صحيفة كورة سودانية الإلكترونية

(جلابية) ريكاردو في ابوحمد و(قميص) الشغيل في زيورخ!!

1٬916

صابنها

محمد عبدالماجد

(جلابية) ريكاردو في ابوحمد و(قميص) الشغيل في زيورخ!!

 

· مباراة الهلال في كاس السودان في دور الـ 16 امام الشرطة ابوحمد في مدينة ابوحمد اعطت الهلال (روح) جديدة ودوافع مختلفة.

· ناس ابوحمد ديل ملوا الهلال بركة ساكت.

· كان الهلال في حاجة الى هذه المباراة – ليقابل جماهيره بهذه التلقائية والعاطفة والعشق.

· الهلال بدون جماهيره يفقد كثيرا.

· لم يضر الهلال شيئا اكثر من حرمان الهلال من جماهيره.

· اتخيلوا الغربال بيلعب في حضور جمهور الهلال …الـ (17) هدف التى سجلها في الدوري الممتاز كان عملها (170) هدفا.

· سمؤال ميرغني اذا لعب في حضور جمهور الهلال كان بيبقى السمؤال واطهر الطاهر في نفس الوقت.

· سمؤال بيلبس (12)…اذا حضر جمهور الهلال الرقم دا ذاتو ممكن يبقى (21).

· يعني سمؤال ممكن يدخل في بوجبا.

· اظن ان جمهور الهلال في ابوحمد اعطى الهلال (دوافع) يمكن ان تكون ظهيره طوال هذا الموسم.

· لقد شحن لاعبي الهلال بروح جماهيرهم التى افتقدوا حضورها كثيرا في مباريات الهلال.

· اعرف ان جمهور الهلال يتابع فريقه الهلال بلهفة اكبر – مواقع التواصل الاجتماعي تمثل حراك هلالي خاص، لكن اقصد الحضور الجماهيري في المدرجات.

· جمهور الهلال في مواقع التواصل الاجتماعي بقوم بالواجب اكتر…ما قاعدين يقصروا في حاجة.

· في بطولة الامم الاوربية الحضور الجماهيري اعاد الحياة لكرة القدم …اعادة الروعة والمتعة في المستطيل الاخضر.

· الكورة بدون جمهور متل الملاح بدون ملح..ما بقولوا ليكم الجمهور ملح البطولات.

· انتوا فاكرين الكلام دا طالع من فراغ.

· يخيّل لي ان المستطيل الاخضر لا يعطي بسخاء ولا يكون مسرحا للإمتاع إلّا في حضور الجماهير في المدرجات.

· الكورة بتعرف.

· واللاعب ذاتو وقت المدرجات يكون فيها جمهور بعمل عجائب.

· اتمنى ان يعيد اتحاد كرة القدم السوداني مع السلطات والجهات المختصة الجماهير الى المدرجات.

· الاسابيع القالدمة للدوري الممتاز يفترض ان تكون بجمهور….خاصة ان المنتخب سوف يلعب في تصفيات كاس العالم وهو في حاجة للجمهور.

· الاندية السودانية سوف تلعب في البطولات الافريقية وهي ايضا في حاجة للجمهور.

· عشان كدا ..احسن جربوا عودة الجماهير في مباريات الدوري الممتاز.

· الدوري الممتاز اذا اعاد الى مبارياته (الجماهير) سوف يكون ممتعا.

· المدرجات في حاجة الى ان تعود لها الحياة من جديد.

· كل الدول من حولنا ..شاهدنا كيف سمحت بعودة الجماهير في ظل انحسار جائحة كورونا.

· لا بد من التعامل مع هذه الجائحة بدلا من الاكتفاء بالعزلة خوفا منها.

· الحياة فى السودان الآن عادت بصورة طبيعية …هناك زحام في الاسواق وفي المواصلات..لماذا لا تسمح السلطات بعودة الجماهير الى المدرجات؟

· المناسبات والحفلات الجماهيرية هي الاخرى عادت بصورة ممتازة في الفترة الاخيرة.

· جمهور الرياضة هو جمهور واعي وجمهور رياضي في المقام الاول – لذا عودته للمدرجات لا خوف منها.

· لقد شاهدنا المتعة كلها في مباراة الهلال والشرطة ابوحمد ..وقد كان السبب الرئيسي والأول في هذه المتعة هو الحضور الجماهيري الكبير الذي تابع مباراة الهلال.

· سليم بقى (نيمار) في وجود الجمهور.

· وعثمان مختار (ميسي).

· الجمهور مدهش.

