صحيفة كورة سودانية الإلكترونية

الناس جروحهم (9) ونحن جروحنا (90) !!

45

بالعربي الكسيح
محمد الطيب الأمين

* بعض (النكات) تجسد الواقع ..
* وفي النكتة .. إشترى رجل (سُيوتر برد) فاخر قبل حلول فصل الشتاء ..
* والرجل معجب بـ(السُيوتر) لدرجة بعيدة ..
* كل يوم يقوم بإخراج (السُيوتر) من الدولاب (يعاين ليهو ويرجعو) ..
* عاجبو شديد ..
* وقد ذهب أبعد من ذلك وأصبح (يقابض الناس في الشارع) ، لو قابلك في الشارع بيقول ليك : (أسمعني الواطة دي بقت باردة كده ولا أنا غلطان) ؟
* وهو يكون ما في أي برد ..
* سخانة ألف ..
* لكن هو عايز ليهو زول يقولو ليهو (في برد) عشان يلبس (السُيوتر) ..
* يقول ليك : (الليلة جابت ليها برد صاح) ؟
* يقول ليك كده وتلقى صلعتو بتلمع من العرق ..
* عشان (السُيوتر عاجبو) عايز يجيب لينا البرد في شهر حداشر ..
* إتخيل الزول ده لو كان في زول قال ليهو (أيوة في برد) طوالي ح يمشي يلبس السيوتر ..
* زي الزول ده عايز ليهو زول (يغشو) ويكضب عليهو ..
* داير زول يطمنو ..
* وبما أن ذلك كذلك أعتقد أن هنالك عدد من أهل الهلال هم في أوقات كثيرة مثل صاحب السُيوتر ..
* دايرين الهلال يكون (كويس بالكضب) ..
* ودي مشكلة كبيرة ..
* مشكلة .. لما ما تتعلم من الأيام ..
* مشكلة .. لما تقنع نفسك بالكضب ..
* مشكلة .. لما تطمئن نفسك بالكضب ..
* طيب .. كلنا شاهدنا الهلال في مباراته أمام الموزمبيقي أمس الأول ..
* وكلنا يعلم أن ما قدمه الهلال بموزمبيق أفضل من الذي قدمه بالجوهرة في مباراة الذهاب أمام نفس الفريق ..
* في موزمبيق لعب الهلال بشكل مقبول وتحرك نجومه في أوقات كثيرة من زمن اللقاء بشكل إيجابي وظهرت لمحات ونفحات من (كورة القدم) ..
* ولكن ..
* مغشوش أي زول فاكر إنو الهلال ح يكون كده ..
* مغشوش والله ..
* ما ظهر به الهلال في موزمبيق سيأتي ويظهر بخلافه في اللقاء القادم ..
* ونفس الناس الإستبشرت بما قدمه الهلال ستأتي وتغضب بعد اللقاء القادم ..
* الهلال مستواه مثل (الدولار) غير ثابت بالمرة ..
* وهذا يرفع نسب (التضخم في قلوب المحبين) ..
* الهلال يوم كده وتلاتة أيام كده ..
* تشوف الهلال أمام مريخ الفاشر تقول (بصمة المدرب ظهرت)، تجي تشوف الهلال أمام ود هاشم سنار تقول (المدرب كيسو فاضي) ..
* تشوف الهلال أمام حي العرب تقول (الهلال تاني مستحيل يتغلب أو يتعادل) ، تجي تشوف الهلال أمام الشرطة القضارف تقول (أشطبوهم ما نافعين) ..
* هكذا هو الحال ..
* ما بتقدر تبني موقف ثابت تجاه الهلال ..
* لأنو الهلال ما بقدر يلعب ثلاث مباريات بمستوى واحد ..
* وهذا عيب كبير ..
* ولذلك أنا أطلب من جماهير الهلال وحفاظا على سلامتهم من الاحباط، أطلب منهم أن يتعاملوا مع الهلال بالقطاعي ..
* رزق اليوم باليوم ..
* رزق المباراة بالمباراة ..
* لما تشوف الهلال (يلمع) في موزمبيق ما تتوقع إنو (اللمعة) دي ح تتواصل ..
* ولا تتوقع إنو ده شغل فني وبصمات ..
* لازم تعرف إنو الكورة السودانية يلعب فيها (القضاء والقدر) دور كبير ولذلك هي بعيدة كل البعد عن (البصمات الفنية) وغيرها من المصطلحات التي لا تنطبق علينا ..
* كثير من الجماهير تفرط في الفرح والحلم الجميل وحينما تأتي الصدمة يكون الوجع أكبر ..
* الآن المطلوب أن تتعامل الجماهير مع الهلال باعتباره خرج من البطولة ..
* لا في حسابات ولا (لولوة) ..
* الهلال خرج ..
* نشوف الجاي ..
* وأزيدكم من الشعر بيت (ما في أي بصمة بتاعت مدرب ظهرت) ..
* الأداء الجيد في موزمبيق كان (قضاء وقدر) ..
* والله صحي ..
* وبراكم ح تشوفوا كلامي ده في المباريات القادمة ..
* نفس الناس القالوا (بصمات المدرب بدت تظهر هم ذاتو ح ينتقدو المدرب في أقرب مباراة) ..
* زمن الكوكي لما الهلال غلب النسور في إستاد الخرطوم ولعب مباراة للتاريخ بالعناصر الشابة كلنا توقعنا أن يواصل الهلال بذات النهج والمستوى ولكن ..
* راجع ذاكرتك الآن ستجد ان الهلال لعب هذا العام عدداً من المباريات الجميلة فهل واصل من حيث بدأ أم أنه عاد للعك ؟؟
* ما في ثوابت في كرة القدم السودانية والهلال جزء من هذه الكورة السودانية ..
* كورتنا عشوائية ولا تستطيع أن تراهن عليها ..
* سراب ..
* نحسبه ماء ..
* نقول هذا الحديث (المُر) من باب (الوقاية) من الإحباط ..
* نكتب هذا منعاً لزيادة الجروح ..
* الناس (جروحها 9 ونحن جروحنا 90) ..
* بدل جروحنا تبقي (91) أفضل نحافظ على الجروح الـ(90) ..
* الأحلام والآمال لابد أن تتوفر لها مقومات وأسباب ..
* وإحنا في السودان أحلامنا فوق ولا مقومات لهذه الأحلام ..
* أحلام من غير (سيقان) ..
* إتعاملوا مع الهلال بالقطاعي (مباراة بمباراة) ..
* ولما تجوا تفرحوا أعمل حساب يوم الحزن ، ولما تجوا تحزنوا أعملوا حساب يوم الفرح ..
* يعني في حالة النقد خلوا (هامش) للأيام ، وفي حالة الغزل خلوا (هامش) للأيام ..
* الرهان على إنو الهلال كعب لا يجوز ، والرهان على إنو الهلال بقى مية مية أيضاً لا يجوز ..
* القصة محتاجة إعادة نظر في كل شئ ..
* نعيد النظر في تسجيلاتنا ودواخلنا وقلوبنا ونوايانا ومحترفننا وفكرنا الإداري وكتاباتنا وتشجيعنا وفهمنا وطموحنا ..
* نعيد النظر في كل شئ ..
* نعيد النظر عشان لما نضحك ما تكون في (دمعة حابسة) ..
* عشان لما نفرح ما نبكي المباراة الجاية ..
* لازم نتعلم كيف يلعب الهلال موسم كامل بمستوى واحد مثله ومثل سائر الفرق في الدنيا ..
* الفرق يمكن أن تخسر مباراة ومباراتين ولكن تحس بأن مستواه (شبه ثابت) ..
* وأنا هنا أتحدث عن المستوى والشكل والشخصية ..
* ألعب بمستوى ثابت على الأقل ثلاثة مباريات وراء بعض ولو خسرت ما مشكلة ..
* عموماً.. نصيحتي ليكم (أفرحوا بحذر وأحزنوا بحذر) ..
* ونركب صافنات ونجيبة (سودانية) وأصلو الزول بيموت والذكر تفضل حية ..
* و..و..
* والجاية من الله بتصيب ..

 

 

 

حمل تطبيق كورة سودانية لتصفح أسرع وأسهل 

لزوارنا من السودان متجر موبايل1

http://www.1mobile.com/net.koorasudan.app-2451076.html

2,456حملوh التطبيق               

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app 

17756 حملو التطبيق

على متجر apkpure

https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app

على متجر facequizz

http://www.facequizz.com/android/apk/1995361/

على متجر mobogenie

https://www.mobogenie.com/download-net.koorasudan.app-3573651.html

على متجر apk-dl

http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9

على متجر apkname

https://apkname.com/ar/net.koorasudan.app

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد