لجنة تطبيع الهلال ولجنة ازالة التمكين الاتنين بتاعين (ازالة) و(تفكيك)

صابنها

محمد عبدالماجد

لجنة تطبيع الهلال ولجنة ازالة التمكين الاتنين بتاعين (ازالة) و(تفكيك)

· الشفقة التى دخلت في المريخاب ،جعلتهم بكري المدنية ذاتو خايفين عليه من ان يفقدوه.

· الناس ديل فقدوا الثقة في بكري المدينة.

· بي طريقتكم.

· أنا مالي ومالكم.

· في زول قال ليكم امشوا (كاس).

· الكلام دا ما بتقدروا عليه.

· العصفورة التى كانت تريد ان (تزوغ) من القفص قامت دخلت في (حلة الشوربة) سمعتوا بيها.

· دي حصلت في المريخ.

· المريخابي بقى زي الضاربهو (ملاريا).

· تلقاه من غير مناسبة كدا قاعد يهضرب براهو.

· بقولوا كلام غريب.

· كلام ما بدخل الرأس.

· بكري المدنية اللاعب المقيد في كشوفات المريخ والذي تبقى له في عقده مع المريخ سنتين – ناس المريخ بقوا خايفين عليه.

· دي شفقة شنو دي؟

· يا جماعة الشفقة تطير.

· عليكم الله دي ما (هضربة)؟

· السوباط جعل المريخاب لا يشعرون بالأمان.

· بكري المدينة بقوا خايفين عليه.

· قلت ليكم قبل كدا (طابق شاخور) الله يستر عليه.

· امسكوا في طابق شاخور قوي.

· الناس ديل مشوا فتشوا وقعدوا يبحثوا قالوا بكري المدينة لم يصرف مرتباته من المريخ لمدة (6) اشهر.

· وقالوا بكري المدينة عنده نصف مليار جنيه عند المريخ لم يحصل عليها.

· يعني ممكن بكري المدينة يفسخ عقدو مع المريخ بالقانون.

· عشان قلبكم ما يطير ساكت – الموضوع ما بصل للدرجة دي.

· يعني ما ممكن يصل لغاية ان يطالب بكري المدينة بفسخ عقده مع المريخ.

· ما بتحصل كدا.

· لو بكري المدينة عملها – الهلال ما بعملها.

· ما تخافوا.

· ما وصلنا للدرجة دي.

· نحن كلنا اخوان.

· ما بنرضاها ليكم دي.

· المشكلة ما في بكري المدينة – المشكلة قالوا ليك (طابق شاخور) لقوا فيه (17) صامولة مفكوكة.

· طابق شاخور جاب ليه (رجفة).

· بقى يرجف براهو كدا – فيه (صواميل) مفكوكة.

· طابق شاخور هين …الكلام معاوية الجاك!!

· معقولة ناس لجنة ازالة التمكين وصلوا (طابق شاخور).

· غايتو انا ما عارف.

· ما تسألوني.

· ما بحب الكلام الكتير.

· مرة لقيت وجدي صالح وصلاح مناع حايمين بي هناك.

· ما عارف عاوزين شنو؟

· احتمال يكون جابهم (السمك).

· ما بقدر اجزم.

· بنقل ليكم الحاصل بس.

· الهلال بقى عندو لجنة تطبيع اخطر من لجنة ازالة التمكين.

· ولجنة تطبيع الهلال ولجنة ازالة التمكين الاتنين شغالين (ازالة) و (تفكيك).

· وأنا للأمانة كدا ما عارف (الصواميل) بتاعة طابق شاخور فكتها لجنة ازالة التمكين ام فكتها لجنة تطبيع الهلال.

· ما قادر احدد.

· غايتو التسجيلات قربت.

· ونشوف كل حاجة.

· وبكري المدينة عاوز يرجع الهلال.

· عاوز يختم حياته في فريقه السابق.

· انتوا فاكرين بكري المدينة مريخابي او محمد عبدالرحمن.

· ابدا.

· ما في زول كان في الهلال بيبقى مريخابي.

· دي ما بتحصل.

· هسع بكري المدينة خلوه.

· طابق شاخور – ما تجيبوا لي سيرتو.

· قالوا ليك صلاح نمر عاوز يطق من الزعل.

· عاوز يطرشق.

· صلاح نمر زعلان عشان طلع ما مفكوك.

· صلاح نمر ما مفكوك واستلم مرتباته كلها على دائر مليم.

· يعني ما عندو أي طريقة للمخارجة.

· والله انت يا صلاح نمر زول ما عندك حظ.

· صلاح نمر كان محظوظ يكون (مفكوك).

· كان رفع سعرو.

· لو صلاح نمر كان (مفكوك) او حتى ما صارف مرتباته ، ناس المريخ كانوا غيروا ليه (العربية).

· وكان سلموه مفتاح الشقة.

· وجابوا ليه تلفون جديد.

· الايامات دي أي لاعب في المريخ (مفكوك) بيرفع القزاز.

· تتخيلوا التاج يعقوب ذاتو رفع القزاز.

· التاج يعقوب قوّم ليك نفس المريخاب.

· مرة يقول ليهم عاوز لي قطعة ارض.

· ومرة عربية نيسان.

· مرة شقة في قاردن سيتي.

· ومرة عاوز لي (كبدة ابل) نية.

· التاج يعقوب قطع نفسهم.

· اذا التاج يعقوب عمل كدا يا ربي ناس (…) و(….) يعلموا شنو؟

· التش من هسع قالوا بقى يطلب في (كبدة الابل).

· واللاعب قالوا ليك في المريخ من يطلب (كبدة الابل) اقنعوا منو.

· ابقوا حافظين الكلام دا.

· موضوع (كبدة الابل) دي بذكركم بيه كتير.

· كل ما اجيب ليكم سيرة (كبدة الابل) انتوا افهموا الموضوع.

· واعرفوا الحكاية براكم.

· صلاح نمر عاوز (كبدة الابل) لكن ما عندو طريقة.

· صلاح نمر ما مفكوك.

· يا كابتن ما عندك اكتر من (العدس).

· كبدة الابل انت بدري عليها.

· عليك شوية يا كابتن.

· والله أي لاعب (مفكوك) في المريخ الايامات دي بطلب (كبدة الابل)…اعرفوه ماشي من المريخ.

· صلاح نمر نفسو في (كبدة الابل) لكن ما عندو طريقة.

· عشان كدا صلاح نمر زعلان.

· عاوز يطرشق.

· ما عاوز الفرصة دي تفوت.

· السوباط ممكن يعقد في الهلال 120 يوم.

· يعني فرصة زي دي تاني ما بتقلوها قريب.

· كبدة الابل تاني ما في.

· البفوّت التسجيلات دي – تاني (كبدة الابل) يشمها قدحة.

· غايتو الحاجة العارفها انا والمتأكد منها (….) و(…) قال عاوزين (كبدة الابل).

· انتوا في دي – يا ريت لو وقفت على كدا.

· طابق شاخور ذاتو قال عاوز ليه (كبدة ابل).

· بكري المدينة عاوز (كبدة ابل).

· منو تاني؟.

· التاج يعقوب.

· بكري المدينة.

· ننتظر باذن الله وتوفيقه ان ينجز الهلال تسجيلات (ناجحة) و (قوية) في الفترة القادمة.

· ناس المريخ في الايام القادمة ما عندهم اكتر من الوقفات الاحتجاجية والهجوم على كمال شداد.

· كمال شداد يعمل ليكم شنو؟

· كمال شداد يبقى ليكم (ترس).

· الجرسة ما بتنفع.

· انتوا زمان ما جربتوا الكلام دا.

· ما خليتوا ليكم زول في الهلال ما فاوضتوه.

· سجلتوا ريتشارد وعمر بخيت والمعز محجوب وهيثم مصطفى وبكري المدنية ومحمد عبدالرحمن.

· أي لاعب مر بالهلال سجلتوه.

· بما في ذلك التاج ابراهيم.

· ليه هسع الموضوع بقى ليكم صعب؟

· ليه ما اتبلع ليكم الآن؟

· زمان ما كنتوا فاكرنها (شطارة).

· شابكننا (ولدنا) و (ولدنا)…ليه هسع عاوزين تحرّموا الكلام دا.

· عاوزين تعملوها وقفات احتجاجية.

· خلوا اخلاقكم الرياضية.

· واستحملوا ما فعلتوه زمان.

· اثبتوا.

· بطلوا الجرسة.

· واثبتوا بس.

· ان شاءالله يحصل كل خير.

· ………….

متاريس

· برمجة ضاغطة للممتاز اصدرتها اللجنة المنظمة امس.

· مباراة كل 48 ساعة.

· الهلال سوف يلعب يوم 16 امام هلال الابيض في نفس الوقت الذي يلعب فيه الامل عطبرة مع المريخ.

· يعني الدوري الممتاز ممكن يتحدد بطلها في هذا اليوم.

· التوفيق ان شاءالله مع الهلال.

· هلال الابيض كسب (3) نقاط من شكواه لمريخ الفاشر ورفع رصيده الى 54 نقطة.

· كدا هلال الابيض ضمن التمثيل بنسبة كبيرة.

· صعب ان تصل الاندية المنافسة لهذا النقاط – ربما فقد يصل لهذه النقاط الامل عطبرة.

· علما ان حي الوادي ومريخ الفاشر فرصهما مازالت قائمة لخطف بطاقة التمثيل الخارجي.

· الهلال مباراته الاصعب امام هلال الابيض …المباراة مباراة بطولة.

· الانتصار في هذه المباراة بإذن الله يعني ان الهلال حسم امر اللقب بنسبة كبيرة.

· الفاتح النقر نتمنى ان يضع تشكيلة مناسبة وقادرة على تحقيق الفوز.

· المريخ صعب جدا يفوز على الامل عطبرة.

· دوافع الامل للعودة للتمثيل الخارجي كبيرة.

· ……………..

· ترس اخير : يا (…) و(…) ما تكتروا في (كبدة الابل) عشان ما تبقى ظاهرة.