صحيفة كورة سودانية الإلكترونية

النقل المباشر لمباراة الهلال وفايبيرز

2٬874

صابنها

محمد عبد الماجد

النقل المباشر لمباراة الهلال وفايبيرز

• فترة طويلة في الهلال او قل في السودان لم اشاهد مدرب (مجتهد) بهذه الطريقة التى اشاهد فيها روزان الآن.
• الزول دا حايم السنة كلها….متل الممتحن الشهادة السودانية بعد بداية الامتحانات.
• روزان ذكرني بحوامة ميشو وقت تكون عنده مباراة – كان ما بنوم الليل.
• روزان مدرب عنده اصرار وعزيمة ومجتهد ومخلص بشكل كبير في عمله مع الهلال.
• دائما هو مهموم باللحظة القادمة في الهلال.
• يراجع في احتياجاته ، ويتحدث عن توجيهاته.
• فيه (قلق) كبير – ينزل من غرفته ويطلع في باحة الفندق.
• تحركاته عباراة عن مشاورات واجتماعات مستمرة مع البوسني عدنان وبشه وعبدالمهيمن.
• هو في ذلك الوضع دائما – يا بتكلم مع عندنان يا بشه.
• يا دي.
• يا دي.
• دائما هو الاستنجاد بي بشه.
• اجتهاد روزان لا يعني ان رأسه فاضي – لاننا تعودنا ان نقول عن الشخص الذي لا نريد ان نشهد له بالكفاءة انه شخص (مجتهد).
• لاعب (مجتهد).
• فنان (مجتهد).
• صحفي (مجتهد).
• كل هذه الاشياء لها دلائل تانية …بتعني بباسطة كدا انه ما عنده (موهبة).
• رغم ان موهبة بدون اجتهاد لا قيمة لها.
• كفاءة روزان واضحة في شخصيته القوية – خارج الملعب هو شخصية مرحة – داخل الملعب ما بعرف يا يمة ارحميني.
• بركب وش.
• لا اريد ان اسبق الاحداث لكن بصمة روزان ظهرت في الهلال – في السرعة والضغط واللعب من لمسة واحدة.
• يمكن ان تكون التمارين والمباريات الودية غير كافية للحكم على هذه الاشياء – لكن اراهن انكم سوف تشاهدون ما نتحدث عنه في مباريات الهلال القادمة ، ولا افصل مباراة اليوم عن انها سوف تكون الشهادة الاولى للمدير الفني روزان لو قدر للناس مشاهدة المباراة والتى تجري محاولات خجولة لتلفزتها.
• وقد بدأ ان تلفزة المباراة في هذه الظروف قريبا من المستحيل – في ظل العروض والمفاوضات التى نسمع بها.
• في فرقة كبيرة.
• عشان كدا ما عندك حل غير اني انقل ليكم المباراة في هذا العمود.
• انقلها ليكم حتى قبل ان تبدأ.
• في زول عاوز مني حاجة.
• الما بشوف من (الغربال) يبقى اعمي.
• اعود الى استديوهاتنا الخارجية مباراة الهلال وفايبيرز وأنا اتحدث بدأ عن روزان لنقل صورة حية عن مدرب الهلال.
• روزان بوضعه هذا احس انه يرهق الذين حوله كثيرا – لأنه مدرب عاوز أي حاجة تكون مية المية.
• اذا شعر المدير الفني للهلال روزان ان طموحات الذين حوله قلت سوف يرحل …هو رجل في قمة الطموح.
• رحل روزان من المغرب التطواني لأنه وجد ان الفريق المغربي بدون طموح …وليس هناك شيئا شجعه على تدريب الهلال اكثر من الطموحات التى وجدها عند المجلس وعند اللاعبين وشعر بها عند الجمهور والاعلام الهلالي.
• لذلك حافظوا على طموحاتكم وابقوا بها في عنان السماء فان لكم موعد لن يتأخر بإذن الله وتوفيقه مع الاميرة السمراء – البطولة الافريقية.
• نمتلك الآن الامكانيات الفنية والادارية التى تعرف ان تحقق طموحات الجماهير.
• نمتلك فريق كرة (محترم) ، كلما جاءت سيرته سألنا الله ان يحفظه وان يبعد عنه العوارض.
• فريق ما شاءالله.
• اما اعظم ما نملكه ، وما نراهن عليه هو جمهور الهلال .. واظن ان فريق يمتلك جمهور مثل جمهور الهلال سوف يطال (الثريا) وان طال السفر.
• انتقل الى الشخصية الثانية والذي يبدو واضحا ان المدير الفني للهلال الصربي روزان سعيد معه وفخور.
• ذلك الشخص هو محمد أحمد بشه ..القريب من اللاعبين ، وقريب كذلك من المدير الفني للهلال ، لذلك هو حلقة وصل جيدة بين الطريفين.
