للأسف الهلال وافق على حل قضية (عجب والرشيد) ودياً !!

بالعربي الكسيح

محمد الطيب الأمين

للأسف الهلال وافق على حل قضية (عجب والرشيد) ودياً !!

* كانت حسناء فاتنة الجمال وكثيرة الخُطاب .
* كل شئ فيها يُغري بالنظرة الحلال والنظرة الحرام والعياذ بالله.
* الله أداها كل حاجة ما عدا (الزوج) وهي تحبو بخفة نحو الأربعين من عمرها .
* الجماعة اقنعوها إنو في زول (عامل ليها عمل) .
* واتوهمت بعد ذلك .
* وزاد الوهم عندها أكثر عندما داهمها (صداع نصفي) لفترة تجاوزت العام ونصف العام .
* ودوها لشيخ بتاع (دجل) ما شيخ بتاع (قرآن) .
* (الدجال) ده قال ليها عندك عمل وعلاجك عندي .
* اها العلاج شنو ؟
* قال ليها : (جيبي لي نص وقية حِلبة) و(ضُفر من كراع كلب ميت ضربتو أمجاد) .
* يعني لو لقت كلب ميت ضربتو هايس ما ينفع .
* على شرط تكون ضربتو أمجاد.
* وكمان قال ليها جيبي لي : (رطل عسل نحل أصلي) و(فرخة مشوية) و(ديك ما بعوعي) .
* الزولة دي لقت الحاجات دي كلها ما عدا (الفرخة المشوية) .
* وبما أن ذلك كذلك فأن المريخ الشهير ب(الإصيفر) قد طلب حلاً ودياً لقضية الثنائي الهلالي (عجب والرشيد) .
* وأنا صراحة ما فهمت حل ودي كيف يعني؟
* حل ودي يعني محمد الرشيد يلعب لينا مباراة ويجي يلعب معاكم مباراة ولا كيف ؟
* ولا حل ودي رمضان عجب يلعب معاكم لكن ما يجب قون في الخصوم ؟
* قضية زي دي ما فيها (حل ودي) يا أولاد الحلال .
* ومع ذلك نحن بنستجيب لرغبتكم .
* وافقنا بالحل الودي .
* عشان خاطر الأخ غير الشقيق أبو عشرين الشهير ب(لون الدم) نحن موافقين على الحل الودي .
* لكن كمان عندنا شروط.
* قعدنا مع شيخ السوباط وورانا الشروط .
* اولاً : جيبوا لينا الزول الكتل الصحفي التنزاني بأم درمان .
* ثانياً : جيبوا لينا (خروف قرنو مكسور) وكان المفروض (ينضبح) في عيد الأضحى لكن ما (انضبح).
* يعني خروف سيدو جابو (يضحي) بيهو وفي آخر لحظة غير رأيو .
* وأهم حاجة نعرف ليه سيد الخروف غير رأيو.؟
* ثالثاً : ورونا السبب الحقيقي الخلاكم تخسروا بالسبعة أمام الوحدات الأردني
* واوع تقول لي البرد .
* ما حصل شفنا لينا فريق خسر بسبب البرد .
* ورونا السبب الحقيقي وبدون كضب.
* نحن السبب عارفنو لكن ما بنكتبو.
* رابعاً : جيبوا لينا عدد (١٦) نملة وعلى شرط تكون من الفاو.
* (نملة) ما من الفاو ما تجيبوها لينا .
* نحن دايرنها من الفاو تحديداً
* مزاج كده بس .
* ما تعملوا فيها مفتحين وتمشوا تجيبوا لينا (نمل) من القطينة .
* نحن نمل القطينة من نمل الفاو بنعرفو .
* خامساً : تورونا الزول (البصم) إنابة عن علاء الدين يوسف عندما ترك نار المريخ وجا إلي جنة الهلال .
* طبعا علاء الدين لحدي ما عقدو إنتهى مع المريخ ما رفع كأس.
* جا شاف الكاسات مع الهلال.
* سادساً : جيبوا لينا (بصل) ما فيهو ريحة بصل .
* بصل (كاتم ريحة) .
* سابعاً : رمضان عجب يلعب (حفيان) تلاتة مباريات في الدوري .
* ثامناً : تجيبوا الكورة الشالها زيكو .
* تاسعاً : محمد الرشيد يحلق صلعة في صالون الحرفاء في محلية كبكابية بولاية شمال دارفور .
* لازم يحلق في الصالون ده بالذات .
* عاشراً : ترجع لينا قروشنا على داير مليم ومعاها غرامة ودمعة دمعتين .
* دي الشروط العشرة .
* اي شرط ينقص من الشروط دي ما في تطبيع .
* وأهم شرط بتاع (النمل) الجاي من الفاو .
* لو وفرتوا الحاجات دي ولا تمشوا للسوباط تعالوا لي أنا بحلها ليكم .
* وبالمناسبة الشروط دي بسيطة شديد مقارنة بهذا الثنائي الهلالي المميز .
* أنا بفك ليك أفضل أتنين عندي (رمضان ومحمد الرشيد) يعني لازم انت تتعب .
* ما بنفرط في أولادنا بالساهل .
* المهم .. الكورة في ملعبكم .
* طبعاً اظرف حاجة قال ليك مجلس السيادة يتدخل في قضية (عجب والرشيد) .
* هو مجلس السيادة ده خلي يدخل يحل مشكلة الرغيف .
* ما تسمعوا الكلام الميت ده لا في مجلس سيادة أدخل ولا مجلس وزراء .
* وحتى لو أدخل ما بنخلي حقنا .
* يا تجوا زي اخوكم أبو عشرين (لون الدم) ويا كمان نقول ليكم (البقية في حياتكم) .
* وتبكوا بس .. عين قطرة وعين مس .
* و..و..
* ونواصل .