· إلتقيت بسمؤال ميرغني وابوعاقلة ووليد الشعلة ووالي الدين خضر وعبدالرؤوف وموفق وسليم وعثمان ميسي وياسر مزمل بعد رحلة ابوحمد فوجدتهم في حالة من النشوة والانطلاق والحياة.

· كانوا سعداء برحلة ابوحمد …واظن ان خيرات مباراة ابوحمد قد انعكست حتى على مباراة الهلال امام الاهلي شندي.

· شاهد الناس فريق الهلال امام الاهلي شندي وهو يواصل في الامتاع والإبداع والتسجيل.

· فريق الاهلي شندي من الاندية التى تمتلك عناصر ممتازة – ومواهب صغيرة …لكن مع ذلك استطاع الهلال ان يفوز عليهم بالأربعة.

· الهلال حالة (ثقافية) وليس (رياضية) فقط.

· الهلال في الحقيبة.

· الهلال في السماء.

· في الاعياد …وفي كل مناسبتنا الدينية الجميلة.

· كل هذه الاشياء مرتبط توقيتها بالهلال.

· الهلال فن.

· ومدرسة.

· وونسة بن اتنين.

· وحوار وحياة في مواقع التواصل الاجتماعي.

· الهلال حركة.

· الهلال حياة.

· انظروا الى الموجة الثقافية التى احدثها الهلال في ابوحمد …وجماهير ابوحمد تمنح الهلال كل هذا الحب والعشق.

· طفل صغير يعسكر امام معسكر الهلال في ابوحمد.

· يخلي أي حاجة ويحرس المعسكر.

· ما في عشق اكتر من كدا.

· تذكرت الطفل الذي صعد اعلى بيتهم من اجل ان يرفع علم الهلال فتعرض لماس كهربائي افقده حياته.

· هذا الطفل كان في مهمة هلالية…كان فقط يريد ان يرفع علم الهلال.

· الاطفال كدا.

· الكبار كيف؟

· في ابوحمد …وكما كتب في هذا الموضوع كثيرا – لبس الجهاز الفني للهلال الجلابية.

· برتغالي بالجلابية السودانية.

· هذا الامر لا يمكن ان يحدث من جهاز فني برتغالي ..ان لم تكن هناك دوافع قوية جعلت الجهاز الفني للهلال يظهر بالجلابية السودانية.

· صورة ريكاردو بالجلابية تداولتها المواقع …وأشعلت مواقع التواصل الاجتماعي وعلق عليها حتى رئيس الهلال الفخري تركي آل الشيخ عبر صفحته في مواقع التواصل الاجتماعي.

· المدير الفني للهلال البرتغالي ريكاردو كتب عن السودان ودعا الناس الى زيارته وأعلن عن حبه الكبير لهذا الوطن العظيم.

· دي هي الرسالة المنتظرة من الرياضة.

· دي رسالة الهلال.

· ناس ابوحمد ..قدروا يوصلوا رسالة الهلال.

· المفارقة الغريبة تتمثل في ان الوقت الذي وضع فيه (قميص) نصرالدين الشغيل في متحف الفيفا في (زيورخ) ..ظهر ريكاردو بالجلابية في (ابوحمد).

· نوع دي بقول عنها المعلق الكبير الرشيد بدوي عبيد (ارسال طويل).

· شفتوا العولمة دي كيف؟

· جلابية ريكاردو في ابوحمد.

· وقميص الشغيل في زيورخ.

· تاني في شنو؟

· قالوا سمؤال بفكر يودي حذاءه متحف الفيفا.

· سمؤال مرة جاب ليه هدف في المريخ …الكورة ماشة 4 يوم ..عشان تصل شباك المريخ.

· غايتو في اليوم داك ..وقت سمؤال سدد تصويبته …مشيت اشرب ..وضربت لي تلفون …واخدت لي نومة ..وجاءت راجع للمباراة …والكورة ما وصلت المرمى.

· الجميل ان قميص الغربال ايضا وضع في متحف الفيفا في زيورخ.

· على كدا الفيفا ممكن تعمل لينا جناح في متحف الفيفا خاص بالهلال.

· حاجات الهلال في متحف الفيفا في زيورخ ..اكتر من حاجات الهلال في نادي الهلال في ام درمان.

· شفتوا العظمة.

· طبعا المريخاب الموضوع دا ممكن يضاقهم …يقوموا يعملوا ليهم (مسكول) لي زيورخ.

· ما عندكم اكتر من كدا.

· انتوا مفتاح سويسرا ما عارفنو كم؟

· يتخيل لي الحاجات دي ما ممكن تحدث لو ما الهلال.

· الهلال بجمع بهذه الامور في وقت واحد.

· هلال الحركة الوطنية.

