محمد الرشيد وبلاغ ضد استلام مال مسروق !!

بالعربي الكسيح

محمد الطيب الأمين.

محمد الرشيد وبلاغ ضد استلام مال مسروق !!

* في دنيا (الحرامية) ينال الحرامي درجة (الدكتوراة) عندما يسرق ثم يبيع ما سرقه للمسروق .
* تسرق وتبيع الحاجة السرقتها للزول السرقتها منو ذاتو .
* كده بتكون (دكتور في السرقة) .
* (والدكتوراة دي) كانت في عهد الكيزان على قفا من يشيل .
* أغلب الكيزان كانوا (دكاترة) في الشغلانية دي .
* الكوز يسرق منك (عرقك) ويجي يبيعو ليك (موية صحة) .
* عرقك ذاتو (يتعبأ ويتباع ليك في قارورة) .
* وتشرب وتتمطق كمان .
* والزول العبيط هو ذلك الذي يفرح عندما يشتري (حاجة حقتو) بسعر جديد .
* أبسط ليك الفهم .
* الهلال سرق من المريخ محمد الرشيد وهي سرقة (حلال) .
* الهلال لما سرق محمد الرشيد كان سعره (٦) مليار .
* قام المريخ وبطريقة (كيري ساكت) رجع محمد الرشيد بسعر (٢٤) مليار.
* ٢٤ مليار .. مليار ينطح اخوهو المليار التاني .
* وما تنسى .. (محمد الرشيد السرقو الهلال هو حق المريخ) .
* يعني المريخ إشترى حاجة حقتو ب(٢٤) مليار وهي سعرها الحقيقي (٦) مليار .
* عبيط ولا ما عبيط ؟
* ودي ما المشكلة .
* أوريك المشكلة وين.
* التسجيلات لما تبدأ المريخ ح يكتشف إنو إشترى (حاجة مسروقة) .
* وتستلم مال مسروق طوالي بيظهروا ليك ناس (المباحث) .
* والمباحث في هذا المقام هي (الفيفا) .
* افهمها كده .
* يعنى المريخ دفع (٢٤) مليار في حاجة حقتو والحاجة دي ذاتا طلعت مسروقة ما حقتو .
* وتعال أناقشك.
* كونك تصل مرحلة تفرح فيها إنو (ولدك) رجع قعد معاك في البيت ده معناها أنت اصلاً قاعد في السهلة .
* انت فرحان عشان جددت لمحمد الرشيد ( اللهو حقك) زي ما بتقول .
* طيب لو قلعت أبو عاقلة من الهلال ح تعمل شنو ؟
* نحن حقيقة نريد أن نغلق هذا الملف حتى نتفرغ لملفات ما زالت فاتحة .
* موضوع نجوم الهلال (رمضان والرشيد وأبو عشرين) ده ملف اتفقل.
* بالقانون هم في كشف الهلال .
* أنت (بنطلونك ناصل) ولا فاهم قانون ولا فاهم كورة .
* خليك كده .
* الآن نحن عندنا ملفات فاتحة ومهمة .
* وأهم هذه الملفات هي ملف خط هجوم الهلال .
* هجوم الهلال بصراحة أصبح مثل (السليقة الباردة) .
* هجوم هين جداً .
* صحيح إنو من المنتظر أن يستقبل الهلال اليوم مهاجم المنتخب الكنغولي.
* وهو بلا شك إضافة نوعية كبيرة للفريق ولكن وحده لا يكفي .
* لابد أن يستعين الهلال بمهاجمين وطنيين على درجة من التميز .
* لأنو البيعمل فيهو وليد الشعلة ده لا يسمى كرة قدم .
* ووليد ده بالذات أنا راجع ليهو .
* بجانب الهجوم يحتاج الهلال لطرفين أتنين (شمال ويمين) .
* في الشمال مرشح بخيت خميس وهو لاعب (عادي جداً) .
* بخيت لا يواكب الطفرة التي ينشدها الهلال .
* في هذه الخانة يلعب مازن طرف هلال الأبيض وهو لاعب حريف وقوي ومفيد جداً وصغير في السن .
* في خانة الطرف الأيمن مؤيد عابدين وحليبي.
* ولا بأس إضافة كابتن بشير في خط الوسط وعزام .
* الدفاع بعد إضافة المحترف الأجنبي ومحمد أحمد ووضاح سيكون في حال ممتاز .
* واصلاً حراسة المرمى في وجود الأخ غير الشقيق أبو عشرين الشهير ب(لون الدم) ما محتاجة .
* طبعا أطلقنا لقب (لون الدم) لأبو عشرين كما جا في تغريدته.
* والله العظيم يا جماعة أنا موضوع التغريدة ده بيضحكني ضحك غير عادي .
* أبو عشرين مشى قبض من الهلال ومضى العقد واشترى عربية وجاء البيت شغل المكيف ورقد في السرير وفتح الفيسبوك وكتب :(لون الدم أحمر) .
* وتعال شوف .. المريخ كلو (لاعبين وصحفيين وإداريين ومشجعين) خلوا كلو حاجة واحتفلوا بتغريدة أبو عشرين .
* ليه ؟
* قالوا الزول ده طالما قال (لون الدم أحمر) معناها بحب المريخ .
* مريخ ب(الصاء) .
* فعلاً بحب المريخ .
* هاك الحب ده .
* طبعاً ناس المريخ أمبارح مجندين حوالي (٤٥) شخص من أجل البحث عن أبو عشرين .
* وأنا بتبرع ليكم وبوريكم محلو .
* لما أنا كنت بكتب في العمود ده أبو عشرين كان في حي القلعة جنوب في مدينة الأبيض.
* وبعد خلصت العمود أبو عشرين وصل بارا .
* وهسه وانت بتقرأ في هذا العمود تقريباً أبو عشرين داخل على بابنوسة.
* ولما تلقوهو عليكم الله اسألوهو من لون الدم.
* وغايتو جنس غايتو .
* و..و..
* ونواصل .