صحيفة كورة سودانية الإلكترونية

  (الغربلة) لن تنسينا (المهزلة) !

1٬444

*العتب مرفوع*

 

 

هيثم كابو

 

 

(الغربلة) لن تنسينا (المهزلة) !

 

 

 

* ما حدث للوصايفة بإستاد الخرطوم مساء السبت الماضي كان إذلالاً مكتمل الأركان، ومهزلة لا تليق بنادي يطمح أن يكون نداً تقليدياً للزعيم، و(إذا كانت فرفرة التسجيلات يمكن أن تخفف على أهل “المدعوم” الحسرة بعد الصورة الباهتة التي ظهر بها فريقهم، فإننا سنهديهم التش، ونمر، وبيبو، ونعيد لهم العقرب، ونزيدو كمان بميدو)..!

* مسخرة السبت ستظل محفورة في الأذهان، و(لن ننسى ولن نغفر)..!

* إذا منحناهم جميع لاعبي الزعيم بدون استثناء، فمن أين يا ترى سيأتون بروح الفانلة الحمراء؟

* روح الفانلة الحمراء رسمتها ريشة صديقنا الشاعر المرهف عبد الوهاب هلاوي صاحب (حاجة آمنة، ولو مني مستني الملام، وفراش القاش) عندما أنشد في لحظة عشق مريخي صادق:

هلا هلا عليك هلا

ريدنا ليك يعلم بي الله

“دمنا” الجاري في عروقنا

جاري في خيوط الفانلة ..!

* القصة ليست في الأسماء، ولكنها في (الفانلة)، وسحر المكان وروح التضحية وقيمة الإنتماء..!

* لا يزال تخدير الوصايفة بتسجيلات مفخخة مستمراً، وسمحة المهلة و(الفريق قاعد في السهلة) ..!

* الزعيم مناخ، وأسرة، وبيت كبير وصلة قربى ومحبة وقصص وحكاوي .. المريخ إبداعات علي المك والقبطان وقذائف السماني الصاوي ..!

* المريخ عالم تاني و(يا السماني عليك الله ما تجيب التاني عز الله)..!

* قالوا دايرين يخففوا على جمهورهم (المغلوب) على أمره بعد فاجعة السبت الأحمر، فقرروا السعي لإعادة الغربال محمد عبد الرحمن مع أنه _حسب زعمهم القديم _لاعب (مصاب) جلل ..!

* نجاح (الغربال) مع المريخ أثبت بيان بالكفر أن المصاب هو العقل الذي يفكر للوصايفة ..!

* مصاب لاقى مصاب.. و(البركة في الجميع)..!

* يبدو أن هشام السوباط يريد الدخول في معركة مفتوحة مع الكاردينال، فقرر التفكير في إعادة (الزجاجي) لكشوفات النادي من جديد..!

* يلعب الغربال الآن في الدوري الجزائري الذي يمثل نافذة الفتى الطموح للاحتراف بأوروبا و(الزول بمشي لقدام ولا بمشي لعمار الدمازين)..؟

* بمشي لعمار الدمازين مرادف عبارة (بمشي لوراء)..!

* الدخلها (الغربال) في الهلال ما بتقل من العملها السماني الصاوي في (ولدكم) جمال..!

* والصاوي يا الكاوي جننت الوصايفة وعملت بلاوي..!

* إن كان في وجه الوصايفة حبة خجل لما فكروا في إعادة (الغربال) مرتين، و(الزجاجي) بدل الحبة الواحدة كان بضربهم (حبتين) ..!

* (زجاجي) يلقط (الحبة) ويجري وهو فرحان.. كان أهدافه (سحر) له في (الضرب) ألوان .!

* قالوا أن رحيل الكاردينال يعني تصفية كل المشاكل والعقبات التي كانت تقف في طريق عودة ميدو للهلال، وما دروا أن (الغربال) بيان بالأهداف أثبت للجميع أنه (ملك التصفية) ..!

* قبل ثلاثة مواسم وبعد (حبتين) يصعب هضمهما اطاح محمد عبد الرحمن بمدرب الهلال الكوكي، ليثبت أنه قادر على (الغربلة) أثناء وبعد المباراة ..!

* كل من وقف في طريق (الزجاجي) من الوصايفة وأولهم مدافع برشلونة المزعوم أوتارا وجد نفسه (مغربل) ..!

* (الغربال) بدأ طريق الإحتراف، وتجاوز قصص المكايدات الفارغة، وليس لديه وقته يهدره مع ناس همها الدوري الممتاز، و(الزجاجي) يا جماعة (مشى بعيد) ورفع (القزاز)..!

* من خدع جمهور الوصايفة بالأكاذيب والترهات والأحاجي يتحمل الآن مسؤولية الركض خلف (الزجاجي)..!

* لا يزال جمهور المدعوم مضلل، وقزاز (الزجاجي) مظلل ..!

* (زجاجي) يلقط الحبة ويجري وهو نشوان، كان تسديداته صواريخ له في الشبكة أقوان..!

* قال (الزجاجي) بوضوح تام أنه إذا لعب في السودان فخياره هو المريخ، والقصة مفروض تكون واضحة كالشمس للجنة تطبيع الهلال ، و(الشمس لا تحجب بغربال)..!

* بالمناسبة : محاولات استفزاز كردنة والعمل على تأكيد أنه كان علة الهلال مغامرة ستجعل السوباط يخسر كثيراً، و(المغربل) لا بد يكون ..!

* صاحب (الإصابة المزمنة) أدخل في جسد الهلال العليل مرضاً يصعب علاجه، و(كفارة للخسارة) ..!

