مشاوير
حسن عبد الرحيم
اصبحنا واصبح الملك لله فتاح ياعليم رزاق يا كريم حي علي االصلاه حي الفلاح
قوموالي مدنيتكم،
في حوارممتد مع بنات افكاري وانا ما ببن اليقظه والاحلام استرسل في حوار مع تفتيحه مان عن وضعنا الرياضي الكروي والمدنيه فسالته
-يا تفتيحه مان : مدنية ولاعسكرية
-تفتيحه مان : مدنية طبعا محكومة ومربرطة بانضباط عسكري يعني شيل من ده خت علي ده
– طيب يا تفتيحه مان الرياضة، دخلها شنو بالمدنية
– تفتيحه مان : ااااايوه جيتني مدردق وانا بيني وبينك حالي ظاهر من زمان يامان ووضع الرياضة خلاني اغني ( اشكي وابكي لمين ياناس)
عموما المدنية الرياضية ترببة في الاساس وعشان ماتسالني كيف خليني اشرح ليك :
لما المدارس ترجع لعهدها الاول حكومية التكوين ومدنية الخدمات ابتداءا من مجانية التعليم ومجانية الكتاب والتطعيم والزي والمنهج والحب للوطن
– لمن نرجع لحصة التربية الوطنية ونشيد العلم وحصة التربية الزراعية والفنون وطبعا حصة التربية الرياضية
– لما ننقسم لمجموعات نلعب كرة قدم وطائرة وسلة ونضقل بالدومة وننوم مع كرة الشراب ونحلم بكدارة اديداس من الصدارة ونرجع دوري الفصول والمدارس والولايات
لما الدوله تهتم بكل الحاجات دي ومجانا دي بداية المدنية من المدارس.
– دي بس ياها المدنية ؟؟؟
– تفتيحه مان صبرا يبل الجوف ياصديقي ….
دي الابجديات دايرين نرجع زي زمان وياخوفي من زمان لما كنا نغني مع ام كلثوم قول للزمان ارجع يا زمان وكنتا فاكرو حكي لكن الله يجازي اللي كان السبب.
( كسره … هو انت من زمن ام كلثوم !!! زمن الدسدسه والغتغيت انتهي .. )
تفتيحه مان : شوف ياصديقي عايزين المدنية الاساسها :
-الاخلاق انما الامم الاخلاق مابقيت.
-الحب عشان اعز مكان بلدي السودان
-الوطنية يا بلدي ياحبوب
-الانتماء وكيف يكون الحال لو ما كنتا سوداني
-وحدة الوطن والانتماء وزي ماكنا بنغني ٣مارس عيد يوم وحدة السودان مافي شمال بلاجنوب ولاشرق بلاغرب وزي ما قال عباسية ( احححي يا – ولازلت احلم بعودة جنوبنا الحبيب – لعن الله الساسة ملعون ابوكي سياسة)
-التخصيصية واعطي العيش لخبازو….
يعني لمن نجيب وزير شباب ورياضة من رحم المنظومه لمن نفعل قصرالشباب والاطفال ولما نرجع لمراكز الشباب والساحة الشعبية وميدان عقرب والخليفة والليق ومهرجانات الشباب.
وخليني اديك زيادة انت عارف قصرالشباب كان فيهو شنو ؟ الاكروبات واتخرج منوالفنانين وجابو منوالحوت محمود عبزالعزيز والسمندل ومصطفي سيداحمد وناس عقدالجلاد وجنة الاطفال والجد شعبان وحكايات جحا ولاياعزوز… وياحليل وحليل وحليلوهو. قصر الشباب والاطفال والسينما والمسرح القومي والدهباية واكل عيش والنصف الحلو وهووهي والبعثات الاكروباتية للصين ومدارس كمبوني والدورات المدرسية الثقافية وياحليل المجد والسجانة وصالة الالعاب الرياضية ووليم اتدريا وماهرالبرت ورائدت الهلال
– المدنية الرياضية الشبابيه تعني الكشافه البحريه والجوية وطلائع مايو والكديت ومهرجانات الصوت والضو… ياااااااه
– المدنية تعني الحرية وابداء الراي وحرية الاختيار وعدالة التقسيم علي اسس الكفاءة
– ياصديقي نحنا ماعايزين وزير خريح فيزياء او عالم اثار لوزارة الشباب… وماعايزين جدي يبقي الوزير…
– نحنا عاوزين شباب وعايزين روح وعايزين وزير عشان يخطط وينفذ ماوزير عشان يسكت اوقريب فلان او تبع مجموعة فلان أوعلي مشارف شرفي اوالبكري اوحمد النيل (الله يرحمه).
– نحنا عايزين شباب ورياضة ما شباب مؤتمر وطني اومفوضية مسيسة او اتحادات ترضية.
– المدنية باختصار ياصديقي احترام المعلم والمدرس.
-عايزين كورسات وتاهيل عايزين معلم بمرتب يكفية للابداع…
– ياحليل المدرس القدوة ياحليل زمن الازهري المعلم وابوشرف الاستاذ
– المدنية تعني لبس الدمورية والرداء تاني وهيبة هدوم الثانوي العالي.
– المدنية دي حضارة وادب واخلاق
-ياصديقي الهم عصف ياااااااااه
– المدنيه تعني معهد التدريب المهني ومعهد القرش
– المدنية مجتمع وحليلو لماكنا نتلما في صينية الغداء وناكل التحلية رز بالكستر وننقرف القريب فروت ومن قشرو نعمل مربة وياحليل مشروب اللويزو والسكة حديد.
. -حليل اين تسهرهذاالمساء وحليل تلي ماتش وسندباد وياااااااه
– ياصديقي يبقي السؤال هل المدنية تعني شعب جديد ام ولادة قيصرية لشعب جديد بافكار مدنية ام شعب انابيب بأخلاق جديدة.
-ياصديقي : الدولة العميقة ما افراد الدولة العميقة هي افعال وافكار ومعتقدات ٣٠ سنة وأخلاق انتشرت وكما المفاعل الروسي … يااااااه
– المدنية باختصار ياصديقي تعني الاخلاق في زمن ارض النفاق وهل من اخلاق للبيع ام علي الدنيا السلام….
احلم الحلم مجاني …. بس الاخلاق والصراحة والشجاعة والكرم وانا سوداني مهرها غالي والشعب المعلم الثائر قادر يعيدنا لسيرتنا الاولي …
ودم الشهيد ما راح … دم الشهيد مهر لاخلاق جديدة وحب حقيقي ….
تفتيحة مان : احبكم كلكم من اول صرخة نضال .
– وسلااااام ياصاحبي
اخر المشاوير