سوداكال لو اشتغل معارضة المريخ بهبط الأولى!!

قزاز ورذاذ

محمد الطيب الأمين

سوداكال لو اشتغل معارضة المريخ بهبط الأولى!!

* مرات بتكون (راضي بالهم) وبعد ده (الهم ما برضى بيك).
* وأحياناً (أنت والهم) بتكونو رضيانين من بعض.
* وأنا لا أعرف هل سودكال هو (هم والمريخ راضي بيهو) ولا المريخ هو (الهم وسوداكال راضي بيهو)؟
* غايتو فيهم واحد (هم).
* ولحدي ما نعرف منو (الهم) ومنو الراضي بالتاني أنا عايز اهدي النفوس.
* العمود ده لتهدئة النفوس بين أبناء المريخ.
* أولاً سوداكال بيقول إنو القانون معاهو وهو الرئيس الفعلي للنادي.
* ومعاهو حق.
* واللجنة الثلاثية والإتحاد العام بتقول الكندو هو الرئيس.
* ومعاهم حق برضو.
* حالياً المريخ في رئيسين ، أ تقول جابوا أبطال أفريقيا قبل كده.
* هسه كأس دورة مانديلا ده داير ليهو رئيسين؟
* مانديلا كانت عبارة عن دورة مُحسنة.
* وتعال اناقشك.
* دورة لا شارك فيها الأهلي المصري ولا الترجي ولا الوداد ولا الهلال ولا الزمالك ولا مازيمبي ولا اسيك.
* شارك فيها المريخ ومعاهو شوية فرق لا وجود لها.
* المهم .. أنا داير اهدي النفوس.
* سوداكال من حقه يدافع عن الكرسي الذي جلس فيه عن طريق جمعية عمومية.
* لكن كمان سوداكال ذاتو مرات ببالغ والله.
* عندو حركات كده بتخلينا ما نقيف معاهو.
* يعني هسه كونو المريخ سنتين بيلعب خارج استادو دي حاجة بايخة جدا.
* ما ممكن أنت رئيس نادي وتخلي فريقك (زي مشرد حظو عاثر).
* ما ممكن تخلي النجيلة زي (حِنة العريس القديم).
* ده غير إنو فرط في أبو عشرين الشهير بي (لون الدم).
* وغير فشلو في تسجيل محمد عبد الرحمن الشهير بي (لو رجعت السودان ما بلعب إلا للمريخ).
* لكن كمان الراجل ده سجل ليكم توني وطيفور وجدد لتيري والتش .
* وشال الدوري مرة واحدة.
* مرة واحدة بالحلال.
* ومرة اداهو ليهو الكاردينال هدية.
* ومرة شالو بالبخور.
* وعلى فكرة لما البخور غاب أمام أهلي شندي أمس الأول كان التعادل.
* وأنا جاي اهدي النفوس.
* إعلام المريخ ما داير سوداكال.
* دايرين جمال الوالي.
* وجمال الوالي تاني ما بدقوها في البلد دي.
* ما عندكم غير سوداكال.
* مع الغلاء وارتفاع الأسعار ده احسن تمسكوا في سوداكال ده قوي.
* كيلو الموز بي ٣٥٠ جنيه.
* التمرين الواحد داير ليهو ١٥ كيلو موز .
* ثم إن إعلام المريخ ما على كيفو.
* سوداكال مريخابي وعندو قروش ومن حقو يترأس النادي .
* وأنا جاي اهدي النفوس.
* طبعا سوداكال لو اشتغل معارضة أنا احلف ليك المريخ ممكن يهبط لدوري الأولى.
* والله صحي.
* سوداكال في المعارضة قاسي جداً.
* عشان كده ما في داعي تزعلوهو.
* الراجل ده خلوهو يمشي وهو راضي.
* لو زعل بتهبطو الأولى .
* أنا اتمنى من سوداكال ما يشتغل معارضة ولا يحرض اللاعبين ولا يجيب ليهم عروض من بره.
* أنا داير اهدي النفوس.
* بتمنى ما يطالب المريخ بالديون التي تجاوزت ال٧٥٠ مليار.
* بتمنى سوداكال ما يشتغل شغل ضد المريخ.
* أنا داير اهدي النفوس.
* نحن يا سوداكال واثقين إنك لو اشتغلت معارضة بتخلي جماهير المريخ تعمل مسيرة تطالب بعودتك.
* عارفين والله.
* لكن بتمنى ما تشتغل معارضة.
* ونتمنى إنو تعادل المريخ أمام اهلي ما يكون عندو علاقة بمعارضتك.
* بس يا سوداكال بقول ليك حاجة أخيرة.
* المريخ ما حق زول ومن حقك تستمر في الرئاسة.
* ومن حقك تطالب بكل ديونك.
* ومن حقك تواصل التصعيد الخارجي للقضية.
* أنا ما داير اقول ليك ما تسكت لكن بقول ليك البعملوا فيهو الجماعة ديل حقارة والله.
* وأنا داير اهدي النفوس.
* و.. و..
* وفي الحالتين (الاصيفر) ضايع.