*فاز المريخ بنقاط هلال الفاشر
*وبصرف النظر عن شكل الاداء
*تحقق الاهم
*هذا الفوز احبط جميع الزناطير بمختلف الوانهم
*زناطير الداخل وزناطير الخارج
*فالزناطير بمختلف الوانهم كانوا يمنون الانفس بخسارة جديدة للزعيم
*لان خسارة الزعيم في هذه الايام بالذات تخدم قضية زناطير الداخل وزناطير الخارج
*اليومين دي الزنطرة كتيييرة
*زنطرة عمييييقة
*وهل توجد زنطرة اكتر من شحن القلوب بامنيات خسارة الزعيم؟؟؟؟
*تعيشوا وتاخدوا غيرها يا الزناطير بمختلف الوانكم
*المهم
*هل يمكن اعادة اسباب الفوز الي ابعاد اب شنب؟؟؟
*وهل ابعاد مدرب بهذه الطريقة واعادته من منتصف الرحلة امرا يمكن تصنيفه بحسن الادارة والدراية يا علي اسد؟؟؟
*تصرفات سنة اولي ادارة دي حقو الناس تخليها وترتقي
*ايها الناس
*اصر علي ان حراسة المرمي في المريخ تحتاج لدعم سريع بحارس اساسي
*فالضعف بين
*بالذات في العرضيات
*والاعتماد علي ابي عشرين ومنجد فيه تواكل اكثر من توكل
*عيوب ثابتة واساسية
*عدم تطور واعتماد علي الحظ او رعونة الخصوم او الصدفة في صد الكرات
*اما امير كمال الكابتن
*فلا زال يمارس الاستهتار واجبارنا علي الدخول في اضافريننا
*ومثل هيك تصرفات واستهتارات لا تصدر عن قدوة الناس وكبيرها
*تقدير المسؤولية بظهر من الاداء والجدية
*ايها الناس
*هل تابعتم لقاء البروف محمد جلال والعنقالي علي اسد؟
*بربكم من كان البروف في تلك الحلقة؟
*الاجابة متروكة لكم
*المهم
*بالامس خاطبنا حمدوك عبر هذه الزاوية
*واليوم نكرر النداء
*ياحمدوك
*الكيزان اكلوا اكل الجن
*ولكن اكبر موائدهم كانت في وأد المخازن والمهمات
*وفي نحر النقل الميكانيكي
*فالاولي تمثل مشتروات الدولة
*وما الذ الاكل من وعاء المشتروات عندما يمتلكه الوزراء
*كباري زي الكباري
*واسعار لم ينزل الله بها من سلطان
*ويحضرني موقف وزارة اشترت بكاسي من معرض في شارع عبيد ختم
*ختوا السعر البريحهم في الفاتورة
*وجابوا الشيك بالسعر المريحهم باسم البائع
*ومشوا معاهو البنك وصرفوا
*ومن البنك للوزارة بالقروش
*ودخلوا للوزير بالباب الورا
*بدون خجلة سعادتو استلم الفرق بين الشيك والسعر الحقيقي
*وادوا سيد البكاسي قروشو ومشوا
*للمعلومية الوزير في هذه القصة ماكوز
*ولكنه من المؤلفة قلوبهم
*سندفع بالواقعة لساحات العدالة عبر تجمع المحامين الديمقراطي
*سيما وسيد البكاسي قاعد وبخاف الله
*والشهود قاعدين تامين ولامين
*والله في
*ياحمدوك
*هو كان النقل الميكانيكي هو البجيب عربات الحكومة
*ماكان الوزراء عملوا كباري في الوزارات
*ولو كانت المخازن والمهمات هي الجهة البتجيب الاثاثات وجميع المستلزمات
*ماكان المسؤولين استفادوا من دس كاونت الشراء لصالح الدولة
*الحتة دي دايرة وقفة ياحمدوك واعادة نظر
*حمدوك
*الطيران المدني داير شغل
*الحق قبل ماتلقي كل الخبرات فيهو عميقين
*والجودة والمواصفات وتحديد السلع المسموح باستيرادها
*كلها من الامور التي تنعكس علي مائدة المواطن بسرعة
*معقولة زول يشتري لمبة من المغلق حرقانة؟؟؟
*مفتاح مروحة بدون ملف
*بلك ريحتو كلب كلب
*ومكتوب عليهو صنع بالمانيا
*امال لو كتبوا عليهو ميد ان جاينا كان عضانا ولا شنو؟؟
*حمدوك شاااطر لكن بطئ
*خلي ايقاع الكورة السودانية ده يا سعادتك
*والعب اللعب السريع
*باص خلف المدافعين مع سرعة الشباب ديل ببقي قون مضمون
*تتأخر كدة بتكتلوا وبطلعوها درون
*وديل كان درنوا تاني مابتغلبوا لينا
*وبشيلوا الدوري ويخلوا ثورتنا ملح ملح
*حمدوك
*نعلم تماما ان الحفرة العميقة التي استغرق حفرها تلتين سنة متصلة
*مابتتردم بين يوم وليلة
*لكن كمان تأخير بداية الردم وزيادة التنظير مامن الصالح
*اردم ياحمدوك
*وابدأ بالحجار الكبار
*ارميهن في الحفرة
*وببقي الردم مامحتاج تراب كتير
*حانعود
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*حمدوك حبيبنا واخينا
*حمدوك لعاب يا والينا
*لكن بلوك الكورة كتير وبضيع الهجمات علينا
سلك كهربا ننساك كيف والكلب قال النقل الميكانيكي والمخازن والمهمات من اشهي المأكولات
والي لقاء
سلك