· وهلال نادي الخيرجين الاوائل.

· انتوا فاكرين الكلام دا نحن بنقولها ليكم ساكت كدا.

· الكلام دا واقع معاش.

· بتشوفوه يحدث قدامكم.

· الطريف في الامر ان اعلام المريخ اتكلم عن شعار المنتخب الوطني …وقال الشعار ما ماركة.

· اها الشعار بي حالتو دي وضع منه قميص الشغيل في متحف زيورخ.

· حالتو دي ما اصلي.

متاريس

· نسأل الله الشفاء العاجل للاعلامي الكبير الرشيد بدوي عبيد …وان يعود من مصر وهو في افضل حالة.

· الوسط الرياضي عليه ان يقف مع الرشيد بدوي عبيد.

· اتحاد الكرة ودكتور كمال شداد وحسن برقو …عليهم الانتباه للرشيد بدوي عبيد.

· قدموا له الدعم الذي يستحق ..فقد كان الرشيد بدوي عبيد …الوسيلة الوحيدة التى تنقل بها مباريات كرة القدم في السودان.

· صوته كان بالنسبة لينا (صورة).

· كذلك نتمنى عاجل الشفاء والعودة السريعة للاعب القومي اكرم الهادي سليم.

· وفي انتظار عودة عمر صولين للملاعب ..بعد اجراء عملية في القاهرة وعاد الى البلاد.

· الاتحاد كان حاضر مع هذه الاسماء.

· وننتظر حضور الاتحاد مع الرشيد بدوي عبيد.

· ………..

· ترس اخير : الهلال والخرطوم الوطني ..موعد اخر مع الدهشة.

قد يعجبك أيضا
4 تعليقات
  1. سامر بابكر يقول

    عارف يا عمك كتاباتك دي نتيجتها الهلال سيبدأ النزيف بداية من مباراة الخرطوم إن شاء الله وبعدها كمان عقبة لغاية ما توصلوا عحب والرشيد وطيفور والصاوي وتيري والعقرب وطوني والجزلي اليوم داك حاتعملوا ايه؟ ولا تنسى بأن الهلال اصبح كتاب مفتوح بس اب شنب جير ليكم كم نقطة مجاملة… بعدبن نحن مالنا ومال جلابية ريكاردو وشنو يعني لو لبس جلابية…صراحة كدا انت رايحة ليك فرحة وما اظنها تتحقق قريبا مع جيل المريخ الحالي… خفف دمك اكتر والعب على الورق والنتيجة ان شاء الله نفس النتيجة من ايام ايشيا وموكورو طيطا وجيسي ودقيق الفيني… الفرحة الجاية وين؟ افتح تفرح ولا كولا شبطبتوه بعد شهر من تسجيله مثل الدالي الذي تغزلت فيه وتم شطبه بعد مباراة ودية واحدة فقط. اسمع كلامي دا كويس وتعال قابلني بعد ٣ أسابيع نشوف ابوالهل وريكاردو ابوجلابية وصلوا وين…متعة يا ود عبدالماجد والأيام دول بتعرف كيف يكون البل وليس الناس تبحث عن فرح طال انتظاره.

  2. Adli يقول

    غايتو يا اعلام شاش تيري وبمبان والصافي خلوكم تكتبوا في حاجات انتو ذاتكم ما عارفين بيكتبوا في شنو هههههه هسي

  3. صلاح يقول

    الكلام البتكتبه ده يا ود عبد الماجد يوم بيقتل ليه دلقون، أصلا هم بيكرهوا الهلال سيد البلد أبزرد أكتر من حبهم للمرخرخ، وخصوصا لمن تقول هلال الوطنية والخريجين، كلام من النوع ده بيهرد فشفاشهم ويطلع كل روح الدونية الساكنة فيهم…..
    أسي أبو المستعار المندلاوي من إمبارح ما قدر ينوم وغلبه القعاد في واطاة الله دي، كل شوية يقرأ العمود ويمشي يقطع ليه جك موية ويجي يردم بساقط القول، ولمن يعلق بكون الشرر بيتطاير من عيونه والصلعة الماكنة جايبه دخان من شدة الزعل 😆😆😆
    أديله يا ود عبد الماجد، وكل مرة كدة جيب سيرة هلال الوطنية ومؤتمر الخريجين وفنيلة الشغيل في متحف الفيفا، وما تنسي الولد ميدو هارد الفشفاش هداف الدوري !!

  4. Hajjam يقول

    الليلة ابو المستعار المندلاوي ظهر بعد غيبة طويلة. الزول ده مغتاظ من شنو؟. الظاهر جرعة المخدر ما ظبطت اليوم. 😹😹😹

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد