المرحوم مالو؟.. المرحوم كان بتابع في مباراة الهلال!!
صابنها
محمد عبد الماجد
المرحوم مالو؟.. المرحوم كان بتابع في مباراة الهلال!!
• مع تسليمي التام ان النتائج السلبية في مباريات كرة القدم امرا طبيعيا ، وان اعظم الاندية في العالم يمكن ان تتعرض لعقبات وخسائر ، ويمكن ان تحدث لها (كوارث).
• هذا شيء عادي – قاعدين نشوف فيه هذه الايام في برشلونة وفي ريال مدريد.
• بحصل في ارقى العائلات.
• عارف ان اهم مباديء الرياضة تتمثل في التعامل مع كل (النتائج) السلبية منها والايجابية بروح رياضية وقبول.
• لكن نحن لسه ما وصلنا المرحلة دي.
• نحن بعيدين.
• من اعظم فوائد (الهزائم) انها تروّض النفوس وتكسر الغرور ، وفوق كل هذا فهي تجعل للانتصارات طعم احلى.
• مع هذا لا نستطيع ان نتجاهل نتائج الهلال الاخيرة ، وان نتعامل معها بمثالية ونحن لسه بنقول يا هادي.
• لازم نشكي.
• ونتكلم.
• ونغضب.
• وننتقد.
• والله نحن تعادل الهلال عندنا زي (وجع الضرس).
• نحن ممكن ننوم عادي بي وجع الضرس.
• وممكن نشيلها (موزة).
• تعادل الهلال – وجع ما بنقدر عليه.
• النوم بطير من العين.
• العين سنة تاني ما تلاقي.
• يا كدا يا كمان نبقى بدون مشاعر وبدون احاسيس وبدون عاطفة.
• قلت ليكم نحن الهلال دا (كورنر) ما بنحلمو فيه.
• فكيف لنا ان نستحمل (هزيمة) او (تعادل).
• والله نحن وقت يرفعوا الزمن البدل الضائع والهلال مغلوب او متعادل – بنعاين للحكم الرابع زي (حملة الدفتردار الانتقامية).
• نحن ما عندنا طاقة لذلك.
• ولا عندنا صبر.
• ولا بنعرف نجامل في الحتة دي.
• وان كنا يجب ان نبحث للطاقة والصبر لمثل هذه المواقف.
• لكن بيني وبينكم مرات (الصبر) ذاتو بيبقى مشكلة.
• نصبر اكتر من كدا لمتين؟
• خلاص – فترنا.
• زهجنا.
• قرفنا.
• أنا ضد التدخل في عمل المدرب والتنظير في شغلو.
• ضد الاطاحة بالمدرب – ومع الاستقرار الفني.
• لكن كمان ما بالصورة دي.
• المدرب مفروض يساعدنا بالنتائج.
• نحن هسع ما بنسألوا من الاداء.
• ولا من البطولات.
• لكن كمان لمن تلعب مع الشرطة وحي الوادي مفروض تنتصر.
• لمن تلعب مع مازيمبي وهو بهذا المستوى …يجب ان تنتصر.
• الاستقرار الفني مع هذا التجريب والتنظير هو ذاتو بقى في (حص بيص) ، اذا كنا نحن (الهلالاب) في كل مباراة بنتفاجأ بتشكيلة جديدة للهلال.
• والله الواحد ممكن يركب في حافلة الحاج يوسف (الردمية).
• او في حافلة الكلاكلة صنقعت.
• يرفع رأسو … يلقي بعرف في الحافلة (11) راكب.
• هسع تشكيلة الهلال الواحد بقى ما بعرف فيها لاعب واحد.
• كل مرة (11) لاعب جدد.
• الهلال بقى ما فيه حاجة ثابتة.
• كل الاشياء فيه (متغيرة).
• ومتبدلة.
• ما في حاجة ثابتة.
• في الهلال الطرف اليمين ما معروف منو؟
• والشمال في كل مباراة لاعب جديد.
• في الهلال حتى اللاعب الذي ينفذ المخالفات والضربات الثابتة ما واحد.
• كل مخالفة تنفذ عن طريق لاعب جديد.
• القريب بس.
• القريب ينفذ.
• في الهلال اذا تألق لاعب في مباراة سوف يبعد عن المشاركة في المباراة القادمة.
• اللاعب دا تاني (الدرب) ما بجيبو.
• اقول ليكم نحن عندنا مشكلة.
• نحن كاعلام وكجمهور.
• ما عاوزين نرمى الحكاية كلها على المدرب.
• لكن نحن اذا لعب بوجبا بنسأل من مجاهد فاروق.
• اذا لعب الشغيل نقول مفروض الشغيل يرتاح شوية.
• اذا شارك نزار حامد بنسأل من جيسي.
• المشكلة نحن بنعاين للتشكيلة بعد نهاية المباراة وبعد نتيجتها.
• لكن المدرب بعاين ليها قبل المباراة.
• مع هذا وبامانة شديدة (زوران) عملها ظاهرة.
• يعني ما معقول تشرك ليك اكثر من (6) عناصر في مباراة في الدوري الممتاز كانوا بعيدين من اللعب والمشاركة.
• اعمل وزنة شوية.
• ما معقول تبعد خط الهجوم كله الغربال وعيد مقدم وفيني كومبي والسنغالي انداي بحكم مشاركاتهم المستمرة مع الهلال في الفترة الاخيرة.
• حتى لو قصد زوران اراحتهم كان يجب ان لا يريح كل العناصر التى كانت تشارك في المباريات الاخيرة.
• هذا حدث في خط الهجوم.
• تعالوا شوفوا الخطوط الاخرى.
• في الوسط تم ابعاد الشغيل وابوعاقلة مرة واحدة.
• في الاطراف شارك (الدالي) – والسمؤال هو الاخر بعيد عن مستواه في هذه الايام.
• أنا على قناعة تامة ان المدرب يفترض ان يحقق سياسته عن طريق (النتائج).
• ما في فريق في الدنيا يمكن ان يصبروا لمديره الفني مهما كانت عبقريته واهدافه النبيلة اذا كانت نتائجه مع الفريق غير جيدة.
• نحن عارفين ان زوران في مرحلة بحث – وبناء فريق جديد.
• وعارفين ان الهلال خلال 4 شهور دخل لكشوفاته اكثر من 22 لاعبا جديدا.
• الكلام دا كله عارفنو.
• لكن مع ذلك فان الهلال مع كل هذه المعطيات وبكل هذه الظروف قادر على التغلب على كل الاندية التى يلعب امامها بما في ذلك مازيمبي.
• في البطولة الافريقية اضاع الهلال انتصارا سهلا على مازيمبي الكنغولي.
• واجه الهلال فريق مازيمبي وهو في اضعف حالته.
• اضعف نسخة لمازيمبي لعب معها الهلال في المباراة الاخيرة.
• وفشل الهلال على الانتصار على مازيمبي.
• مباراة الهلال امام صن دوانز اظهرت الهلال في حالة يرثى عليها.
• تعادلات الهلال في الدوري الممتاز لم تكن منطقية ولا مقبولة.
• تعادلنا مع حي العرب واهلي مروي والشرطة القضارف وحي الوادي نيالا.
• التعادل مع الشرطة القضارف تم رده الى سوء ارضية الملعب (دار الرياضة ام درمان).
• الهلال امس لعب امام فريق حي الوادي في ملعب الهلال وفي ارضية ممتازة وفشل في تحقيق الانتصار عليه.
• بل كان الهلال قريبا من الخسارة.
• نعم حكم المباراة كان سيئا وصرف للهلال ضربة جزاء اكثر وضوحا من الضربة التى احتسبها للهلال.
• لو لم تكن ضربة الجزاء التى ارتكبت مع محمد عبدالرحمن بذلك الوضوح ربما ما احتسب الحكم ضربة الجزاء الثانية.
• يعني لازم تكون عندنا في البداية (ضربة جزاء) لا تحتسب حتى يتم احتساب الضربة الثانية.
• واحدة لا تحتسب.
• والاخرى تحتسب.
• مع هذا الحكم السيء ، فان زوران المدير الفني للهلال كان اسوأ منه.
• لذلك في ظل هذا الاداء لا نستطيع ان نلوم حكم المباراة الذي اعطاه المدير الفني للهلال الفرصة.
• اذا كان زوران بفكر في مباراة الهلال الافريقية كان يفترض ان ينتصر في مباراة الامس.
• خير اعداد لمباراة الجزائر هو ان ينتصر الهلال امام حي الوادي.
• الاعداد لمباراة الجزائر لن يكون عن طريق اراحة عناصر تتسبب في ان تفقد نقاط مباراة حي الوادي.
• الانتصار هو افضل اعداد.
• عشان ما نقعد نشرع كتير.
• نحن نخشى على الهلال من مباراة الجزائر بسبب تعادل الهلال امام حي الوادي.
• الروح المعنوية نزلت.
• والعزيمة.
• والاصرار.
• والثقة اهتزت.
• والمدرب ذاتو بقى ما مضمون يقود الهلال في الجزائر.
• ……….
متاريس
• اوتارا كان من افضل اللاعبين في المباراة.
• مجاهد فاروق كان جيد – لكن شارك في خطأ الذي تسبب في هدف حي الوادي.
• محمد عبدالرحمن في كل الظروف مفروض ما يقعد برة.
• فارس عبدالله اثره ظهر.
• فارس عبدالله هو الوحيد البمشي لي قدام في الهلال.
• الله يلزمنا الصبر.
• والحمدلله على كل حال.
• القادم ان شاءالله افضل.
• خير.
• …….
• ترس اخير : بقت تنقط في الشتاء.