روفا وجيسي وبوجبا و(…) و(…) تاني عادي تسمع (وردي) في مباريات الهلال

صابنها

محمد عبدالماجد

روفا وجيسي وبوجبا و(…) و(…) تاني عادي تسمع (وردي) في مباريات الهلال

· الراجل جاء راجع من الاستاد و(الفار) حكم تنقية الفيديو ناقض ليه (4) اهداف وحاسب عليه ضربة جزاء وطارد ليه مدافع.

· زولكم رجع البيت دخل في الضلفة المقفولة في الباب من الزعل.

· الراجل دخل على البيت – اخلاقو في نخرتو.

· ما عاوز يسمع أي شيء.

· ما عاوز زول يتكلم معاه.

· ولا كلمة.

· الزول وقت يكون (بصنقع) كتير ..وبعين في السماء بكون ما عاوز زول يتكلم معاه.

· افهموها كدا.

· صاحبكم قاعد كدا في (الحوش) وقافلة معاه للأخر …زوجتو جاءت طالعة من المطبخ تكورك.

· الراجل قال ليها مالك يا ولية؟.

· المرا قالت ليه اللبن ‘VAR’.

· (فار) وادفق.

· ‘VAR’.

· في حكاية اللبن دي – حكمة الله اللبن لمن تقعد تحرسو ما بفور …اول ما تمشي منو يفور ويدفق.

· اللبن ‘VAR’.

· الراجل حسب زهجتو قال ليها وبعدين !!!…الليلة (الفار) دا مالو معانا؟ …خلينا ليه (الاستاد) كمان لاحقنا في (البيت).

· والله الكورة من دخلت فيها تقنية الفيديو ‘VAR’ …الهدف بقى زي (الدليفري).

· المهاجم تقول عاوزين يعقدوا ليه.

· الحكم يخش ويطلع.

· الحكام لو ما اتشاوروا ورجعوا للأهل في غرفة تقنية الفيديو ما بحسبو الهدف.

· في زول تاني اول مرة يسمع بـ (الفار)..ويشوفو….زول ما عندو علاقة بالقصة الفوق.

· الزول عجبو ليك (الفار) عجب شديد …وقال لازم يدخل ليك تنقية الفيديو (الفار) في جملة مفيدة.

· الزول حسب الفهم دا مشى البحر.

· والبحر الايام دي قايم.

· قالوا في زول غرق في البحر.

· الجماعة قاعدين (4) يوم في انتظار خروج (الجثة).

· في اليوم الخامس (الجثة) طلعت.

· الناس في البلد دي بحبو (الغلاط).

· قعدوا يتغالطوا …ميت ما ميت ..ميت ..ما ميت …ميت ما ميت.

· الزول بتاع (الفار) جاء عليهم لقاهم قاعدين يتغالطوا و (الجثة) ممددة قدامهم.

· قالوا ليه : اها انت رأيك شنو؟.

· قال ليهم في شنو؟.

· قالوا ليه الزول دا غرق ليه 5 يوم …مات ولّا ما مات؟.

· قال ليهم الزول ياتو؟.

· قالوا ليه (الجثة) القدامك دي.

· صاحبكم ما قدر يعاين ليها.

· ما عرف يقول ليهم شنو؟.

· قال ليهم نمشي ‘VAR’.

· ما في حل غير (الفار).

· في واحد من الجماعة عامل فيها افهم زول فيهم ..قال ليه ‘VAR’ شنو الزول دا اخر ظهور ليه قبل ما يغرق كان قبل (5) ايام ..يعني كيف ح يكون حي لغاية الآن؟.

· والله لّا يكون (كوز)…عشان يكون حي لغاية الآن!!.

· الزول دا والله مات وشبع موت.

· ادخل ليكم على الجد.

· الكلام الفوق دا ما تشتغلوا بيه.

· ما تلفحو الكلام.

· طبعا لو سألوتني عن اللاعب الذي اتمناه في الهلال ح اقول ليكم طوالي والي الدين خضر (بوجبا) لاعب الاهلي شندي.

· الزول دا اسمو براهو بيلعبو في الهلال.

· والي الدين خضر اتمني ان اراه في الهلال قبل أي زول.

· قبل (التش) ذاتو.

· قبل لاست جيسي.

· وقبل (….) و(….).

· لجنة تطبيع الهلال لو لم تفعل شيء غير تسجيل والي الدين خضر (بوجبا) في الهلال لكفاها ذلك يا الطاهر يونس.

· بوجبا.

· بوجبا.

· بوجبا.

· و(…).

· و(….).

· جيبوا لينا بوجبا و(…) و(…) ….حفلاتنا تاني بتبدأ من عصر بدري.

· والعجب لو كملتوا جميلكم وجبتوا لينا معاهم ياسر مزمل.

· بتعملوا ليكم فريق قومي في الهلال.

· (…) و(…) من زمان قالوا بيحلموا يلعبوا في الهلال.

· انا شايف بوجبا وياسر مزمل اهم من أي لاعب في الساحة الآن.

· اهم حتى من المحترفين.

· اتخيلوا وسط الهلال يكون فيه جيسي وابوعاقلة وعبدالرؤوف ووالي الدين خضر.

· اتخيلوا كدا.

· وسط الهلال مع هذه الاسماء ح يكون فيه (….) و(….).

· لو الكلام دا حصل – يا دوب ح نقول سقطت!!.

· هذه الاسماء مع نزار حامد وبشة الصغير بتبقى حاجة ما تخلص.

· والشيخ (شيخون).

· و(…).

· و(…).

· يمين الكلام دا يحصل …تاني عادي ندخل مباريات الهلال ونحن شايلين التين والزيتون والعنب.

· ما في زول تاني بياكل ليه (تسالي) او بشيل ليه (قصبة سكر) مع هذه الاسماء.

· السكر بيبقى في الهلال.

· طبعا انتوا طبعكم كعب.

· بتشوفوا الـ (….) دي و الـ (…..) دي ..بتكونوا عاوزين تعرفوا ديل منو؟.

· عارفكم انا.

· ح تخلوا جيسي …الجاكم تعبان من زمبابوي.

· جاكم مع (الكارونا) دي.

· ح تخلوا والي الدين خضر بوجبا.

· وياسر مزمل.

· وتمسكوا في الـ (….) و الـ (…) التانية.

· رغم انكم عارفين أي شيء.

· عاوزني اجيبها ليكم بالاسم.

· أنا لا بقول رمضان عجب.

· ولا بقول محمد الرشيد.

· ولا بجيب سيرتهم.

· ما تخلونا نغلط.

· بنقول بس (….) و(….).

· انا هسع جبت سيرتهم.

· قلت عجب.

· قلت رشيد.

· ولا جبت سيرتهم.

· انتوا براكم بتجيبوا لينا الكلام.

· الفهم فهم…والما فهم بي طريقتو.

· غايتو الكلام دا لو اتحقق تاني عادي مباريات الهلال تسمع فيها محمد وردي.

· نسمع لو بهمسة والمستحيل وخاف من الله والطير المهاجر في مباريات الهلال.

· نشع (غنا).

· الهلال تاني ما عندو مباراة بتنتهي اقل من خمسة.

· جيسي دا قالوا ليك جاء من زمبابوي شايل معاه (علبة الحلاقة).

· شايل ليه مقص.

· وموس.

· وماكينة حلاقة.

· حالف ما يخلي ليه مدافع في البلد من غير ما يحلق ليه.

· صلاح نمر لو فالح يمشي يغير اسمو دا من بدري.

· الـ (نمر) بجيب ليك الكلام.

· وقالوا جيسي دا جنو وجن الزول البعمل ليك فيها (نمر).

· ناس مزمل ابوالقاسم تاني من الاسبوع التاني بيمشوا المحكمة الرياضية.

· من الاسبوع التاني بتحاوموا في (كاس).

· جيسي قالوا وصلوا.

· الجرسة بدأت.

· وجع الرأس.

· والضهر.

· وطمام البطن.

· اول ما وصل جيسي مطار الخرطوم اول شيء قالوا سأل عنه هو صلاح نمر.

· قال جيبوا لي صلاح نمر..وضفر.

· قالوا ليه ضفر في مريخ الفاشر.

· وقت قالوا ليه كدا..قالوا جيسي زعل زعل شديد…وقال ليهم (نمر) تعب معاي.

· والله بعد وصول جيسي …شعرت ليك ان الكاردينال كان كاتلنا بالصبر.

· الزول دا كان كاتلنا بي (الجوهرة الزرقاء).

· الكاردينال قعد في الهلال اكثر من 6 سنوات.

· لا شفنا ساماتا..ولا الاخطر من ساماتا.

· مرة عموتة.

· ومرة ميسي ذاتو.

· وما شفنا حاجة غير (تيتيه) وغرامات وعقوبات الفيفا.

· يا مزمل احسن تسفيدوا من وقتكم …وتمشوا من هسع (كاس).

· امشوا اكسروا هناك.

· لو ما لقيت ليكم سبب تمشوا بيه ..قولوا ليهم الامطار والسيول والفيضانات.

· ممكن بالسبب دا يدوكم لقب هدّاف الدوري.

· شكرا سادومبا.

· والله اللاعب المحترف (الاجنبي) بقى عندو ولاء اكتر من اللاعب المحلي (الوطني).

· الثنائي الزيمبابوي جيسي وسيرجي برفقة وكيلهما وسادومبا وصلوا امس للخرطوم.

· جيسي ما فيه كلام.

· بس سيرجي اعملوا ليه (اختبارات) زي ما اعلن عن ذلك.

· ما عاوزين محترف ساكت.

· وقبل جيسي وسيرجي احسموا لينا موضوع والي الدين بوجبا وياسر مزمل و(…) و(….).

· كذلك عاوزين كابتن بشير لاعب الامل عطبرة.

· أي لاعب من عطبرة بنجاحه مضمون.

· اخرهم سليم.

· الهلال عاوز اضافات كبيرة وتسجيلات قوية.

· أي زول يقول غير ذلك…بكون ما عارف كورة.

· الهلال عاوز دفاع.

· وعاوز وسط.

· وعاوز هجوم.

· لجنة التطبيع ..عاوزنها تسجل صاح للهلال.

· الكاردينال في 6 سنوات في الهلال كل حصيلته في التسجيلات لا تتجاوز (6) لاعبين.

· لم ينجح من تسجيلات الكاردينال طوال هذه المدة غير (5) او (6) لاعبين بالكتير.

· لجنة التطبيع عاوزنها تصحح هذا الوضع.

· …………

متاريس

· قناة الهلال شكلت غياب تام في وصول جيسي وسيرجي.

· على الاقل حتى كتابة هذا العمود ..ما شفنا حاجة من قناة الهلال.

· ما معقول قناة الهلال تكون معارضة للهلال.

· دي ما حصلت.

· الجميل في لجنة تطبيع الهلال حسمها مبكرا لملف التسجيلات.

· الهلال يلعب مباراة مهمة عصر اليوم امام حي الوادي.

· حي الوادي فريق ما ساهل …ويقوده مدرب كبير هو مبارك سليمان.

· احسموا المباراة مبكرا.

· بقى ما عندنا اعصاب للشوط الثاني.

· نحن في اللفة الاخيرة.

· أي تساهل او استهتار مرفوض.

· نتمني اليوم ان نشاهد الشيخ محمد.

· ان شاءالله في اخر ربع ساعة.

· سليم وموفق …الهلال في السليم ودائما موفق ان شاءالله.

· …………

· اخر ترس : جيسي قال جيبوا لي مقاسات (عراضات) استاد المريخ.