المريخ يكسب النزال
لهيب النار
هاشم الطيب
المريخ يكسب النزال
المريخ يفعلها ويحقق المطلوب.. الصاوى فعلها وأسكت دعاة السيادة … الدقيقه الثالثه الصاوى يخمد الطموحات .. ولدنا الزعلان فش غبينته محققاً إعادة المريخ الأجواء !!
ويا فرحة لم تكتمل والصاوي يفعلها وفي الدقيقة ثلاثة وأربعين أسكت الالسن !!
شنو قصة السماني مع الرقم ثلاثه الدقيقة الثالثه وثلاثه وأربعين وأوشك على الهاترك ليصبح أخصائي المهداوي لشباك أبو عشرين!!
بعد صيام دام عشر مباريات الغربال عاد للخدمه حمد لله على سلامة العوده !!
البرتغالي ركز فكره وخطته وتكتيكه على الجزولي نوح ناسياً أسد أسمه السماني الصاوى الذي فعلها ولم يخاف عقباها وأبكي العيون بالدمع السخين !!
عاشق المهزوم ابوزيد حرد العشا وعزه قالت ليه يا الصاوي تعمل كدا تخلي بابا يحرد العشا.!!؟
الصبه ناقصه اسمنت ورمله الحيطه ماياها وكلارك عرف من أين تؤكل الكتف أقعدوا راقبوا شهر رمضان وسفينة نوح ونسينوا هزبراً آت
من خلف الكواليس ويردم ابو العشرين براجمتين والبرتقالي يسأل الشغيل من وين هذا الرجل الخفي !!؟.
وسائل منهم على عبدالله عن أسباب ولوج الأهداف وجاء الرد مخيباً المستمعين !!
ما تستغربوا كنت لما السماني يمسك الكوره أشوفه عشرين عشرين وأصيح المدافعين أمسكوا الزول أبو عشرين صوره دا لكنهم يعجزوا وربك رب الخير بس أنا أجيب من جوه !!
أول مره أصدق الصحفي الكبير صاحب الدبابيس يقول أبو عشرين كيسه فاضي وفعلاً صدق من قال البحر بياخد عوامه وأبو عشرين يتلفت وهات من الشبكه !!
الله يجازي محنك يا شيخنا السماني جننت ود الناس .!!
باكر كتاب الهلال إلا ينادوه أبو إتنين خلاص يا الصاوي مادام غيرت للزول إسمه عليك خروفين للسمايه .!!
الدكتور رئيس بعثة المهزوم قبل المباراة قال بأن المعاملة فيهآ إستهداف لسيد البلد والله عدم المعرفه مصيبه يمكن تكون شاطر في غرفة العمليات وربما عالم ذره لكن في الشأن
الكروي لم ينجح أحد و كل زول ربنا أداه موهبه لكن حكاية الكوره وأمورها ربنا ما أداك ليها شعر !!
كلام باكر شنو ؟::
باكر كلام الجماعه المهزومين شيتاً كُتُر الحكم ظلمنا المدرب كيسه فاضي شايله الهواء أو كشافات السلام مسلطه على عيون أبو عشرين عشان يمُلص كورة السماني !!
غايتو يا السماني خليتنا نرمي الجوكر بايظ ربنا يغفر ليك.
خارج النص :
- انتهت مباراة القمة بانتصار باهر ومباراة جميلة سادها القتال المستمر
- عمار طيفور و عماد الصيني هم الابطال الخفيين فى هذه المباراة فقد لعبوا دور تكتيكى عالى
- بخيت خميس استمات فى الدفاع واخترق جبهات الهلال بطلعات اربكت حسابات المدرب البرتغالي
- توماس باواك مميز وادي بثبات ماعدا الخطأ فى كورة الهدف الذى ولج شباك منجد النيل
- منجد النيل ملك التقفيل ماشاء الله عيني عليك بارده ولا خليت شارد ولا واردة.
- ادي المريخ المباراة من اجل النقاط لذلك ركز كل المجهود فى تحقيق هدفه
- سيطرة هلالية على مجريات اللعب دون فعالية هجوميه هذا عنوان مباريات الهلال الثلاثة والمدرب لا يملك حلول
- إلقاء اللوم على التحكيم عادة يجب ان تندثر فالهلال بلا انياب والمدرب تاخر كثيرا فى تبديلاته
- نتمنى التعادل فى مباراة الاهلى وصن داونز حتي تظل الصدارة مريخية.
قلت لي كيف يا عمو تتعادل مع الاهلي وصن داون عشان تقعد في الصداره هو وينه فريقك البقعد في الصداره احسن جر ليك سرير وشوف ليك ضل ونووووم واحلم النومه بتريحك خاصة في السن دي
من حق عمنا يقول كدة فريق راشيكم بمبان تفيل من بمبان الصاوى وكمان عاوز تتكلم وتتفاصح يارشاشة.والجايكم تقيل
يقصد التعادل بين الأهلي وصنداونز عشان يتعطلو بالتعادل وده يصب في مصلحة الفرق السودانية
انت قلت حكم متقاعد بذمتك ورينا رايك في مخالفات فريقكم التي كانت تستحق الطرد. احد لاعبيكم وطأ برجله عمدا علي ذراع اجاجون وهو واقع علي الارض بدون كورة وشلوت علي ظهر عبد مقدم من الخلف سألتك بالله ادينا رايك بصراحة ومن غير لف ودوران.
انتصاركم تم بمساعدة الحكم ولا ندري ماهي مكافاة الحكم علي نصركم المزعوم؟ حكام شمال افريقيا معروفين وتسهل استمالتهم والظاهر استفدتم من قصة الاهلي المصري مع لاراش.
امس قبل المبارة قلت ليك الرش جايكم ياهاجم فريق ام زين .قال حكم قال روح كدة شوف فريكم المهلل دا.وموتا ركب التونسية والان فى البحر الاليض اامتوسط ههههههه