الهلال محور الأحداث….!!

سوبر هاتريك
طارق محمد عبد الله
الهلال محور الأحداث….!!
& اول حاجة صباح الخير عليكم جت وكل الامنيات الطيبة تصبح واقع معاش وياهلالاب ياحلوين ان شاء الله سالمين وتأمين ،اهو وبرغم الحاصل في البلد شوية بأخبار وتفاصيل ابو الهل متصبرين ،بصراحة كل السودانيين الجوه البلد والبره قاعدين للوطن المفقود مشتاقين والسؤال ياربي حيرجع لينا تااااااني متين ؟؟؟ يوم يومين ،اسبوع اسبوعين ،شهر شهرين ،سنة سنتين؟؟؟؟والله ماعارفين لكن خليكم واثقين و متأكدين انو حيرجع باذن رب العالمين كما نود ونشتهي ..وطن عاتي وطن خير ديمقراطي ودمتم سالمين باذن رب العالمين .
& وتاني حاجة تعدد وتشعب خيارات معسكر هلال الأمة ما بين ليبيا والسعودية وتنزانيا ورواندا تؤكد أمرا واحدا ان الهلال وبالرغم من ما يحاول البعض تصديره بأنه ودع دوري الأبطال في نسخته الحالية مازال متمسك بالأمل وينشد التاهل لربع النهائي ولم ولن يرمى المنديل وتعدد الخيارات بالنسبة للمعسكر قطعا يمنح المدرب فلوران ود ام فلوران مساحات أوسع لاختيار الوجهة الأنسب بحسب الحاجة الفنية الفي راسو شخشيا وطالما العيش بيد خبازه فلوران مورينهو القارة السمراء اكل نصو ما اكل منو حاجة المهم المجلس أداهو الفرصة كاملة وماقصر معاهو كلو كلو وماهسه الحساب في نهاية الموسم القادم بعد أن يكون الكنغولي قد أكمل عامه الثالث مع الأزرق باذن الله .
& وتالت حاجة نحمد لمجلس إدارة نادي الهلال انه قفل باب دعوة الدورة الودية الدولية والتي قدمت له من الإمارات بالضبة والمفتاح وبالجد الحته دي كانت حقيقة حتجيب الريح والهوا واعتقد بان المجلس تعامل مع الأمر بحكمة وحزم وحسم وفقا للمثل (الباب البجيب الريح سدو واستريح) وفعلا سداهو واستراح بما يتسق مع معتقدات وموروثات وعادات وتقاليد وأخلاقيات ناد الحركة الوطنية والديمقراطية بالبلاد ،قلناها مائة مرة ولن نمل التكرار الهلال محور احداث الرياضة السودانية والتي تدور في فلكه وادناه نوريكم كيف …؟؟؟
& ورابع حاجة نوريكم كيف الهلال محور الأحداث عندما يفوز تتلون الدنيا بفرحة وسعادة ٩٠% من الشعب السوداني وعندما يخسر تسعد النسبة الباقية ،ومن جانب اخر تجيهو دعوة من الإمارات تقوم الدنيا ويدخل الجميع في حالة شد وجذب وترقب إلى أن رفضها ،وعندما يفكر المجلس في جغرافية مكان معسكره الإعدادي للمرحلة الجاية يبدأ التفكير أولا باثيوبيا وسريع تجي دعوة من هلالاب ليبيا وتدخل رواندا على الخط و امبارح القريبة دي تخش السعودية كخيار رابع شفتوا كيف …؟؟؟
اهداف سريعة..اهداف سريعة
& أعتقد بأن الكتيبة الهلالية بها العديد من الطاقات الكامنة التي لم تتفجر بعد ممثلة في عدد من اللاعبين .
& وعلى سبيل المثال فإن الثنائي جوناثان،وبوسو حتى الآن لم يقدما ربع مايملكان من إمكانيات فنية للازرق .
& فصبرا جميلا يا اهلة على فلوران ود ام فلوران مورينهو القارة السمراء وكتيبته الزرقاء لأنها ببساطة لم تقدم أفضل ما عندها بعد .
& لابد لنا من الإشادة والتقدير بالمجهودات الكبيرة التي ظل يقدمها الشاب المثابر نائب رئيس القطاع الرياضي عوض طاره .
& الطبيب الهلالابي السوداني ولد البلد، الإنسان الراقي يوسف الخير الشفيف العفيف والذي تكفل بعملية وإعاشة ارنق بالسعودية .
& ظل واجهة سودانية هلالية مشرفة ومطر عافية اينما وقع نفع متعك الله بالصحة والعافية طبيبنا الفخيم المميز يوسف الخير.
& والحق يقال فان طبيب نادي الهلال السابق ظل نموذجا مشرفا أينما حل في أمريكا وتايوان وأخيرا بالسعودية لله درك أيها الجميل الرائع.
& ازرق وابيض لون الفل هلال القمة حبيب الكل .
& ويظل الهلال الرقم الصحيح بالكرة السودانية وغيره الكسور والبواقي .
& وياهلالنا يافخر الوطن تسلم انت من الألم والجراحات والنزيف.
& وأخيرا احمد الله كثيرا انني حي ازرق .