صحيفة كورة سودانية الإلكترونية

فكتوريا بتضحك ليه ؟

1٬669

صابنها

محمد عبدالماجد

فكتوريا بتضحك ليه ؟

 

• كنت اخشى على الهلال من مباراة فايبيرز اليوغندي من سقف طموحات الاعلام والجمهور الهلالي – في كرة القدم عندما تكون الطموحات والآمال كبيرة ، دائما ما يحدث شيء اقرب الى (النكسة).
• الكورة دي ما عاوزة ليها زول يفرح.
• فريق بهذه الاحلام خشيت ان يصطدم بجنون الكرة – عشان يطلع لينا زول لو خسرنا لا قدر الله ويقول لينا انتوا بتتكلموا ساي.
• طبعا لو حدثت خسارة للهلال لا قدر الله ..كانوا خلوا السوباط والكاردينال وزوران والشغيل وابوعشرين ووليد الشعلة وقبلوا علينا نحن البعثة الاعلامية.
• كانوا قالوا لينا عملتوها لينا كلها (صور) ، وفكتوريا وسمك لمن غلبتوا الهلال.
• طبعا ما كانوا اعتبروا فايبيرز هو الذي فاز على الهلال.
• ولا كانوا قالوا (التحكيم) – هو في زول شاف المباراة؟
• كانوا قالوا بس دي البعثة الاعلامية المرافقة للهلال.
• كراعهم حارة.
• ممكن ينط ليك واحد كدا يقول ليك والله انا من عرفت الجماعة ديل سافروا مع الهلال قنعت من المباراة.
• الحمدلله الهلال انتصر بعرق لاعيبيه وجهد مجلس الادارة والبعثة الادارية والفنية المرافقة للهلال في يوغندا.
• كنت ح ادخل في احراج من بحيرة فكتوريا.
• وما بعيد يحظروا الرقم.
• والجواز ذاتو …لو الهلال اتغلب.
• عشان اتفاصحت شديد على بحيرة فكتوريا.
• وما خليت ليها (سمكة) تنقلب على جنب.
• ح ادخل الى وصف تفصيلي بعض الشيء عن المباراة لأن الغالبية لم تتابع المباراة.
• ما في زول شافها غيرنا – ما تقعدوا تتفاصحوا ساكت.
• لو قلنا ليكم المباراة انتهت 7 / صفر للهلال …ما في زول بقدر يغالطنا.
• في زول شاف المباراة.
• اول حاجة عشان الامور تبقى واضحة ..فريق فايبيرز دا ما ساهل ..وممكن يحرج الهلال في ام درمان اعملوا حسابكم من الآن.
• مدرب فايبيرز قال ح اصحح الاخطاء في ام درمان.
• الفريق يمتلك بعض اللاعبين المتميزين اصحاب المهارات العالية (3 و7 و 29 و (23)…وعندهم حارس مرمى خطير.
• المباراة كلها يكورك.
• الغريب في الامر ان بشه حذر من كل هذه الاسماء وكشفها للجهاز الفني وللاعبين عشان كدا معظم اللاعبين الذين يمكن ان يحدثوا فارق لصالح فايبيرز تم استبدالهم لأن لاعبو الهلال اخرجوهم من الخدمة.
• عارفنهم يا باشا.
• فريق فايبيرز ورغم انه متوقف من اللعب منذ شهر ابريل إلّا ان الفريق قدم مجهود بدني كبير في المباراة وشكل خطورة حقيقية على الهلال (بدنيا)…وكان يمكن ان يتعرض نزار حامد وابوعاقلة وعيد مقدم لاصابات كبيرة بسبب اللالتحامات القوية.
• بشه كان قد تحدث عن هذا الامر وقال ان الفريق يمتلك عناصر شابة وصغيرة في السن لذلك يجب الحذر منها (بدنيا).
• بداية المباراة وفي اول 20 ساعة شكل فايبيرز ضغط كبير على الهلال وفرض اسلوبه لأن خبرة الهلال واسمه جعلت الفريق كلما وجد سانحة قدم فيها عرض يسحب فيها البساط من الفريق اليوغندي.
• ناس الهلال شفوت.
• الهلال وطوال زمن المباراة كان من وقت لأخر يقدم (مقطع موسيقي) يجعل بيه كل الاراضي تخضع لسلطته.
• مع هذا استطاع الفريق اليوغندي ان يصل لمرمى الهلال – لكن ابوعشرين والذي وصلته اكثر من 3 او 4 فرص خطيرة تعامل معها بصورة مثالية ..وبدد من خلال التعامل مع تلك الكرات كل المخاوف والمخاطر على مرمى الهلال.
• الطيب عبدالرزاق اجاد بصورة كبيرة في الدفاع …وكذلك اوتارا الذي كان واضحا يبدو انه لاعبا كبيرا ..وان وقع في بعض الاخطاء التى كان يمكن ان ينتج منها هدف على الاقل.
• حكم المباراة الصومالي حسن حجي كان ممتازا وخاصة المساعد الاول – وذلك اذا علمتوا ان هناك حالات في منطقة جزاء الهلال كان يمكن ان يحسبها الحكم ان لم يكن حكما جيدا ضربة جزاء.
• لا استطيع ان احدد لكم من هو رجل المباراة لأن هناك اسماء عديدة في الهلال قدمت مستوى كبير ، يمكن كل شخص تابع المباراة يمكن ان يكون له رأي مختلفا حول نجم المباراة.
• على العموم الشوط الاول كان رجله هو نزار حامد …والذي اجبر لاعبي فايبيرز على اللعب معه بنعف – لمن (فكتوريا) اتمللت.
• وقالت : هو الزول دا مالو؟
• تاني عاوز تجيب لينا سيرة (فكتوريا).
• اعود الى نجم المباراة واقول بحسبة دقيقة ممكن ان يكون ابوعشرين هو رجل المباراة وممكن الطيب عبدالرزاق وممكن ابوعاقلة.
• ولو عصرتوا على شوية ح اقول ليكم الشغيل …هذا اللاعب من اراد ان يعرف قيمته عليه ان يكون قريبا من الملعب ليرى ماذا يفعل الشغيل.
• تابعت المباراة من محيط الملعب فوجدت ان الشغيل لاعب وقائد ومدرب…ما يقوم به الشغيل فوق التصور.
• ارجع تاني اقول شاهدت وليد الشعلة يقدم اجمل مبارياته مع الهلال لم يكتف الشعلة بالتسجيل وانما كان بنزل يشيل مع فارس عبدالله.
• كل مرة بشه بقول ليه يا الشعلة غطي ضهر فارس عندما يتقدم الاخير.
• السمؤال مستواه ثابت …والتحدث عن تألقه بقي ما فيه جديد.
• فكتوريا تتفق معاي في الحتة دي.
• تاني جاب سيرة (فكتوريا).
• اقول ليكم الكلام الجد – الهلال كسب له لاعب يمكن ان يكون نجم التسجيلات الحقيقي وما في زول شاعر بالحتة دي.
• بتكلم ليكم عن عيد مقدم …والله في كورة عيد مقدم سبق فيها مدافع فايبيرز الذي كان قريبا من الكرة ومشى كمل ..الحارس طلع …لعب الكرة عكسية.
• قون اكيد.
• مرت.
• فييي كومبي على المستوى الشخصي مقتنع بيه مية المية ..وبرضو شايفو من نجوم المباراة.
• ما فيه ولا كلمة.
• تاني منو؟
• فارس عبدالله انقذ الهلال من اهداف مؤكدة ..بخبراته وحكمته وعقله الكبير.
• فارس لاعب مظلوم مثل السمؤال …الناس ما عارفة قيمتهم.
• ابوعاقلة عبدالله …لو قلتوا ليكم برضو (نجم المباراة) أي زول تابع المباراة ما بختلف معاي.
• ابوعاقلة …في كورة مشى بيها …واتقدم ..(فكتوريا) قامت وقعدت.
• بشه في المنطقة الفنية كان بكورك لنزار حامد في الشوط الاول عندما كان فايبيرز ضاغط..يا نزار امسك الكورة عندك شوية ريّح الناس خلي الدفاع يأخذ نفس.
• ونزار لمن يسمك الكورة كان فعلا بريّح الناس.
• لمن (فكتوريا) فهمت حاجة.
• انا شفت زوران صفق لنزار حامد عندما تقدم نزار وصوّب نحو المرمي ..انقذها الحارس بصعوبة.
• وسمعت في اخر دقائق عمر المباراة كنبة الهلال كلها بالاحتياطي والجهاز الفني تصفق لابوعشرين الذي انقذ كرة خطيرة من مرمى الهلال والمباراة تلفظ انفاسها الاخيرة.
• سمعت واحد من الكنبة يقول ابوتلاتين عديل كدا.
• لكن قبل ان نصل للدقائق الاخيرة للمباراة والتى عرف ابوعشرين كيف يتعامل معها ….نشوف البدائل والذين عرف زوران كيف يستفيد منهم.
• محمد موسى شارك بديلا عن فيني كومبي كرأس حربة او رأس المثلث..واستطاع ان يرهق دفاع فايبيرز …خاصة ان دفاع فايبيرز اصلا تعبان.
• محمد موسى تطور في ناحية امتصاص الكرة والاحتفاظ بها.
• مجاهد فاروق – دعوني اقول دا هو اللاعب الذي يحتاجه الهلال.
• فاروق لعب ليه محمد موسى كرة وضعته في مواجهة امام المرمي ولعبها بصورة (لولبية) جميلة لكن الحارس ابعدها الى الكورنر.
• في الوقت داك كنا محتاجين للكورنر اكتر من الهدف.
• مجاهد فاروق بكون قاصدها.
• تقولوا لي فكتوريا.
• بشه ومجاهد شاركا بعد نص ساعة من الشوط الثاني وخرج كل من عيد مقدم ووليد الشعلة.
• بشه مشكلته انه فنان اكتر من اللازم.
• صلاح عادل شارك في الدقيقة 37….وقدر يفرض اسلوبه.
• في الوقت دا الهلال كان محتاج لي صلاح عادل.
• اخر حاجة اقولها ليكم …لو عاوزين رأي وسألتوني من نجم المباراة ح اقول ليكم محمد عبدالرحمن الغربال.
• الزول دا قاعد في المدرجات جهجه ليك دفاع فايبيرز.
• الزول دا جهجه المريخاب عندما لعب المنتخب امام غانا …ما عاوزنو يجهج فابييرز من المدرجات.
• فكتوريا قعدت في الواطة – عاوزة تنشرط من الضحك.
• فكتوريا بتضحك ليه؟
متاريس
• في ام درمان ح تشوفوا جيسي.
• والله تشبعوا فرح.
• وح يلعب بوجبا.
• وعبدالرؤوف.
• وضاح.
• ومؤيد عابدين.
• وح يرجع لاحقا الغربال.
• يا زول الحكاية شنو؟
• ناس المريخ اول مرة يشجعوا الهلال.
• الهلال جاب ليهم تارهم.
• ومن سانت ماري.
• تاني عاوزين شنو؟
• السوباط اصلو ما قصر معاكم.
• السمك في فكتوريا امس قالوا بطلعوه مشوي.
• مشوي من مويتو.
• رمضان عجب ومحمد الرشيد ما عارف الايامات دي بشجعوا منو؟
• الهلال.
• ام المريخ؟
• ابوعشرين لاعب بي عشرين لاعب.
• بالجد.
• وفعلا.
• لاعب شرس.
• وفي نفس الوقت بارد.
• وعنده شخصية.
• وزول محترف.
• مباراة الهلال الناس شافوها تسريبات.
• زي القمة الافريقية.
• ………….
• ترس اخير : بكرة بنجيب ليكم السمك!!

قد يعجبك أيضا
2 تعليقات
  1. صلاح يقول

    الله عليك يا ود عبد الماجد، مبدع كالعادة وفنان في الوصف والغزل، والكنيسة إنك إتغزلت لينا في أبو عشرين وحتي محمد عبد الرحمن المالعب، وده أجمل شئ في عمود الليلة عشان بعذب الجماعة ديك ويخليهم يعضوا أصابعينهم حقدا وكمدا، خصوصا ناس الكاهن الأعظم أليخماو والصبي العجوز بتاعه ولدنا أبو المستعار المندلاوي 😆😆😆
    بكرة يا ود عبد الماجد زيد العيار شوية بسيطة عشان الجماعة فشفاشهم ينهرد هرد، ومافي مانع كمان لو إتخيلت إنو ميدو لعب و جاب قوون في المباراة، عشان ولدنا أبو المستعار يموت بي غيظه 😂😂😂
    رشهم يا ود عبد الماجد وأضغط على الأبنص للصاجات وما ترفع من المرخرخين أبدا !!

  2. محمد ابراهيم يقول

    طبعك جميل …. كلامك جميل ….. تحليلك جميل …. ذي بسمتك

    …………………………………..حجرم ………………………..

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد