الجُثة منسية والتفاحة مُشوية !!
قزاز ورذاذ
محمد الطيب الأمين
الجُثة منسية والتفاحة مُشوية !!
* (90%) من أبناء الشعب السوداني يشربون (العصير) في حالتين أتنين : (في شهر رمضان وفي الكافتريا لما تكون خالط حبيبتك) ..
* والزول الما عندو (حبيبة وما بيخلط) يبقي مكتوب عليه يشرب عصير من رمضان لرمضان ..
* عشان كده إحنا شعب (عينو واقعة وأمراضو كتيرة) ..
* وغايتو جنس غايتو ..
* إصرار الأخت عزة أبو داؤد على الغناء وهي (عديمة الموهبة) يخصم حتى من رصيد والدها (الموهوب جدا جدا) الله يرحمو ..
* عزة أبو داؤد صوتها ينفع للونسة فقط وليس الغناء ..
* ولذلك على عزة أن تقتنع بأن (إبن الوز لا يكون عوام في كل الأحوال) ..
* حاجة تكسف ..
* (سالت مشاعر الناس جداول) وهم يشاهدون (جثة وسط اللمة منسية) ومجدوعة داخل مستشفى بحري ..
* الجثة التى سرقت فرحة العيد (المسروقة أصلا) إنما هي (نموذج وعينة) لجثث كثيرة لم يكتب لها حتي شرف (الموت في بحري) ..
* كثير من أهل بلادي أصبحوا يفضلون (الصبر على المرض والموت في البيوت) بدلاً عن (الصبر على إستهتار أطباء الغفلة والموت في عنابر المستشفيات المُعفنة) ..
* والله العظيم الواحد فينا بقي لما يمرض يخاف ..
* لا نخاف من المرض ولكن نخاف من (الدكاترة) و(قروش الدكاترة) و(بلادة بعض الدكاترة) ..
* بلغنا مرحلة أصبح فيها العلاج يحتاج لـ(تمويل أصغر) ..
* عشان تتعالج وتبقي طيب إلا تقدم لتمويل أصغر من البنك (ده طبعا إذا لقيت في البنك قروش) ..
* تمويل أصغر أو تشيل سلفية أو تبيع أثاث البيت عشان تتعالج ..
* وليس العلاج وحده الذي يحتاج لتمويل أصغر ، فالزواج يحتاج لتمويل أكبر ، الحب يحتاج لتمويل أصغر ، السماية تحتاج لتمويل أصغر ، السفر الداخلي بالطيران يحتاج لتمويل أصغر ، حلاقة الشعر والدقن والقطعية تحتاج لتمويل أصغر ، ملابس الأطفال تحتاج لتمويل أصغر ، كيس فيهو لحمة وطماطم يحتاج لتمويل أصغر ..
* نسأل الله السلامة والتخفيف في المرض والتيسير في الحال والأحوال ..
* وجع يا مولانا وجع ..
* قالها الراحل أبو العزائم : (سمح الغنا في خشمو محمود) ..
* محمود عبد العزيز عليه الرحمة كان يغني أغنيات الآخرين بنفس الروعة والأريحية ويضيف لها كثير من الجماليات..
* بل أن الحوت غنى بعض الأغنيات بطريقة أجمل وأفضل حتى من الطريقة التى غنى بها أصحاب الأغنيات أغنياتهم ..
* وبالمقابل نجد أن شكرالله عز الدين (يُبشتن) أغنيات الآخرين بطريقة فيها كثير من الأستفزاز والتواضع ..
* ولذلك يحق لنا أن نقول : (شين الغنا في خشم شكرالله) ..
* شكرالله ربما يكون جيدا إذا إكتفى بترديد أغنياته الخاصة (على الأقل لما تغني غناك بيستر عيوبك الفنية) ..
* غنى غناك وبس يا شكرالله عشان إحنا ما ناقصين ..
* المهم ..
* إحنا وأولاد حلتنا دائما نحكي لبعضنا البعض أحلامنا في (ليلة أمس) ..
* كل زول بيجي يحكي أمبارح حلم بي شنو ..
* أذكر قبل فترة إحنا تلاتة حلمنا بأننا أكلنا (تفاح) ..
* إتخيل عليك الله .. إتشاركنا (التفاحة) في الحلم ..
* وإذا كان (الفقرا إتقاسمو النبقة على أرض الواقع) فنحن (إتقاسمنا التفاحة على أرض الحلم) ..
* وغايتو جنس غايتو ..
* من جميلات أغنيات الرائع جعفر السقيد أغنية (البت تقول أصبر) ..
* (البت تقول أصبر) هي أغنية بمواصفات (حادث الحركة) ولعلها لا تقل (وجع) من أغنية (حبي ليك كان زادي) ..
* يصدح السقيد بصوته السعيد :
البت تقول أصبر
والأم تقول أصبر
وأبوها قال نصبر
جاها الغريب وعقد
ما قالوا ليهو أصبر
علمتها وربيت إن شاء الله حسنة وأجر
*والله يا جعفر السقيد ياخ (إن شاء الله حسنة وأجر) ..
* أسوأ (نغمة) يمكن أن تسمعها وأنت خارج المنزل هي (نغمة تنبيه البطارية ضعفية) ..
* لما يظهر ليك في التلفون (البطارية ضعيفة) بتحس كأنو (حبيبتك عرسوها) ..
* نحن أكتر شعب بيراقب (نسبة) الشحن في بطارية تلفونو ..
* نشيل ونعاين اليوم كلو ..
* وشوف العين ما بشحن البطارية ..
* قصة وآخرها لسه ..
* أغرب حاجة .. المذيعة أياها بتقول : مرحب بيكم في برنامج (السباح) وهي تقصد (الصباح) طبعا ، وأيضا بتقول : نحي أهلنا في بورتسودان بلد (الصياحة) وهي تقصد (السياحة) طبعا ..
* اللغة العربية في الإنعاش ..
* أول مرة في حياتي أشوف لي مذيعة بتغلط في (الضحك) ..
* مذيعة إبتسامتها (متر ونص) ..
* إبتسامة أعرض من (شُباك المطبخ) ..
* عموما .. التحية لكل ولد ما قاعد يلبس ملابس أختو والتحية لكل بت ما قاعدة تشرب سجائر ..
* ونركب صافنات ونجيبة (هوارية) وأصلو الزول بيموت والذكرى تفضل حية ..
* يا أستاذة : أنا ما في حاجة واجعني إلا (لُقمتك الكبيرة دي) ..
* والله صحي ..
* و..و..
* ومزروعة في جواي وأنا …(زدت وبقيت سمين) ..
تطبيق كورة سودانية لتصفح أسرع وأسهل
لزوارنا حمل من السودان متجر موبايل1
http://www.1mobile.com/net.koorasudan.app-2451076.html
2,456حملو التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9
على متجر apkname
https://apkname.com/ar/net.koorasudan.app
