بيت البكا بي وين؟

صابنها

محمد عبدالماجد

بيت البكا بي وين؟

• الما شاف ضربة مصنع الشفاء …يشوف تسجيل (الغربال) في الهلال.
• انا قلت الحاصل شنو؟
• الفيس كلو بكا.
• قلت معركة كررى رجعت تاني.
• نفضت عيوني متل (الملايات).
• قلت يا ربي عرفو الزول الامر بفض الاعتصام؟
• الفيس من البكا لو عملت (لايك) ساكت …تنزل (دمعة).
• فيضان السوباط قالوا ضرب (الواتساب).
• ناس المريخ في القروبات – شوف عيني دي …قالوا عاوزين ليهم خيش وجوالات وخيم.
• الخيش والجوالات عرفناها.
• الخيم لي شنو؟
• ركبنا لينا (لوري) لا فيه جاز ولا جازولين.
• ماشي بالبركة.
• ماشي ساي.
• لوري بدون (لساتك) ومن غير (سواق)…وما فيه لا نور لا فرامل.
• ماشي كيف؟
• ما تسألوني.
• ما بحب الاسئلة (التعسفية).
• غايتو جازفنا وركبنا في اللوري متل (جداد الخلا).
• علينا (غباشة) انا عمري ما شفت متلها.
• ركبنا (اللوري) وقلنا نمشي (بيت البكا).
• نمشي نعزي.
• ما صاح كدا.
• الجماعة ديل وقت شافوا صورة الغربال مع الطاهر يونس ونزار عوض مالك – طقوا الكواريك.
• نحن قلنا في شنو؟
• دي (ترامب) ما عملها.
• اول مرة اشوف لي (رئيس دولة) بتعاور كدا.
• كنت فاكر عوارة الرؤساء دي عندنا برانا.
• اتاريها بتحصل في ارقي العائلات.
• بتحصل في امريكا ذاتها.
• والله تاني مفروض ما في زول يلوم عمر البشير.
• هسع الكلام بتاع ترامب دا ما في داعي ليه.
• خلونا في (غربالنا).
• قررنا نمشي البكا.
• نمشي نشوف الكواريك دي وين؟
• نقيف مع الجماعة ديل شوية.
• ما صاح نخليهم كدا.
• مشينا شوية …قلنا احسن نسأل.
• سألنا من بيت البكا وين؟
• تلقائيا كدا.
• ومن غير أي مقدمات.
• أي بيت بكا ..بتلقى قدامو عربات.
• وفيه نسوان يدخلن ويمرقن.
• بدون موضوع كدا.
• وقدام البيت في (موية) مدفقة.
• وشفع ما بسمعو الكلام.
• الشفع الما بيسمعو الكلام من (جلحاتهم) بيظهرو.
• الرأس القوي ظاهر…تلقاه كلو (جلحات).
• البيت بتاع البكا غالبا بكون ما فيه (رغيف).
• لقينا لينا (شفع) اخرين متل (جداول الضرب) …مجدعين في الشارع متل الكبابي …قلنا ليهم ها عوين ها بيت البكا وين؟
• قالوا لينا بكا منو؟
• قلنا ليهم معقولة ما عارفين ؟ بكا المريخاب.
• انا عمري ما شفت المريخاب في هذا الوضع.
• اصلو ما شفتهم في الحالة دي.
• جرسة زي دي ما قابلتنا.
• حالة متل دي ما صادفتني.
• انتوا يا مريخاب تعالوا نسألكم…الغربال دا اصلا ولد منو؟
• ولد الهلال!!
• طيب مالكم.
• بتجرسوا على شنو؟
• الغربال دا انتقل للهلال من وين؟
• من البرج الجزائري.
• طيب انتوا ما لكم يا مريخاب؟
• الدخلكم شنو في الموضوع؟
• ولدنا ورجع لينا.
• الحارق رزكم شنو؟
• الغربال دا لعب في الهلال 8 سنوات.
• جبناه من بيت المال وعمرو اقل من 16 سنة.
• قعد في الهلال 8 سنوات.
• جاء المريخ سجله وهو عمره اقل من 24 سنة.
• سميناه جكسا …لقب اعظم لاعب في تاريخ الهلال.
• ولقبناه الغربال.
• وميدو.
• وما خلينا ليه شيء.
• وانتوا بعد دا كله سجلتوه.
• لقيتوه جاهز.
• نحن في الوقت داك ما عملنا عمائلكم دي.
• اعتبرنا الموضوع عادي.
• وتقبلنا الامر.
• انتوا هسع مالكم؟
• انتوا بعتوا الغربال وقبضتوا الثمن من الفريق الجزائري.
• اخذتوا حقكم على دائر المليم.
• بالدولار.
• هسع الموضوع ليه بقى ليكم حار؟
• ليه بقى ليكم صعب؟
• الولد رجع بيتو.
• الغربال مشى اهلو.
• انتوا في شنو؟
• انتوا ابوعشرين (لون الدم) حارسكم الاول وحارس المنتخب الاساسي ما قدرتوا تحافظوا عليه.
• ابوعشرين احسن حارس في افريقيا ذاتها ما حافظتوا عليه.
• عاوزين تحافظوا على لاعب البرج الجزائري.
• انتوا مالكم ومال الجزائر؟ …عشان تعملوا الجرسة دي كلها.
• اثبتوا.
• اصبروا.
• ما كدا.
• ألعنوا الشيطان.
• اركزوا.
• جرسة الزول الماكل (كمونية) و (عدس) كتير ..ما حلوه.
• تضربوا في (الكمونية)..وتجوا في اخر يوم في التسجيلات تتجرسوا.
• انا قبيل كنت بقول ليكم في شنو؟
• اتذكرت.
• كنت بقول ليكم …ركبنا لينا لوري ومشينا على بيت البكا.
• والله طيرتوا (اللوري) من رأسي.
• اول ما وصلنا …وقفنا اللوري بعيد …عشان ما تجي عربية تقفلنا.
• نزلنا من اللوري ومشينا على ناس البكا.
• كل واحد فينا لابس جلابية ابوه.
• نخوجل بالجلاليب متل المفتاح في العلاقة.
• لقينا ليك مزمل دا في حالة صعبة.
• مرة يقول عقدو ما تفسخ.
• ومرة يقول الغربال وقع في 3 عقود.
• ومرة يقول ما كدا.
• ومرة يقول كلو من السوباط.
• ومرة يقول لا من سوداكال.
• ومرة يقول جيبوا لي جمال الوالي.
• سوداكال الجماعة ديل ما بقدر عليهم.
• مزمل ما عارف يقول شنو؟
• غايتو حالتو كانت صعبة.
• الناس بتقول ليه يا مزمل اثبت.
• يا مزمل ما كدا.
• يا مزمل العن الشيطان.
• ومزمل يقول خلوني يا جماعة …سيبوني بس.
• سبناه.
• مشينا على معاوية الجاك.
• لقينا ليك معاوية الجاك شغال تحنيس قي (التش).
• التش باقى ليه سنة.
• وبحنسوا فيه.
• التش دفعوا ليه 50 مليار.
• وبحنسوا فيه.
• جمال الوالي يضرب.
• رابطة المريخ في قطر يضربوا.
• في الامارات.
• في البحرين.
• الحالة صعبة.
• يا التش لا.
• يا التش عليك الله.
• يا التش نحن بقى ما فينا حيل.
• يا التش لا.
• الغربال وقع.
• معاوية الجاك قال ليهم جيبوا لي عزام عادل.
• سجلوا عمار طيفور.
• اعملوا أي حاجة عشان ما ننزل الوسيط.
• غايتو يا معاوية الجاك زمان كنت عارفك بتشجع برشلونة.
• وبتسمع وردي.
• ومحمد النصري.
• هسع بقى اقصى مدى عندك يسجلوا ليك (كرنقو).
• حليل زمن وارغو بـ 3 مليون دولار.
• زمن الحضري.
• والنفطي.
• ايام ما كنتوا بتسجلوا هيثم مصطفى.
• وبكرى المدينة.
• والغربال.
• هسع بقيتوا تفرحوا بي كرنقو …الذي سجله المريخ سنة 2011 في اديس ابابا.
• انتوا قاعدين تنسوا.
• بالمناسبة بكرة ان شاء الله نكتب ليكم عن تسجيلات المريخ.
• تسجيلات المريخ السنة دي محبطة.
• فيها حاجات عجيبة.
• قبل ما نطلع من البكا قلنا وين هيثم كابو.
• كابو السنة كلها يتفاصح.
• جيبوا لينا كابو ..عشان نعزيه.
• قالوا لينا كابو حالتو صعبة ..كابو جوة ما قادر يقابل الناس.
• قلنا ليهم كابو ما بعمل كدا.
• كابو راكز.
• الزول دا في ميدان الاعتصام كان ثابت.
• في المعتقل كان راكز.
• معقول يجرسو تسجيل (الغربال) في الهلال؟
• …………….
متاريس
• اتمنى ان يكمل الهلال كل ملفاته الخاصة والداخلية.
• ما عاوزين ازعاج كتير.
• انطلقوا الى المحطة القادمة.
• ناس المريخ خلوهم في جرستهم دي.
• الناس ديل الجرسة دي ما بمرقوا منها قريب.
• المنتخب اليوم يلعب امام غانا رغم قوة المنتخب الغاني نتوقع ان شاء الله انتصار المنتخب.
• منتخب فيه ابوعشرين والغربال وابوعاقلة ووضاح ….ما في خوف عليه.
• ارضية استاد الهلال سوف تظهر الى الناس اليوم بحلتها الزاهية.
• الارضية لم تصل الى المرحلة النهائية بعد.
• لسه حسب كلام مجدي سنتر والمختصين في لجنة الصيانة والتأهيل وصلت لمرحلة 70 %.
• لجنة عضوية الهلال شغالة صاح.
• يقابلوكم بتباشيرهم والقهوة والشاي وعضوية الهلال.
• تاني في اكتر من كدا شنو؟
• أي حاجة في الهلال ماشه زي الساعة.
• نحمد الله ونشكر فضله.
• اللهم احفظ الهلال.
• وابقى عليه دائما في الصدارة والمقدمة.
• …….
• ترس اخير : الغربال في البرد ما بنفع