* يا مزمل : الجماعة ديل بقوا مسخرة والتفكير في إعادة ميدو الرافض للفكرة يمثل تجديد لجرح (الغربلة)..!

* إذا كان ميدو (جرح غربالي أول)، فالسماني (جرح تاني) ..!

* بمناسبة (جرح تاني) رائعة الفنانة المصرية شيرين : إن شاء الله مشكلة الأقوان البتدخل من موقف شروني يحلها ليكم (أبو عشرين) ..!

* عايشين على أوهام أنه البثبت وجوده في عرين المريخ معناها بكون صمام أمان عندهم .. (وكلامكم دا قولوا لزول ما شاف جمال سالم معاكم)..!

* خائف (جرح تاني) تبقى جرح تالت وعاشر و(شيرين) وابو عشرين، وواحد وشيرين ..!

* يلا خدروا بعض إلي حين، وغنوا مع شيرين :

من النهار دا ما فيش (أقوان) ..و(ضرب)..ما فيش دا كمان..!!

* إتضربي ..!

*نقش أخير*

* الشمس غابت .. وينو (الصفر) طيب .. تشكيلة (مِرق) وخابت نسيتني يا حبيب .. وريني بس في شنو النساك مواعيدنا .. (ميدو) ضيعنا .. (شطبنا) بي ايدنا .. عامل كمان (عيان) ما راضي (تقريرنا) .. (صفرك) عرفنا خلاص .. و(غربلتك) بقت عيدنا .. يوم (السبت أحمر) .. دا يوم بنتلاقي .. جيتك معاي (السمنة) ملهوفة مشتاقه ..قلت ما بتجي وأصلاً .. ما بتقدر علي الجية .. عملت (ميت) وبس .. وما صبرت لينا شوية .. الشمس غابت .. وينو (الصفر) طيب .. صواريخ (الصاوي) وصابت .. نسيتني يا حبيب .

قد يعجبك أيضا
11 تعليقات
  1. Hajjam يقول

    لازلت تمرح وتسرح في مقالاتك نسيت اخبار القونات ولا شنو؟. شايفك اتجهت للرياضة اليومين دي.

  2. بيت الزار يقول

    احبار الفنانات خلصت ههههههة الاخو عضو اتحاد الدلوكة

  3. بهجة وبهيجة يقول

    اخبار الفنانات قطعوها منك هههههههو الاخو عضو اتحاد !!!!!!!!!!!

  4. الواثق عمر يقول

    الاطرش في الزفة الزول ده شايت وين يظهر انه ذي ما قلت يا بهجة اخبار الفنانات قطعوها منه

  5. مانديلا يقول

    ههههههاي فرحانين بابوعشرتين؟ ما قبله كان جمال سالم هل حماكم من صواريخ رمضان عجب السماني هههه ومنتظرين الرشيد وعجب بعين قوية كمان …ديل ياعم نفس لعيبة تيم بطير من التمهيدي…ما قلتو قوة ضاربة ولو بتفكرو في الأميرة السمراء وهزيمة المريخ احسن تسجلوا نصف لاعبي الأهلي القاهري ونصف لاعبي الرجاء والترجي لكن ببطيخة سادومبا وابوعشرين والرشيد وعجب طبعا سوق العيش الواحد دا ما حاتتخطوه مترين واسمعوا كلامي وافهموه وبعد بداية الدوري والابطال تعرفوا اخبار جميلة. عقدة المريخ معكم مدى الحياة وكمان صفر حتى القبر وقروش الشعب السوداني مع كيزان التمييع عليكم بالساحق والماحق لانها مال الناس الواقفة في صف الخبز ..وصالون الدولار لن يغسل وصمة الكوز ومهما تم التلميع واللغف برضو كوز ولم تسقط حتى اللحظة.

  6. الكاهلي يقول

    دي هلال مريخ بقى شوك ليك قونات جديدة ع؛ أن تلمع صورتك الكرة ماعندك فهم ليها

  7. ابو عمار يقول

    قلت لي دمناالجاري في خيوط الفنله ده لونه احمر ولا كيف يا صخفي القونات الدم لونه احمر ههههههه قوووون ولا قونات

  8. احمد التجاني يقول

    الغربلة الحقيقية يا كابو هي اللي غربلها ليكم الهلال في موضوع التسجيلات. اما مباراة القمة فالكل كان يعلم بإنو الهلال يعاني من قبلها. ومهما حاولت يا كابو تداري على صدمتكم من ضربة المعلم اللي وجهها ليكم الهلال لن تنجح. اما المهزلة الحقيقية ففي حالة الإضطراب الرهيبة الحاصلها ليكم. يكفي ان تقرأ لابو شيبة وسلك ومزمل وكابو لتعرف حجم الهضربة اللي بعانوا منها. الهلال يا كابو يمرض ولا يموت وفنيلة الهلال اوصلت الهلال الى نهائي كاس افريقيا الابطال مرتين والكل يعلم ما حصل من لاراش. انت لسة ما شفت الغربلة والمهزلة الجد جد لما تبدأ تصفيات كاس افريقيا ان شاء الله ونذكرك بالكلام دة من هسع.

  9. ود خليل يقول

    في غيهم يعمهون ..
    و الله خشت فيكم بين وين ما عرفتو
    خليك من تمرق بي وين ..
    السوووووووووووبات الانتقامية ..
    من انتم .!!؟؟

  10. خالد يقول

    الضرب على الميت حراااام يا كابو ارحمو عزيز قوم ذل هههههه

  11. سوداني اصيل يقول

    بالله واحد مباري القونات ورئيس ناديه غسال عربات وكمان بتفاصح

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد