عيبك الوحيد يا حازم انك انفعالي

*كرات عكسـية*
*محمد كامل سعيد*

*(عيبك الوحيد يا حازم انك انفعالي)..!!*
* على الرغم من ما اثير عن استيلاء الكومبارس على فريق الكرة، الاّ ان الواقع يشير الى ان الازمة الادارية بنادي المريخ ازدادت تعقيدا وغموضاً، وكيف لا وفرقة الكومبارس، التي تدعي انها تمارس الصحافة، تظهر في كل دقيقة برأي مختلف.. مرات مشاتر، ومرات مخالف.. وده كلووو عشان الصورة ما زالت مشوشة..!!
* نقول ذلك، ونحن على علم تام بان مجموعة (الكومبارس) لا تضم الاّ عدد من (المستجدين) الذين لا علاقة لهم بكرة القدم، ولم يعرفوا عنها اي شئ سوى ما قيل لهم من قصص وهمية، بلسان كبير الكهنة اليخماو، الذي لا يعلم بحجم المصيبة التي تسبب فيها.. ليس في حق الكيان المريخي فحسب، بل في الكرة السودانية ككل..
* لقد تطابقت الصورة في نادي المريخ مع ذلك (التلميذ) الذي أوهم اساتذته واهله، بانه صار في قمة الاستعداد لدخول الامتحان، قال تلك الكلمات وهو مستسلم لكلمات المطبلاتية، الذين برعوا في تسهيل الامور عليه، وتهوينها امامه، ووضعها في قالب وكأن هذا التلميذ ذاهب لتناول كوب ماء بارد، لا ولن يجد اي صعوبة في تناوله..!!
* ركز الجميع في كيفية ابعاد سوداكال فقط، وبالمقابل تجاهلوا بقية الجوانب التي تعتبر اخطر واعمق من ما سيعقب مغادرة سوداكال لمنصبه، سواء بارادته او غصبا عنه.. (اها شبكونا سوداكال لازم يمشي، لازم يروح وبعد داك كل شئ يسهل ويهون، خاصة الادارة.. كمان الادارة دي عايزة ليها حاجة)..؟!!
* اها يا جماعة الخير.. الامتحان بدأ، والتلميذ الموهوم داك جلس على كرسيه، وبعد ما تسلم ورقة الامتحان، فرضت علامات الدهشة نفسها على وجهه، وصار يسأل في السيد الموجه : يا استاذ.. التسجيلات دي معانا..؟! طيب لو هي معانا المفروض الواحد يعمل شنو…؟! أجيب ليها قروش من وين..؟! اللاعبين اخزنهم ويين..؟!!
* الهلال شال مني اللاعب الفلاني (نجم التسجيلات).. اها هسة ارجعوا كيف..؟! أقول شنو.. وامشي على وين.. الفريق الاستلمناه ده نتصرف معاهو كيف..؟! مصاريف التمارين كم..؟! والح يدفعها منو..؟! طيب كان حازم ده اتأخر في التحويل.. أقبل على وين انا..؟! وأقول للجماهير المغشوشة دي شنو..؟!!
* طيب، وعلى حسب (خبرتي المتواضعة) اعتقد ان الرئيس الطوالي كان يعتمد على اللهث خلف مشاطيب الهلال، عشان كده ما في اي مانع اني اعزف على وتر التعاقد مع ابو عاقلة.. آآآي بس يبقى دي السبوبة، وكيف لا تكون هي السبوبة، وانا (واليابي) وما عندي (التكتج)، ولما الزول داك يرسل لينا تكون القيامة قامت..!!
* التأشيرات الى القاهرة عايزة ليها مجهود.. مش ممكن امشي براي اقيف في صف التأشيرات قدام السفارة المصرية بشارع الجمهورية..؟ّ! طيب مش ممكن نسافر بالبص عشان نوفر المصاريف.. بعدين ممكن ناس مصر ديل يدونا الاستاد مجاني، والا يقوموا يصروا على دفع ثمن الايجار..؟! ياربي الايجارح يكون بي كم..؟!!
* الزول الاسمو حازم ده الظاهر عليهو (اخلاقو ضيقة)، من ما نهر الجماهير بخصوص منح الثقة للمدرب الفرنسي غارزيتو، وقال ليهم (ما تقعدوا تنظروا لينا.. اللاعبين هم الذين اصروا على استمرارية غرزة) يعني ممكن اللاعبين هم الذين يحكموا انفسهم بانفسهم، ويقرروا ذهاب هذا وبقاء ذاك.. (والله عليكم جنس حاجات تحنن)..!!
* يا زول ما قلت انت ذاكرت تمام التمام، وحفظت الادارة صم زي (الأصم).. مالك هسه عايز تعمل لينا رايح..؟! يا اخوانا والله انا ما قايل الحكاية كده، بعدين انتو غشيتوني، وصورتو لي القصة على انها ساهلة خالص خالص، لكن والله بالجد القصة دي ما بتنقدر نهائي، ولا احد يعلم كيف ستصل الاموال من الخارج لتصريف الامور بالداخل..؟!!
* لا تزال قصة سيدنا يوسف تحاصر عقلي وبالتحديد مشهد مجموعة الكهنة الذين يعرف كل واحد منهم درجة الوهم التي يتعامل بها (كبيرهم اليخماو) ويصرون على التسبيح بحمده ليل نهار رغم علمهم بانه موهوم، وهم يفعلون ذلك من باب الحرص على مصالحهم الخاصة وما اكثر مثل تلك النوعية في زماننا الحالي..!!
*تخريمة أولى:* ثبت عمليا ان فرقة الكومبارس، سواء تلك التي استولت على ادارة النادي، او الاخرى التي ادمنت تلقى الاشارة من كبير الكهنة اليخماو، قد انخدعتا تماما بدليل ان كومبارس الادارة بدأوا في الهروب من الموضوع، بسبب الواقع الأليم وغياب الداعم المباشر وتواجد ن بيده الاموال خارج البلاد.. ما معناه ان التحويلات لا ولن تصل في وقتها هذا ان وجدت.. اما الكومبارس الصفاقة فقد تابعناهم يكتبون النقد ثم يتقدموا سريعا بالاعتذار.. (اللهم لا شماتة)..!!
*تخريمة ثانية:* طار مبارك الوادي من المريخ، فتابعنا الاقلام وهي تتطاير، وتهاجم ثم تعتذر.. والسبب هنا ـ على حسب علمي ـ ان كل من تشجع وكتب منتقدا انتقال اللاعب الصاعد مبارك الى الهلال قد تقلى دشا ساخنا عبر الهاتف والرسائل، فما كان منه غير ان يسارع ويعتذر و(يلحس كلامو).. “عالم جبانات بشكل”..!!
*تخريمة ثالثة:* تاااااني بنعيد: يظل ضعف الادارات المتعاقبة على ناد المريخ هو السر في تمدد (الشخصيات الهلامية) التي لو وجدت ادارة قوية تعر قيمة انها تقود احد الاندية العملاقة بالسودان وافريقيا لما سمحت (لاي متطاول او تاجر وطبّال) للتمدد بالطريقة التي نتابعها حاليا.. الادارة الضعيفة هي التي تفشل في تجحيم اي سمسار يسعى لبث سمومه في الوسط الرياضي والكروي.
*حاجة اخيرة:* يعد موجة من التآمرات والدسائس والحفر والدفر ابتعد سوداكال، وتمدد الطبال.. وتمضي الاحداث، وياما في الجراب يا حاوي.. والايام القادمة ستحمل معها الكثير المثير من التفلتات والانقسامات.. بس خليكم قراب، وما تمشوا بعيد لاننا (بكرة نقعد جنب الحيطة.. ونسمع ونستمتع بالزيطة)..!!
*همسة:* تسببت عبارة (عيبك الوحيد انك مريخابي) التي داعب بها برقو الزول الاسمو حازم في دبي بالامس، تسببت في ازمة لا حدود لها، الان وبعدما مرت الايام اكتشفنا صفات جديدة لنج في من يدعي رئاسته للمريخ.. ونهمس في اذن الرجل (عيبك انك انفعالي واخلاقك ضيقة)..!!

Mohammed.kamil84@yahoo.com