الفتيل ما بشيل كتير !!
بالعربي الكسيح
محمد الطيب الأمين
الفتيل ما بشيل كتير !!
* لو كان لجبل مرة (لسان) يتحدث به لنطق بلومنا على التقصير الكبير تجاه هذه الرقعة السياحية الفاخرة ..
* كل الحكومات التى تعاقبت على السودان فشلت في إكتشاف جبل مرة وفشلت في تسويق جبل مرة ..
* جبل مرة من حيث (الخام) و(العضم) يتوفر فيه ما لا يوجد في (شرم الشيخ) و(الإسكندرية) و(سوسة) و(الشارقة) ..
* (عضم السياحة) الموجود في جبل مرة لا يوجد حتى في (باريس) ..
* ولكنا ومنذ الإستقلال فشلنا في إبراز قيمة جبل مرة وتسويقه وجعله منطقة سياحية يقصدها أهل الأرض من مختلف الفجاج ..
* ولعل أهل دارفور يعرفون تماماً ان جبل مرة (جنة في الأرض) من حيث المناخ والطبيعة والخضرة والماء والوجه الحسن والفواكه الوفيرة والشلالات التي لا تكف عن الجريان ..
* يحدث هذا رغم أن المناطق السياحية في السودان غير كثيرة ومع ذلك نهمل جبل مرة ربما سهواً وربما عمداً..
* المناطق السياحية في السودان بتتحسب على أصابع اليد وهي : (جبل مرة ، جبل أولياء، الإهرامات في الشرق والجوهرة الزرقاء) ..
* أخيراً الجوهرة الزرقاء إنضمت للمعالم السياحية بالسودان..
* ولعل جمهور الرياضة قد تابع أمس الأول الخبر المتداول (صورة وصوت) لعرسان سجلا زيارة للجوهرة الزرقاء وبـ(الزفاف) كمان.
* في دارفور العرسان بيمشوا شهر العسل جبل مرة، وفي أم درمان العرسان بيمشوا الجوهرة الزرقاء عشان يتصورو..
* عزة جد والله ..
* عريس بدأ حياتو من الجوهرة قطع شك ح يعيش في سعادة ونعيم ..
* عموماً.. نبارك للعروسين ونتمنى لهما حياة زوجية سعيدة وإن شاء الله بيت مال وعيال وبطولات ..
* ينتظر أن تغادر بعثة الهلال غداً إلي كينيا لعقد معسكر تحضيري (قصير) قبل التوجه إلي ليبيريا لمواجهة بطلها في تمهيدي الأبطال ..
* المعسكر من شأنه أن يسد الثغرات التى ظهرت في إعداد الهلال لهذا العام ..
* وقيمة المعسكر مشروطة بالمباريات الودية التي سيخوضها الهلال بكينيا ..
* لابد أن يلعب الفريق مباراة ذات ثقل فني وبدني قبل السفر إلي ليبيريا ..
* الإعداد هذا العام (إتجوبك) لأسباب كثيرة أهمها مشاركة منتخبنا الوطني في بطولة الشان ثم التخبط في حسم أمر المعسكر الذي تأجل أكثر من مرة ..
* نثق في أن الهلال يستطيع أن يتخطى بطل ليبيريا حتى ولو كان ذلك (بدون إعداد) ..
* لا خوف على الهلال في التمهيدي لأن الهلال أكبر من التمهيدي ..
* بمناسبة التمهيدي ..
* بالأمس أكمل المريخ الشهير بـ(المدفور) الشهر السادس (بدون رئيس) ..
* يعني الليلة ليهم (6) شهور و24 ساعة بدون رئيس ..
* الليلة أول يوم ليهم في (الشهر السادس) ..
* وللأمانة أول مرة في حياتي أشوف لي نادي ما لاقي ليهو رئيس ..
* النادي ممكن يفتش لصانع ألعاب وما يلقاهو ..
* ممكن يفتش لرأس حربة وما يلقاهو ..
* زي ما قال الكاردينال في تصريحه الغريب ، قال : (3 شهور بفتش في محترف سوبر وما لقيت) ..
* ده تصريح مُعيب أطلقه الكاردينال قبل فترة ..
* المهم ..
* ممكن النادي يفتش لمدافع بمواصفات خاصة وما يلقاهو ..
* لكن ما حصل في نادي في الدنيا دي ستة شهور ما لاقي ليهو رئيس ..
* الحاجة دي ما بتحصل وما حصلت إلا في نادي المريخ ..
* حاجة زي دي ما ممكن تحصل أصلاً ..
* الوحدات الأردني ده مش فريق (وهمي) وغلب المريخ (سبعة) ؟؟
* مش الوحدات فريق وهمي ؟؟ لكن برضو مستحيل تلقى الوحدات الأردني بدون رئيس ..
* الحاجة دي في الروابط ما بتحصل ..
* وبعد ده يقول ليك دايرين نعمل (قناة) ..
* قناة بـ(الكاء) ؟؟
* حاجة تكسف ..
* من حسنات المنتخب الوطني أنه رفع رأس السودان عالياً بمشاركته القوية في بطولة الشان ..
* المنتخب أثبت أنه قادر على فعل الكثير إذا وجد الدعم والإهتمام ..
* أيضاً من الحسنات (الثانوية) لمشاركة منتخبنا أنه قد (جهز) سبعة لاعبين للهلال ..
* عضم الهلال تم تجهيزه بواسطة المنتخب وهذا يصب في المصلحة الزرقاء خصوصاً وأن إعداد الهلال لم يشهد تجارب إعدادية بالمستوى المطلوب حتى الآن ..
* نجوم الهلال بالمنتخب (تسعة) ولكن الجاهزين الآن (سبعة) يمكنهم المشاركة بقوة في لقاء ليبيريا بقيادة جمل الشيل الشغيل وأبو عاقلة وبوي وسموأل وبقية النجوم ..
* عموماً المنتخب الوطني عمل العليهو وبالزيادة لأن ما وصل إليه لم يكن يتوقعه حتى قادة الإتحاد العام أنفسهم ..
* نشكر المنتخب في المقام الأول لأنه رفع إسم السودان وشرفنا ثم نشكره لأنه ساهم في تجهيز (عضم) الهلال ..
* طبعاً (عضم المريخ) كان راقد في مستشفيات القاهرة ..
* بكري ورمضان عجب ومحمد عبد الرحمن وصلاح نمر والتش وأمير كمال هم (عضم المريخ) وجميعهم يعاني من إصابات كلفتهم التخلف عن إعداد الفريق، منهم من عاد ومنهم من ينتظر ..
* أظرف حاجة إنو المريخ بيعالج المصابين أثناء فترة الإعداد مع إنو الإصابات حدثت في الموسم المنصرم ..
* علاج الإصابات (البايتة) يتم أثناء فترة الراحة ..
* ولكن بكري المدينة الذي يعاني من إصابة (بايتة) سافر للعلاج بعد إنطلاقة الإعداد بيومين ..
* وده حقيقة فهم عجيب ..
* الفهم ده بيأكد فعلاً إنو المريخ بدون رئيس ..
* بعد الإعداد بدأ حتى إكتشفوا إنو عندهم لاعبين مصابين ..
* هي التشكيلة كلها مصابين ..
* ويجي يقول ليك دايرين نعمل قناة ..
* إنتو أحسن تعملوا مستشفى..
* وغايتو السنة دي بالذات يا متنا من الضحك ويا كمان الضحك كلتنا ..
* ونركب صافنات ونجيبة (دارفورية) وأصلو الزول بيموت والذكرى تفضل حية ..
* و..و..
* وكان نفسي أقول ليك من زمان.. الفتيل ما بشيل كتير..
حمل تطبيق كورة سودانية لتصفح أسرع وأسهل
لزوارنا من السودان متجر موبايل1
http://www.1mobile.com/net.koorasudan.app-2451076.html
2,456حملو التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9
على متجر apkname
https://apkname.com/ar/net.koorasudan.app