مساهمة البشير في الجوهرة (رقصة) ومساهمتو في المريخ (إستاد بملحقاتو) !!

بالعربي الكسيح

محمد الطيب الأمين

مساهمة البشير في الجوهرة (رقصة) ومساهمتو في المريخ (إستاد بملحقاتو) !!

* من الأشياء التي كانت تشغل بالي أيام الطفولة هي (عربة المطافي) .
* كنت أفكر هل عربة المطافي بتكون (مليانة موية وقاعدة جاهزة ولا بيملوها بعد يسمعوا إنو في حريق) ؟
* وهل سبق وأن ذهبت عربة مطافي لموقع (الحريق) وتفاجأ سائقها بأنها (فاضية) ؟
* أذكر في حلتنا كان في مجموعة من الشباب كل يوم جمعة بعد الصلاة بيتصلوا على ناس المطافي ببلاغ حريق .
* ناس المطافي يجوا جاريين يلقوا (ما فيش حريق) .
* يرجعوا القسم تولع حريقة في الحلة .
* لما يتصلوا بالمطافي ما بتكون في حريقة وأول ما ناس المطافي يجوا ويرجعوا بتقوم حريقة .
* الموضوع ده اتكرر ثلاث مرات.
* المطافي تجي ما تلقى حريق المطافي ترجع يقوم حريق .
* (المطافي والحريقة) نهائي ما اتقابلوا في حلتنا .
* دائما بتعاقبو.
* زي (المريخ وإستادو) .
* المريخ هو الفريق الوحيد في العالم العندو إستاد لكن ما بلعب فيهو .
* والله صحي .
* لما الدوري يبدأ إستاد المريخ بيكون ما جاهز أول ما الدوري ينتهي بيكون الإستاد جاهز .
* إستاد اتعود على كرنفالات التخريج ولقاءات المؤتمر الوطني.
* عشان كده (المريخ والاستاد بتعاقبو) .
* سنتين المريخ ما لعب في استادو.
* تسأل يقول ليك (في صيانة) .
* الموضوع ده أكبر من (صيانة) .
* الموضوع موضوع (مصدر القروش التي شيد بها الإستاد) .
* ما في إستاد بيعملو ليهو صيانة سبع مرات في السنة الواحدة .
* (البوكس البجيب اللبن) بيمشي (المنطقة الصناعية) مرتين في السنة .
* معقولة ياخ إستاد كل ما تسأل منو يقول ليك (في الصيانة) ؟
* ده إستاد ولا (بص والي) ؟
* الصيانة الاتعملت لاستاد المريخ لو كانوا عملوها لباصات الوالي كان مشكلة المواصلات اتحلت.
* المهم .
* المريخ تقدم بطلب لإدارة الهلال من أجل إستضافة مبارياته الإفريقية.
* ليه ؟
* قالوا استادهم في الصيانة .
* أتخيل (٦) شهور الدوري واقف بسبب كورونا وجا الخريف ومع ذلك إستاد المريخ (في الصيانة) .
* إدارة الهلال رحبت بطلب المريخ .
* موافقين.
* مش ياها المباراة الواحدة دي ولا في غيرها ؟
* اصلاً أنتو افريقياً عندكم مباراة واحدة (ذهاب واياب) .
* واحدة في إستاد الهلال والثانية في بلد الخصم .
* وبعديها طيران .
* نحن والله ما عندنا مشكلة إنكم تلعبوا في إستاد الهلال .
* ما عندنا مشكلة في الحاجة دي .
* الهلال هو (كبير السودان) ومن واجبه أن يتبنى (الصغار) .
* خاصة لو الصغار ديل بيلعبوا مباراة واحدة بس .
* وما تشبكني لوح الشرف ومانديلا وبطيخ.
* كأس مانديلا مباراة النهائي كانت مع منو؟
* الأهلي المصري ؟
* كانت مع الترجي؟
* ولا كانت مع الوداد المغربي ؟
* قوم حيلك.
* أنت جبت (كأس دورة مانديلا) .
* بحسابتنا نحن هي (دورة) وانت احسبها (بطولة) .
* عموماً .. حبابكم في إستاد الهلال .
* ألعبوا في استادنا وما تتحسسوا.
* الناس بالناس .
* خليكم عاديين .
* صحيح استادكم الحفرة ده تم تشييده بمال الشعب السوداني .
* أي هلالابي عندو (طوبة) في إستاد المريخ .
* ورغم ذلك جايين يلعبوا في إستادنا الذي تم تشييده بعرق جبين الرجال .
* إستاد كل رجالات الهلال وضعوا فيه بصمات وكانت البصمة الاوضح للكاردينال .
* الكاردينال عمل الجوهرة والفندق دون أن يشيل قرش أحمر من الحكومة.
* وجمال الوالي الشهير ب(عزو) عمل الرد (كسر) دون أن يدخل يده في جيبه.
* إستاد المريخ هو أغلى هدية من حكومة الإنقاذ.
* هاك الهدية دي .
* واوع تقول لي البشير فتح الجوهرة ورقص.
* البشير كل مساهمته في الجوهرة الزرقاء (رقصة) لكن البشير ساهم للمريخ بإستاد كامل .
* عندنا (رقص بس) وعندكم عمل ليكم إستاد.
* عشان كده استادكم السنة كلها في الصيانة.
* استادكم زي الباصات الجابها عبد الرحمن الخضر .
* البص بيطلع من الورشة عشان يخش الورشة .
* أنا عندي ليكم مقترح .
* استادكم ده ازرعو (فول مصري) .
* أو بصل .
* البصل غالي جدا الأيام دي .
* مباراتكم الواحدة دي تعالوا ألعبوها في الجوهرة واستثمروا استادكم الذي هو إستاد الحكومة .
* هكذا بقترح .
* وأي زول طبعا حر في (اقتراحاتو) .
* وغايتو الله يكفينا شر (المُصدي) اللمعتو الأيام.
* ملحوظة : ( بعد جلسة مع الذات قررت تغيير إسم عمودي لاسم آخر وسيكون ذلك قريباً) .
* ونركب صافنات ونجيبة (جموعية) واصلو الزول بيموت والذكرى تفضل حية.
* و..و..
* لو سألت علينا كنت عرفت نحن الليلة وين …….. (أكيد في الصيانة دي كمان دايرة ليها سؤال) ؟