جيسى جاكسون 

  جيسى جاكسون

• اخونا ( ود نور الدايم ) بالعربى الفصيح ذو خيال ( جامح )

• وبالعربى الكسيح هو ذو خيال ( فالت )

• فالت زى ( عشة الجبل )

• و جامح زى ( سجاد )

• ياخى الزول دا شدة ما ( متفائل ) … شدة ما خيالو ( خيول ) … قال عاوز ( سبسطة ) يجيب ليهم ( جيسى وير ) …

• الناس دى منتظرة ( كردنة ) الزول بتاع القوة المالية ( الهاربة ) عشرة سنين عشان يجيب ليهم ( سوماتا ) كردنة ( سبنا ) ما جابها ليهم …. وسبنا دى يا ( شيخ ) حبيبة ( سوندار ) فى الفيلم الهندى ( جانوار ) طبعا بتكون دخلتو …. ما تعمل فيها الوقت داك كنت فى ال daycare … من صورتك دى

شكلك اكبر من ( منسقتنا ) بعشرة سنين

واصغر من ( شجرابى ) بسنتين ….

• ارجع ليك ل قصة ( ولدنا ) جيسى جاكسون الفوق داك … جيسى دا ولدنا

هنا ( يشبهنا ) … زول بحب ( القيافة ) زى ( كردنة ) كدا … ياخى دا اقيف من شداد زاتو … الراجل دا قس ( اسود ) متطلع جدا … متطلع زيك كدا ( واحد )

مش انت ( متطلع ) سبسطة يجيب

ليكم ( جيسى ) الساكاهو القارة كلها … اها جيسى دا زيكم كدا متطلع شديد

الزول دا أترشح عشرين مرة ودق ( الدلجة ) اخر مرة دى أنصارو جمعوا ليهو قروش لتمويل حملتو الانتخابية

( الرخيص ) أكل القروش … تصدق اشترى بيهم ( بدلات ) و( كرفتات ) و ( برفانات ) فتعرف بدلا من التعب والجرى ورا لاعب تطلبه الاندية ذات الوزن التقيل ( الاهلى والزمالك والترجي ) معليش ما ح اكضب وأقول ( المريخ ) مش عشان المريخ وزنو ما تقيل لكن عشان ( المدماك ) الجاثم على صدر المريخ … وعشان ( جرجيرو )

البقى ( بامية ) … زى ما قلت ليك وفروا

جهدكم وجهود ( سفسطة ) برضو وتعالو

اطلبو خدمات الأمريكي ( جيسى جاكسون ) والراجل غير مكلف بالمرة … انا ما قلت ليك ( رخيص ) ما يكلفكم كتير يعنى كلها ٩٠ بدلة و٩٠ جزمة و٩٠ كسكتة زى حقات ( كردنة ) و( سيلفاكير ) يعنى البيعة كلها ما نكلفكم ( ٥٠ الف دولار ) وأهو تغيرو شوية بدل ( ماسورة ٥٠ بوصة ) تشترو ( صهريج ) عديل كدا … ال ح يختلف شنو ؟؟؟ شوية استقبالات و ( بوكس مكشوف ) و بدلا من الريس السابق يستقبلو فى الصالون ( الحفظناهو ) خلونا نشوف الصالونات الجد جد بتاعت ( سوباطو ) وكلها شهور والصهريج ( يخر ) موية زى حقت ( الاباتشي ) ….

• ود نورالدايم ( احلم ) هو الحلم بقروش ؟؟؟؟

• بس قلتو لى انتو دايرين ياتو فيهم

باقى انا بعرف تلاتة ( جسيات )

• الاول ( جيسى بنى ) ودا دكان ( رخيص ) يشترى منو ( الهدوم )

• والتاني ( جيسى جاكسون ) القس الكلمتك بيهو …

• والتالت ( جيسى وير ) الدايرنو ناس الاهلى والزمالك …

اها انتو بتقصدو ( جيسى وير ) ولا ( جيسى العوير ) ؟؟؟؟؟

• يبقى ما عوير كيف لو عاوز يجى يلعب

فى فريق ( ساكى ) ليه كاس ٩٠ سنه …

• ويا وداد ( تسعين ) سنة

• انتو ( وداد ) لسه ما (  اتمكنوا ) منها ؟؟؟

• صدقونى التمكين عاوز ( تمكين )

• اخر الحدقات

• بالجد كدا ( جيسى وير ) ولا ( جيسى عوير ) دا ؟؟؟؟

• اخر حا جة  لو  لاحظتو  فى اول  المقال انا  خاطبت ( ابو اللمين نورالدايم ) لا قلت ( هجاص ) ولا كتبت ( جرقاس ) وهى ما فارقة مجرد نقاط وحرف واحد لن يغير ( المعنى )

• الأخوين ( هجاص ) و ( جرقاس ) انا و العياذ بالله من انا دى .. وحياة ابوى انا ما ( نرجسي ) بس كمان وببساطة كدا

انا لو كتبت باللغة التى ( اعرف ) لستعصى عليكما أنتما ( تحديدا ) الفهم …

• فمن  يكتب  ردا من عشرين كلمة ويخطىء  ( إملائياً) فى خمسة عشرة  كلمة منها  قطعا  لن  احتاج لاى  عبقرية

لاقطع ( يقينا ) اي مرحلة  دراسية وصلتما …..

• صحى ( جيسى ) ولا ( جرقاس  ) ؟؟؟؟