وليد الشعلة بقى لينا زي (ود الطهور) !!

بالعربي الكسيح

محمد الطيب الأمين

وليد الشعلة بقى لينا زي (ود الطهور) !!

* قدر ما حاولت أفهم لشنو الفاتح النقر أتعامل مع مباراة التبلدي بالطريقة دي غلبني .
* حاولت أفهم ما فهمت .
* قلت ألقى ليهو عذر ما لقيت .
* قلت أرمي اللوم على النجيلة لقيت النجيلة ما ليها دخل مباشر .
* رميت اللوم على الشمس لقيت إنو هلال التبلدي ما لعب في الضل .
* لعب معانا في نفس الشمس .
* صراحة مروا علينا مدربين أشكال وألوان.
* مر علينا مدرب جيد .
* ومر علينا مدرب ما بطال .
* ومر علينا مدرب بطال .
* ومر علينا مدرب (نص كم) .
* لكن زي النقر ده ما مر علينا .
* لو في مدرب (نص كم) يبقى النقر ده بدون (أكمام).
* مدرب (اديني حقنة) .
* سبحان الله النقر ده زمان ما كان كده .
* والله ما كان كده .
* ما عارف الحصل عليهو شنو فجأة كده ؟
* ده ما النقر الزمان .
* أشرك النقر كل نجوم المنتخب الوطني العائدين من رحلة إرهاق قبل (٤٨) ساعة من زمن اللقاء .
* اشركهم .. قلنا ما مشكلة خائف من المباراة.
* في حين إنو هلال الأبيض أبعد لاعبه الوحيد الذي كان ضمن بعثة المنتخب .
* وضاح كان مع المنتخب وتم إبعاده حتى لا يخصم إرهاقه من تركيزه .
* النقر أشرك أطهر الطاهر وبشة وأبو عاقلة والشغيل وفارس .
* وجميعهم ظهر عليه الإرهاق وضعف التركيز .
* في حين إنو كان ممكن يلعب حليبي (المرتاح) بدلا عن أطهر ويلعب بوي بدلا عن فارس ونزار بدلا عن بشة .
* النقر بخلاف أنه مدرب (خواف وتقليدي) هو لا يجيد (قراية الملعب) وفكره دائما محدود.
* أشرك ابوعاقلة في خط الدفاع و(كتل الوسط) مع إنو ابوعاقلة في الوسط المتقدم بيعمل شغل غير عادي .
* تأخر الهلال بهدف وما زال النقر مصرا على خطته وتنظيمه.
* ولا فكر يستفيد من نزعة أبو عاقلة الهجومية من أجل أدراك التعادل.
* قعد يتفرج زينا .
* وهو الذي بيده تقديم أبو عاقلة وإرجاع مؤمن عصام .
* قدم ابوعاقلة في الدقيقة (٨٠) بعد دخول بوي .
* واصل النقر مجاملته غير المبررة لوليد الشعلة المتواضع جدا .
* وليد بقى زي (ود الطهور) .
* لا قادر يجري لا قادر يجيب قون ولا حتى قادر يلعب باص صاح .
* واللوم هنا لا يقع على الشعلة بل اللوم كله نرميه على النقر .
* البيعمل فيهو الشعلة ده المفروض الكورة في التلفزيون ما يحضرها.
* الشعلة بيهظر.
* حقيقة المباراة أكدت إن هجوم الهلال هزيل جدا ولا يعتمد عليه .
* هجوم طاشي شبكة .
* عذرنا الهلال في كل المباريات السابقة لقناعتنا بأن إعداد الأزرق هو الأسوأ بين جميع فرق الدوري .
* عذرناهم ولكن حتى الأمس لعب الهلال خمس مباريات وهي كافية لادخاله الفورمة .
* ولكن .
* مستوى متواضع جدا وغياب تام للعمل التدريبي .
* ما عارف النقر قاعد يدرب اللاعبين على شنو ؟
* حاجة غريبة .
* الهلال الأبيض دخل الملعب من أجل كسب النقاط الثلاث وبالعدم نقطة واحدة .
* وقد نجح في ذلك لأن مدربه (عارف نفسو داير شنو) .
* ومدربنا ما عارف المطرة صابة على وين .
* طالبنا بأن يواصل النقر حتى نهاية الموسم ولكن الظاهر أن الرجل غير جدير بهذه المهمة .
* هلال بدون شكل وبدون مضمون .
* لا رائحة ولا لون .
* لا يعقل أن يكون النقر بكل هذه الخبرة ومع ذلك يفشل في إثبات وجوده .
* تشوف الهلال ما بتحس إنو عندو مدرب .
* بجيك إحساس إنو الفريق ما عندو مدرب .
* لا نقر ولا كندورة ولا مرق .
* تواضع في القدرات وافلاس يحير .
* أيضا لا يمكن أن نعفي اللاعبين وبالذات (ود الطهور) .
* وبعد ده يجي يقول ليك (جاني عرض من شبيبة القبائل الجزائري) .
* جزائري ب(الحاء) .
* والله يا وليد بمستواك ده مشجع في الجزائر ما يقبلوك.
* وليد الشعلة فشل في إحضار عرضه الجزائري .
* الهلال وافق على احترافه ولكن الحقيقة ما في نادي طلب وليد اصلا .
* كلو كلام وكلاء لاعبين وحركات ساي .
* نتمنى إنو وليد يرجع يقعد في الكنبة فيما تبقى من مباريات.
* ثم ياريت أي لاعب مرهق يعتذر للمدرب عن المشاركة.
* طالما النقر لا بحس ولا بعرف يبقى أي لاعب مرهق ولا تعبان يعتذر لانو الدوري في اللفة الأخيرة جدا .
* عموما .. سينتهي الدوري بخيره وشره وننتظر بعد ذلك هلال السوباط.
* و..و..
* والله في .