• غير ذلك فان بشه يمتلك (فكر) تدريبي جديد ..وقد دعّم بشه ذلك الفكر بالدراسة والتطوير المستمر.
• بشه يترجم للمدرب الصربي الى جانب عمله كمحلل فني..وبشه زول لغته الرسمية (كرة القدم) لذلك عنده قدرة على توصيل اللغة للاعبين.
• بشه اصلا ومنذ ان كان لاعبا يمتلك عين فاحصة ، وهو افضل من يقرأ الخصوم وأحسن من يكشف قيمة اللاعب.
• ادخل على اللاعبين واتحدث عن نزار حامد – والذي يجد اشادة من كافة افراد البعثة بانضباطه والتزامه وبتألقه هذه الايام بصورة كبيرة ، جعلت مدرب الفريق يعتمد عليه بشكل كبير في مباراة اليوم.
• الراجح ان نزار حامد سوف يكون له دور في مباراة اليوم الى جانب الشغيل وابوعاقلة في وسط الهلال – ثلاثتهم في هذه الفترة يقدموا افضل مستوياتهم.
• الشغيل عاد اكثر نشاطا وفعالية وايجابية ..وارتفع ايقاعه بصورة كبيرة واستطاع ان يفرض نفسه بشكل كبير في وسط الهلال رغم المنافسة الكبيرة في الوسط.
• اعود الى نزار حامد واقول انه يجد دعم من الجميع – فهو لاعب محبوب له كلمته وشخصيته بين اللاعبين ، اكتسبها باحترامه لنفسه.
• نزار حامد قيمة – تابعوه اليوم سوف تحدث الكثير.
• لاعب اخر يقدم فصول من الروعة اطرب فاكتوريا وارقصها كما اشرت لذلك وهو اللاعب جيسي.
• جيسي يقدم في (السحر) الهلال مع الايام – وان لم يبدأ به مدرب الفريق اليوم في التشكيلة الاساسية.
• اتفاق اخر في البعثة عامة وفي الجهاز الفني خصوصا حول اللاعب عيد مقدم صاحب السرعة الفائقة والذي غالبا ما يبدأ به المدير الفني للهلال تشكيلته الهجومية في مباراة اليوم.
• اتوقع ان يفعلها عيد مقدم.
• انتظروا هدف من عيد.
• يا جماعة قلت ليكم قبيل ان بنقل ليكم في المباراة.
• يعني تفتكروا كمبالا دي مشينا ليها عشان (الصور).
• والله كمبالا الايامات دي فيها (جو) …لو اعتمد عليه الهلال براهو يغلب تلاتة.
• والله (جو) ساكت نغلب.
• دا غير فكتوريا.
• الليلة فكتوريا ما فاضي ليها.
• نرجع ليها بعد المباراة ان شاء الله…وبعد الانتصار باذن الله وتوفيقه.
• وليد الشعلة ارتفع مستواه بصورة كبيرة ، وعاد الى وليد الهداف القناص.
• المهاجم فيني كومبي والذي سوف يكون المهاجم الثالث في مباراة اليوم مع عيد مقدم ووليد الشعلة…مهاجم خطير …انتظروه.
• تابعت فيني كومبي في تمارين الهلال ووجدت ان اللاعب يمتلك مهارات عالية ويتحرك بصورة جيدة …ينتظر كومبي الهدف الاول مع الهلال ليعلن انطلاقته التى لن يوقفه بعدها احد.
• صلاح عادل وبوجبا ومجاهد فاروق من اللاعبين الذين يقدموا اداء رائعا وان لم يشاركوا في مباراة اليوم كاساسيين.
• لكن اتاحة الفرصة لأي لاعب منهم الى جانب جيسي وعبدالرؤوف سوف تحدث الفارق.
• ترقبوا هذه الاسماء في الشوط الثاني.
• طبعا الغربال رغم عدم مشاركته في مباراة اليوم لكن للامانة اعطي تمارين الهلال متعة وروعة واثارة.
• الغربال لاعب كبير ، ومحترف فعلا …وجاء مع الهلال الى يوغندا رغم عدم مشاركته في المباراة.
• الغربال صاحب علاقة ممتازة مع كل اللاعبين …وهو يتعامل مع الجميع بادب واحترام.
• بالتوفيق للغربال في الهلال.
• اختم اخيرا ببشه الصغير …وهو لاعب مهول ..هناك كثيرون يظلونه ولا يعرفون قيمة بشه الصغير.
• بشه الصغير بعمل في حاجات مرات في تمرين الهلال (رونالدينو) ما قاعد يعملها.
• امكانيات بشه الصغير كبيرة ..وينتظر من هذا اللاعب ايضا الكثير.
• الله يوفق الهلال اليوم وينصره في المباراة باذن الله وتوفيقه.
متاريس
• غايتو الجو دا جو 3 / 1.
• شكلها كدا.
• نسأل الله التوفيق للهلال في مباراة اليوم.
• وان شاءالله منصورين.
• …
• ترس اخير : بكرة يوم اخر.

قد يعجبك أيضا
12 تعليقات
  1. Badreldin يقول

    التقيل قدام ياصحفي …فريق المحترفين من جنوب السودان ههههه.تاني هههههههه جنوب السودان اي والله من جنوب السودان ياراجل جنوب السودان فيهو محترفين دي حقيقه هههههههه

  2. صلاح يقول

    ولدنا أبو المستعار المندلاوي نيرانه مولعة، والحقد والحسد عاوزين يشقوا صلعته الماكنة شق، ولو ما أخاف الكضب وهو بكتب التعليق ده بكون خاتي جنبه حبوب الضغط والسكري، وما بعيد يكون الكومة قامت عليهو ووقع غمران 😝😝😝
    يكفي إنو الفريق ده بل الوصيف وشاتو برة دوري الأبطال من التمهيدي، يعني من قولة تيت، عشان كدة وعشان حسدكم وحقدكم ده بكرة الوصيف بياخد تلاتة حبات حنيزات حلوات 😆😆😆
    غايتو ود عبد الماجد ده بكتب كلام يرفع الضغط والسكري بتاع المرخرخين بالجد، عشان كدة عموده ما يحلي إلا مع فنجان جبنة !!
    زيدهم يا ود عبد الماجد وأحرق فشفاشهم بكرة بوصف مفصل عن مجريات مباراة الفوز على قاهر الوصيف الواهن الضعيف، وإتغزل لينا في اللاعبين وإمكانياتهم، حتي ميدو المالعب برضو إتغزل فيهو، وميدو ده ضروري تركز عليهو، عشان بحلول نهاية العام السكري بتاع ولدنا أبو المستعار المندلاوي يكون عمل سبعة صلايب، والكاهن الأعظم أليخماو يكون خلي الكهنتة وجن 😂😂😂
    موووووت بي غيظك يا أبو المستعار !!

  3. Badreldin يقول

    صلعه شفتها وىن الحمدلله الشعر العندي هلالك كلو ماعندو بأمفلس فرحان عشان فريقك فاز علي فريق المحترفين من جنوب السودان ههههه أو هههههه

  4. Badreldin يقول

    بعدين نحن بليناك أنت بي ساروخ السماني ..قال ود عبد الماجد صوتو زي الحريم.خلي يتكلم زي الرجال أول والله خلي يمشي لى دكتور مزمل أتعلم . أبو الأصفار.. غسيل الأموال وفض الاعتصام

  5. Hajjam يقول

    ابو المستعار الامريكي ياابوصلاح وصل مرحلة متاخرة من ادمان مخدر اليخماو. دائما منتظر عمود ود عبدالماجد بفارغ الصبر عشان يردمه بالدراب التقيل. والغريبة عاوز ود عبد الماجد المعلم يتعلم من اليخماو مزمز ابو الاحقاد. غايتو اليخماو صنفو عجيب.

  6. Hajjam يقول

    شوف الهلوسة في تعليقاته واخطائه الاملائية. ساروخ ده شنو؟. انقليزي يامرسي؟؟بعدين شوف الانحطاط قال صوته زي الحريم. !!!! في انحطاط اكثر من كده يامرمطون البيتزا؟

  7. Badreldin يقول

    صاروخ Rocket كده كويس امكن تكون محسي والله دنقلاوي.يامفلس يانازحين للعاصمه.صاررررررروخ.السماني كده كويس.والله.اكتب ليك كويسه.بعدين أنا أكلي أكل سوداني.البيتزاء.انت مشتهيها.انت.ياسوءباطي غسيل الأموال وفض الاعتصام

  8. Badreldin يقول

    صاروخ Rocket كده كويس امكن تكون محسي والله دنقلاوي.يامفلس يانازحين للعاصمه.صاررررررروخ.السماني كده كويس.والله.اكتب ليك كويسه.بعدين أنا أكلي أكل سوداني.البيتزاء.انت مشتهيها.انت.ياسوءباطي غسيل الأموال وفض الاعتصام .متخفي في الهلال ليك.يوم الازم مآل الشعب يرجع

  9. Badreldin يقول

    صاروخ Rocket كده كويس امكن تكون من الرطانه ي يا مفلس يانازحين للعاصمه.صاررررررروخ.السماني كده كويس.والله.اكتب ليك كويسه.بعدين أنا أكلي أكل سوداني.البيتزاء.انت مشتهيها.انت.ياسوءباطي غسيل الأموال وفض الاعتصام .متخفي في الهلال ليك.يوم الازم مآل الشعب يرجع

  10. محمد ابراهيم يقول

    يحلكم الحل بله من القيد وال…………………..

    ارجوا الراجيكم يا تمهيداب …………………….

    امعط الحمام ………….

    ……………………… حجرم …………………

  11. Hajjam يقول

    ابو المستعار الامريكي علق ياابو صلاح. الحق شوفوا ليهو مستشفي نفسية. 🤣🤣🤣

  12. صلاح يقول

    ده ولدنا أبو المستعار المندلاوي أبو الهول زااااتو يا هجام، والغلطات الإملائية دي تكتيكات منه عشان يتخفى بيها، بس نحنا المسخوط بنعرفه وما بيغبانا مش لو بقي أمريكي، ولو ركب مكنة بنغالي بنعرفه 😆😆😆 أمررررررق مرق جلدك يا أبو المستعار !!

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد