سجلو بتاع كاشير مصري من كافتريا الإستاد !!
بالعربي الكسيح
محمد الطيب الأمين
سجلو بتاع كاشير مصري من كافتريا الإستاد !!
* أشهر تجارة راجت في السودان خلال السنوات الأخيرة هي تجارة (البوكو) .
* البوكو هي عربيات بدون ورق .
* لا فيها (ورق جمارك ولا ترخيص ولا انتربول) .
* عربيات بتجي من ليبيا بسعر أرخص من سعر السوق .
* تشتري وتكابس بعد ذلك من أجل الجمارك والترخيص .
* وطبعاً الجمارك جرجرة.
* وغير إنها جرجرة (قافلة) .
* في ناس اشتروا عربيات البوكو ولم يكملوا الترخيص والجمارك .
* ومع حملات المرور أصبحت كثير من عربيات البوكو لا تتحرك إلا داخل الأحياء.
* وبما أن ذلك كذلك فإن المريخ قد سجل في كشوفاته لاعب (بوكو) .
* والله صحي .
* عمار طيفور وجوده في المريخ الآن يشبه وجود عربة (افانتي بوكو) لا محصورة ولا مجمركة ولا مرخصة .
* عربية لا تتحرك أبعد من حلتنا.
* ما بتمشي على الظلط .
* ولا بتقطع الكبري .
* طيفور طلع لاعب (بوكو حرام) ساكت .
* وتعال أناقشك.
* لاعب ما معروف كان بيلعب وين .
* مرة يقولوا كان بيلعب في نادي درجة تانية في ايطاليا .
* ومرة يقولوا كان بيلعب في نادي درجة تالتة في الدوري الأمريكي.
* المريخ عشان يطلع من الحرج ده قام سجل طيفور في نادي (وهمي) من أندية أمبدة .
* سجلوا وشطبوا في نفس اليوم عشان يسجلوا في المريخ .
* نظام منتقل من نادي وكده .
* هذه الخطوة ستجر إتحاد الخرطوم لمشاكل قانونية كبيرة .
* إتحاد الخرطوم هو الذي وافق على تسجيل (عمار بوكو) في كشوفات نادي القادسية أمبدة وهو الذي أشرف على شطبة من ذات النادي حتى يسجله المريخ .
* لا جمارك ولا ترخيص .
* طيفور ده ما بقدر يطلع الظلط .
* خلوهو يحوم في الحلة بس .
* زيو وزي الافانتي حقت جارنا .
* يتمرن بس .
* يشبع تمارين وموز .
* المريخ السنة دي شكلو بقى زي شكل الحرامي الطلعت عليهو شمس .
* منظر جيعان جداً .
* أي ملف في المريخ تمسكو بتلقى فيهو سمكرة وغش وتزوير.
* ما عندهم حاجة سليمة .
* عجب والرشيد .. تزوير.
* عمار طيفور .. بوكو حرام .
* كردمان .. موقع عقدين .
* سوداكال .. كان بيدير النادي من السجن .
* جمال الوالي لو رجع ح يتسجن.
* حازم القالوا مرشح لرئاسة لجنة التطبيع هو ممنوع من دخول السودان .
* أو بالأصح مطلوب لدى العدالة .
* أي حاجة تمسكها في المريخ تلقاها ما جايبة حقها .
* من عمايلكم حتى نجيلة استادكم حرقت .
* النجيلة ذاتا خجلانة من العمايل دي .
* وده كلو بسبب السوباط .
* السوباط والطاهر يونس عملو في المريخ عملية يعجز عن فعلها نجار حلتنا في خشب جارتنا .
* الضرب كتر عليهم .
* بقوا ما عارفين يتصرفوا كيف .
* سجلوا ١٣ لاعب عشان شافوا الهلال سجل ١٧ لاعب .
* جبنا بوغبا (ترخيص وجمارك) قاموا جابوا طيفور (بوكو) .
* سجلنا أبو عشرين مشوا جابو أحمد عبد العظيم وجمعة .
* في النهاية اعتذروا لجمعة .
* سجلنا الغربال قاموا سجلوا الغربال الصغير في فريق الشباب .
* سجلنا جيسي جابوا (بتاع كاشير) مصري سجلوهو في خانة محترف أجنبي.
* المريخ دخل في صدمة وحالة فقدان تركيز وربما فقدان وعي .
* ولذلك نحن نطالب بمراجعة أوراق كل اللاعبين الذين سجلهم المريخ .
* ما عندنا ثقة في المريخ .
* ما عندنا ثقة في (كلب الليدو) .
* كلب الليدو لقب جديد للمريخ أوحى به الأستاذ بابكر سلك .
* قوم على حيلك .
* المهم.
* بصراحة نحن شاكين في أي عملية تسجيل قام بها المريخ في التسجيلات الأخيرة.
* شوفوا ورق سيف الدمازين احتمال يكون لسه مسجل في مريخ الفاشر .
* شوفوا ورق مازن محمدين بتلقوهو ناقص .
* أنا خايف المريخ يكون سجل تمبش وعقده ما زال سارياً مع الأمل عطبرة.
* الناس ديل وصلوا مرحلة دايرين يسجلوا والسلام.
* لا بعرفوا قانون ولا بيعرفوا لوائح .
* شغالين كيري ساكت .
* لكن البروف لكم بالمرصاد .
* شداد إن شاء الله لا تفوت ولا تموت .
* بدونك خربانة يا كبير .
* ونرجع ونقول (أنت يا الدم لونك أحمر) .
* وبرضو نقول : (أنا لو رجعت السودان ما بلعب إلا للمريخ) .
* هاك البطيخ ده .
* وغايتو السنة دي بالذات يا متنا من الضحك ويا كمان الضحك كتلنا .
* و..و..
* وبقليبك تقول لي تعال وتعال وبعيونك تقول لي …….(ده بوكو حرام) .
قال عمار طيفور (مرة يقولوا كان بيلعب في نادي درجة تانية في ايطاليا) . طيب السؤال موجه لادارة المنتخب هم يحددو كان بيلعب وين
قال (سجلوا وشطبوا في نفس اليوم عشان يسجلوا في المريخ) . طلما اللاعب حسب كللامك مسجل ومشطوب لا علاقة للمريخ بالموضوع
قال ( عجب والرشيد .. تزوير) . قلع عديل وانت الصادق
قال(عمار طيفور .. بوكو حرام ) .أسأل عنو شداد جابوهو من وين
قال(كردمان .. موقع عقدين ) .رغم انه موضوع مصعب انتهى لكن بسألك الغربال موقع كم عقد 3 ولا 4عقود وفي ياتو خانة ههه اللاعب رقم 35 في كشف الهلال
قال( أي حاجة تمسكها في المريخ تلقاها ما جايبة حقها) . العايز يشتهر يكتب عن المريخ كلام فاضي ذيك تماما وذي عمودك الفارغ
قال(بالأصح حازم مطلوب لدى العدالة. منو الطلبو وعلى فكرة ولدنا السوباط المريخابي الرئيس المنتدب بتاعكم مطلوب لدى منو برضو وطلع بي كفالة من وين وممنوع من السفر ومحكمتو شغالة
قال (ناس المريخ الضرب كتر عليهم) .كلامك في محلو والدليل بمبان رمضان عجب في الدورة الأولى وسوط السماني الصاوي في الدورة التانية
قال (لا بعرفوا قانون ولا بيعرفوا لوائح لكن البروف لكم بالمرصاد .) .بروف شداد هههه يا ممتاز 2018 ومحكمة كاس ومزمل أبوالقاسم بتاع ياسر مزمل والركبة وكدا
قال(المريخ دخل في صدمة وحالة فقدان تركيز وربما فقدان وعي ).من كتر الكاسات بقينا نشيل كاسين للممتاز في الشهر الواحد وكمان نغلبكم مرتين فريقنا سمح وقادرين
قال (ما عندنا ثقة في المريخ) . باخ انتو الاتحاد الافريقي ما بثق فيكم يا بتاعين الحكام الهجين ورقم 2 البقى 12 والمشكلة الكورة متلفزة استحو
قال على لسان الغربال (أنا لو رجعت السودان ما بلعب إلا للمريخ) .ما فرقت كتير ماهو بيلعب مع المريخاب الزعلانين العملو حاجة اسمها الهلال وخلو أمثالك يشجعوهو ولو ما عاجبكم سو ليكم فريق غيرو وشجعوهو بي راحتكم
قال وغايتو السنة دي بالذات يا متنا من الضحك ويا كمان الضحك كتلنا .السنة بالذات يا متو من الغلب يالغلب كتلكم مرتين كتيرة والله الرحمة برضو حلوة
صحفي تعبان ما عندو موضوع الظاهر مسمار السماني لسع ماحرق جوفوا الله يكثر من اصفاركم
هههه هاااااا. برافو ياود الطيب. ولع نار القصب واضرب الجماعة واحرق عصابات اليخماو وابي المستعار.