بقينا نلقط فيها نقطة نقطة ..زي المغترب البيبني في البيت
صابنها
محمد عبد الماجد
بقينا نلقط فيها نقطة نقطة ..زي المغترب البيبني في البيت
• في (مغترب) بسافر وبطلع من البلد ، وبتحمّل (الغربة) ، وبمر بظروف صعبة ، عشان يسوي ليه (بيت).
• اول ما يبني (البيت) بيرجع.
• البيت مرات بكون (مروحة) ما ركبها فيه.
• بيجي راجع.
• اول ما يوفر حق السيخ والطوب والاسمنت ويجهّز الابواب والشبابيك بيرجع البلد.
• السودان دا بي كهربتو القاطعة دي ما بتفات.
• السودان جميل.
• السودان رائع.
• و(المغتربين) ما طلعوا إلّا عشان يعمروا البلد دي.
• عندنا زول (مغترب) كاتلو الشوق للبلد – كل مرة بضرب لينا وبرسل لينا في (الواتس) وبقول لينا : والله اشتهيت كهربتكم القاطعة ذاتها.
• اتخيلوا زول يشتهي (الكهربة القاطعة) – ونحن هنا عملت لينا حراق روح.
• زولنا دا بقول لينا والله نحن هنا بنشتهي الكهربة تقطع عشان نتذكر السودان.
• في سنة 2007 سافرت مع الهلال الى قطر – الهلال سافر من اجل اقامة معسكر مقفول في قطر.
• في هذا الموسم اتذكر جيد ان الهلال كان قد سجل علاءالدين يوسف ، واتذكر كذلك ان الهلال سجل اكرم الهادي سليم تحت السن – سمعنا بهذا الخبر ونحن في قطر.
• المريخ كان قد سجل نصرالدين الشغيل …واتذكر ان منقستو وقتها ونحن في قطر قد اشاد بالشغيل …وتمناه في الهلال.
• السنوات مرت – وانتقل الشغيل للهلال في 2012م.
• هسع دا ما موضوعنا.
• مالكم عاوزين تطيروا مني الكلام.
• انا كنت بتكلم في شنو؟
• اتذكرت – كنت بتكلم عن (المغترب)…والاحساس بالغربة.
• الهلال في قطر رئيس البعثة كان عبدالملك الطاش رحمة الله عليه وكان ريكاردو هو المدير الفني وكان كلتشي وقودوين في الهلال.
• لمن وصلنا قطر اول حاجة عملتها اتذكر اني مشيت احد الاسواق في الدوحة اسأل عن شريط كاسيت للفنان ابوعبيدة حسن اسمه (عقد الجواهر).
• هذا الشريط في السودان ما لقيتو – لقيتو في قطر …مع شرايط نادرة اخرى للنعام آدم وصديق احمد وعبدالرحمن عبدالله وصديق عباس.
• احد الزملاء الذين كانوا معي في الرحلة شافنا اشتريت شريط (ابوعبيدة حسن) ، قام قال لي هي (غربة من متين؟).
• انت ليك (48) ساعة في قطر اشتريت (ابوعبيدة حسن) ، لو قعدت اسبوع تعمل شنو؟ تشتري شريط (محمد جبارة)…شوفوا الزمن يا يمة ساقني بعيد خلاص.
• ما عاوز اقول ليكم احساس الغربة صعب كيف؟
• حالتو كنا مع الهلال.
• والله غربة بدون الهلال ما عارفة تمر كيف؟
• أنا كنت بقول في شنو؟
• الزول مع قطوعات الكهربة دي – الكلام بقى يطير من رأسو.
• انتوا في علاقة بين الزهايمر وقطوعات الكهرباء.
• ما عارف ليه شاعر زي الفي علاقة بين القطوعات والزهايمر.
• والله وقت الكهربة تقطع – الموبايل ما بعرف وضعتو وين؟
• عندنا قريبنا سافر لندن …قلنا ليه عليك الله كتر لينا في (السيلفي) و (نو تزن).
• عاوز اقول ليكم المغترب بطلع من البلد دي وهو عندو هدف.
• يعني الهجرة دي ما ساكت.
• العاوز يتم البيت.
• والعاوز يشتري ليه قطعة ارض.
• والعاوز يعمل ليه حواشة.
• والعاوز يعرس.
• في مغترب تلقاه (الغربة) كلها يلقط في (شيلة) العرس.
• اول ما الشيلة تتم بيجي راجع البلد.
• وفي مغترب بعملها كلها (كوتشينة).
• اول ما (ينزل) تاني ما برجع.
• ما عارف لو فتح يعمل شنو؟
• طبعا زمان الزول (المغترب) دا بكون زول منقاه.
• زول مختلف.
• طبعو.
• وثقافتو مختلفة.
• زول مختلف في كل شيء.
• شيء انجليزي وشيء فرنسي.
• ما زي هسع – الاغتراب بقى أي كلام.
• والله من الاغتراب بقى في (ليبيا) – المغترب وضعو اتبهدل.
• والاغتراب فقد قيمتو.
• زمان المغترب دا ما بتشوفو إلّا في العيد.
• الحلة بكون فيها (مغترب) بكون فيها كهربة ومدرسة ومركز صحي.
• والله يا جماعة (المغتربين) ديل شالوا البلد في اصعب الاوقات.
• عشان كدا هسع الدولة مهما تعمل ما بترد ليهم دينهم.
• اتغربوا..وعمروا البلد.
• الناس ديل فاتحين بيوت.
• علموا.
• ودرسوا.
• وسفروا.
• وعرسوا لإخوانهم وأخواتهم.
• واصلو ما قصروا.
• هسع الكلام دا مناسبتو شنو؟
• والله انتوا إلّا يقولوا ليكم الكلام عديل.
• إلّا يقولوا ليكم (المناسبة) كدا بالاسم.
• براكم اصلو ما بتصلو لي نتيجة.
• يا جماعة هسع الهلال دا ما بقى لينا زي (المغترب).
• الهلال بقى يلقط فيها نقطة …نقطة.
• الهلال تقول عاوز يدخل كلية الطب.
• دا كلو عشان نتأهل من المجموعات.
• والله البشوف هزائم المريخ بتهون عليه تعادلات الهلال.
• معقولة المريخ (10) اهداف في (4) مباريات.
• انتوا (التازي) دا بعمل في شنو؟
• لكن عشان اكون معاكم صريح.
• وواضح.
• وعشان احددها معاكم.
• استقبال (التازي) بهذه الصورة اسوأ من هزائم المريخ بالاربعة والتلاتات.
• المريخ بقى زي (ترمسة) الشاي في البكا.
• أي زول يضغطها بتكب ليه شاي.
• اصلو ما بتقطع.
• نمشي على الهلال.
• نحن يمكن زعلانين.
• اداء الهلال غير مقنع.
• يمكن.
• لكن يا جماعة ما في حاجة بتزعل.
• ما في حاجة بتبقى بين يوم وليلة.
• اصبروا.
• انتوا لغاية الآن في المنافسة.
• حظوظكم هي الاكبر.
• الهلال هو التاني.
• المواجهات المباشرة مع بلوزداد في صالح الهلال.
• وممكن تكون في صالح الهلال مع مازيمبي …في حالة الفوز او التعادل الايجابي.
• المهم يا جماعة …عاوز اقول ليكم شيء مهمة.
• اسمعوها مني.
• عشان الشيء دي ما بتلقوها في حتة تانية.
• ولا في زول ح يقولها ليكم.
• الهلال لغاية الآن صعوده في يدو.
• يعني لغاية الآن ما منتظرين لينا هدية من فريق اخر.
• ننتصر بنصعد.
• فوز وتعادل ممكن الهلال يتأهل.
• الهلال اذا حقق الفوز في المباراتين …(شكرا جميلا) – ما بنعاين لي نتيجة تانية.
• ما اريد ان اقوله في هذه المساحة …يا جماعة كان الهلال ممكن ينتصر في المباراة الثانية على مازيمبي في الخرطوم.
• لكن ما معنى هذا الانتصار لو بلوزداد كان انتصر على صن دوانز.
• الهلال كان ممكن ينتصر على بلوزداد في ام درمان.
• لكن برضو ما في فائدة لهذا الانتصار ….اذا مازيمبي كان انتصر على صن دوانز في الكنغو او في جنوب افريقيا.
• عشان كدا مفروض انتوا تحمدوا الله.
• كان يمكن الهلال يكون الآن عنده 7 نقاط …لكن برضو محتاج عشان يتأهل ينتصر في اخر جولتين.
• ممكن يكون عندك 3 نقاط او 5 او 6 او 7 ومحتاج للانتصار في الجولات الاخيرة حتى تنتصر.
• عشان كدا ما تعاينوا للنقاط.
• انظروا الهلال عاوز شنو؟
• في الموسم الماضي وقبل الجولة الاخيرة الهلال كان عندو 9 نقاط.
• وكان الهلال في حاجة للانتصار على الاهلي المصري ليصل للنقطة 12 عشان يتأهل.
• وصلنا للنقطة 10 والهلال لم يتأهل.
• استفدنا شنو؟
• خلوها النقاط.
• الهلال في الموسم الماضي جمع 10 نقاط – هل الهلال وقتها كان مقنع؟
• انا شايف الهلال الذي يملك الآن 3 نقاط ..مقنع اكتر من الهلال في الموسم الماضي.
• عندنا 3 نقاط ممكن نصل الى 9 نقاط.
• وممكن يكون عندنا 7 نقاط ونتأهل.
• عشان كدا ما تقعدوا تحبطوا في الناس ساكت.
• ما تشتموا اللاعبين.
• ما تلعنوا ليكم حاجة.
• اعملوا من اجل التأهل.
• الفرصة في ايدكم.
• والملعب هو الفيصل.
• والهلال قادر على التأهل ان شاءالله.
• ما في حاجة فاتت.
• الزمالك اتعادل وخسر في ارضو …ولغاية الآن براهن على التأهل.
• الاهلي المصري اتعادل في ارضه ..وفرص في التأهل الآن كبيرة.
• قادر الهلال على العودة.
• وقادر ان شاءالله على الانتصار على صن دواتز ومازيمبي.
• أي زول ما عندو ثقة في الحتة دي يبعد من الهلال.
• ويخلي الهلال للناس العندهم فيه ثقة.
• نحن ح نظل نحارب ونحاول ونعمل ونجتهد لاخر لحظة.
• اصلو ما في حاجة فاتت.
• العنوان الفو قدا – كاتبوا بس عشان اجيب بيه المريخاب.
• لسه (التازي) عندنا كلام كتير عنو.
• اصبروا بس.
متاريس
• هل هناك اعظم من ان الهلال تم اختيار 12 لاعبا منه للمنتخب الاول.
• يا اخونا هي (الروعة) دي كيف؟
• ما في (وطنية) اعظم من هذا.
• هذا الاختيار يؤكد عظمة الهلال وقدرته على التأهل ان شاءالله.
• الاصوات المحبطة ..مفروض تسكت في هذا التوقيت.
• خلوا الهلال لاصحاب الثقة.
• نحن ما بنقيف.
• ولا بنقعد.
• نحن ماشيين طوالي.
• ……………..
• ترس اخير : تقوموا للزول نفسو!!
