ازرق) ان شاءالله.
· والممتاز هلالي مع ناس رمضان والرشيد وابوعشرين.
· ……………
متاريس
· احسن حاجة أي لاعب عاوز يسجلو الهلال يلمو عليه.
· ما تقولوا لينا الموضوع انتهى والشغل بقى بالسيستم.
· لموا اولادكم عليكم.
· أي حاجة مرتبة بشكل دقيق.
· مدرب الهلال الصربي واضح عليه زول (مفتح) و (صبوح) وعندو رغبة يعمل شيء.
· احسن حاجة ان الجهاز الفني كله (اجانب).
· وجود عبدالمهيمن الامين في دائرة الكرة يغني عن وجود أي سوداني اخر في الجهاز الفني.
· وان كنا نتمنى استمرار عمار مرق في الجهاز الفني عشان يكتسب خبرات اضافية.
· رفع الكشف الى (30) لاعب سوف تفيد الهلال كثيرا.
· من الآن يا الطاهر يونس ما ترسلوا في الكشف الافريقي اكثر من 23 لاعبا او 24 لاعبا كحد اقصى.
· خلوا 6 خانات فاضية للاضافة في الفترة الثانية.
· اعطوا نجوم الهلال الفرصة عشان يظهروا ويثبتوا من ثم اضيفوهم للكشف الافريقي.
· الكاردينال كان برسل 27 لاعب عشان ما يكون عندو فرصة اكتر من 3 لاعبين.
· الكاردينال ما كان زول تسجيلات.
· اسعدنا ظهور الشيخ محمد في كنبة الهلال في مباراة الفريق الاخير.
· الشيخ ممكن يعمل الكثير لو لقى ليه 20 ساعة بس امام المريخ.
· ناس صلاح نمر (المهارات) بتجيب خبرهم.
· عبدالرؤوف ان شاءالله يوم السبت سوف يفعلها.
· ……….
· ترس اخير : سوداكال اتعود بقى لو في زول هبشو ساكت بيمشي (الفيفا).
والله يا ود عبد الماجد ما باقي ليك تدخل الملعب وتركل الكورة داخل شبكة ابوعشرين او منجد و تاخد السفارة من الحكم وتنهي المباراة عشان ناس المريخ ما يعادلوا وبعدها تمسك محمد الرصيد وعجب والصاوي وابواربعة وأربعين وتجيب المأذون عفوا موثق العقود في حضرة ممثل الاتحاد الازرق …والله دا هلع وخوف وبعدين اذا الهلال بهذا الزخم والنجوم والقوة الضاربه لماذا تبكوا على لعيبة فريق ضعيف حسب سخريتكم…طبعا حلمك تسجل ٩٠% من لعيبة المريخ وبعدا كلو الهلال لن يصمد أمام الزعيم والبمبان في انتظاركم… ونقط نقط نقط بعد يوم السبت بتتقلب نقط نقط نقط تانية وتذكر كلامي هذا كويس والليالي حبالى يلدن كل عجيبة …تحياتي واحترامي سيدى والصبة تصدعت لأن المعلم لم يتقن ريها بالماء الكافي .
ابو عبد الماجد حفظك الله ورعاك وبارك.فيك وفي قلمك الرائع يا زول يا راقي بس بطريقتك دي السيل حيشيل استاد الجماعه زاتو هههههه
خلي فصاحتك دي واكتب يوم الأحد
أستاذ محمد عبد الماجد ده كتاباته بترفع الضغط والسكري لأبو المستعار المندلاوي وتخليهو يفلت في الكلام، ولو عندو طريقة كان شال ليهو مسدس ومشي أداهو طلقة😂😂😂
لكن هو يلقاها من وين، من نشفان سوداكال القاعد ليهم في قلبهم ولا قروش السوباط الكشكر بيها وخلي الحفرة كلها عاوزة تجي الجوهرة !!
أديهو يا أبو عبد الماجد وما ترفع منه الأبنص !!
طالما الرجفة والجعريبة والسكليبة وحياكة المؤامرات ظهرت عند المرخرخين، معناتها بشائر النظر بعون الله ظهرت، وإن شاء الله تعالي نصر مؤزر للهلال علي كل الطبالين والسماسرة آكلي مال الشعب بمسمارين حلوين يتم بعدها نقل عدد هائل من الجماعة لحوادث مستشفي الخرطوم !!
محمد عبد الماجد يتغزل في لاعبي المريخ و معجب بهم بشكل مبهر ، تحياتي لك لأنك عرفت قدر لاعبي المريخ العظيم ، أحلامك وردية جدا لكن لا تنسى أن المريخ رجال يسدوا عين الشمس يا عزيزي ، حقو تخاف على أطهر شكلو حا يدخل غرفة المريخ ليلة السبت ، لكن يوم الأحد أرجو أن لا تحتجب فالصدمة قادمة لك و لرمضان أحمد السيد و بقية الجماعة و برضو إتذكر رمضان بمبان موجود
الله يهديك يا ود عبد الماجد عمودك ده حرك الساكن في المريخ وقلنا مرارا وتكرارا انت ورمضان اتركوا امر التسجيلات يمر في سرية لكن ما عاوزين تسمعوا الكلام خلو اللجنة تشتغل بسرية ما عاوزين تسمعوا الكلام انتم بالطريقة ده طابور خامس وتضعوا امام لجنة التسجيلات متاريس يصعب حلها الله يهديكم انت والاخ / رمضان