صحيفة كورة سودانية الإلكترونية

(منطق) ناس مزمل و(حمام) ناس كلتوم!!

1٬255

صابنها
محمد عبد الماجد
(منطق) ناس مزمل و(حمام) ناس كلتوم!!

زمان في حلتنا كان عندنا جارة اسمها (كلتوم)..وكان عندها (برج حمام) في البيت.
برج الحمام كان حاجة اساسية في البيوت السودانية.
الموضوع لغاية هنا عادي.
كلتوم دا كان في كل ليلة (الكديس) بدخل (برج الحمام) ويشيل ليه (جوز حمام) ويطلع.
الموضوع لغاية هنا برضو عادي.
زمان كان في ثقافة بهذا الشكل.
كدائس هذا الزمن بقت هادية ومسالمة – لي زمن ما سمعت لي بي كديس اكل ليه جوز حمام.
الكلام دا غايتو كان زمن الكيزان.
هسع ما عارف الحصل شنو؟
الما عادي كلتوم دا كانت اول زول يجي الصباح عشان يشتري منها (جوز حمام) كان اول شيء بتحاسبوا على (الجوز) الأكله الكديس.
يعني انت المشتري تحاسب كلتوم على جوزين.
نحن كنا شفوت وقت كنا نكون ناويين نشتري لينا منها (جوز حمام) كان في الليلة التى تسبق ذلك بنحرس (برج الحمام) ونعمل عليه دورية في الليل من الكدائس.
المفاجأة كانت (كلتوم) برضو بتحاسبنا على (الجوز) الأكله (الكديس) حتى لو لم يتلب في تلك الليلة (كديس) على (برج الحمام) ، فقد تعودت كلتوم على ذلك.
اول شيء بتخلص (جوز الحمام) الذي اكله (الكديس).
النظرية دي ذكرني لها اعلام المريخ ومنطق ناس مزمل ابوالقاسم . انا ما عارف والله (المنطق) دا بتجيبوه من وين؟
الناس ديل قاعدين يصدقوا انفسهم؟
بياكلوا فول؟
بيشربوا شاي المغرب؟
الناس ديل زينا كدا وإلّا عندهم (منطق) براهم؟
نحن بنعرف انو في (بنزين) مضروب ..وفي (قمح) مضروب .. وفي (دولار) مضروب ، لكن (منطق) مضروب دا ما سمعنا بيه إلّا عند المريخاب.
تتخيلوا ناس المريخ عاوزين الهلال يلعب برة استاده من اجل (عدالة المنافسة) – فقط عشان هم ملعبهم ما جاهز.
شاطرين والله.
عدالة المنافسة دي كانت وين في اتفاق المريخ والأهلي المصري غير الاخلاقي.
يعني نبقى زي كوبر وتوتي وهلال الفاشر والمريخ نلعب برة ملعبنا الذي كلف الهلال ولجنة تطبيعه الكثير.
نتمرن على ملعبنا ونلعب في ملعب تاني.
دا زي الزول المؤجر بيتو وساكن مع نسابتو!!
استاد الهلال عشان خاطر المريخاب نقلبه صالات افراح.
قابلكم (منطق) زي دا؟
انتوا مالكم عاوزين تخلوا (البنكرياس) يقوم علينا.
والله البنكرياس يسمع بي كلامك دا يتحجّر قبلو.
ناس الكورة ديل (عاطفيين) أي كلام يقولوه ليه يصدقوه.
المنطق دا بمشي فيهم عادي.
أي زول يقول ليهم كلام بصدقوه.
يا جماعة الفيفا والكاف وكل الاتحادات المحترمة بتحفّز الاندية التى تملك ملاعب جيدة وتمنحها حق ان تلعب عليها ، في الوقت الذي ترفض فيه على الاندية التى لا تملك ملاعب جيدة ان تلعب على ملاعبها.
هذا الامر هو من صميم (عدالة المنافسة).
في البطولة الافريقية – بل في كل البطولات القارية هناك اندية ومنتخبات تلعب خارج بلادها لأنها لا تملك ملاعب جاهزة وبالمواصفات التى يحددها الاتحاد الدولي.
الكلام دا قاعدة ثابتة ومبدأ اساسي في عدالة المنافسة لا عاوز ليه (انجليزي) ولا محتاج ان تدخل ليه (غوغل).
فرن ما تدخل ليه.
الهلال في الموسم الماضي لعب مبارياته الافريقية في استاده (الجوهرة الزرقاء) بعد استيفاء ملعب الهلال لشروط الكاف والفيفا ..في الوقت الذي لعب فيه المريخ في القاهرة لأن ملعبه غير جاهز.
في هذه الحالة التى كانت في الموسم الماضي الذي ما زال مستمرا حتى الآن هل سمعتم ليكم زول بتحدث عن (عدالة المنافسة)؟ ويقول الهلال مفروض يلعب خارج ملعبه لأن المريخ يلعب في القاهرة.
ذلك يعني ان الاهلي المصري يلعب خارج مصر ويلعب صن داونز خارج جنوب افريقيا عشان عدالة المنافسة.
دا منطق شنو ؟
دا (حمام) كلتوم ذاتو.
يا جماعة الاتحاد الدولي والاتحادات القارية والمحلية تعمل من اجل ان تحفّز الاندية على اصلاح ملاعبها وتدفعها الى ذلك ..وقد اصبح من شروط الصحة والسماح للمشاركة في البطولات القارية ان تمتلك ملعب جاهز ومكتمل ..او تلعب برة ملعبك.
انتوا عاوزين الهلال يلعب خارج استاد الهلال عشان بملك ملعب ممتاز ..يعني نكسّر ملعبنا ونحفّر الارضية او نجعل ارضيته (نجيل صناعي) زي استاد الخرطوم وكوبر عشان نلعب على استادنا.
الناس الذين طلعوا علينا بعد العرض الذي قدمه الهلال امام الشرطة القضارف وبعد الانتصار الكاسح الذي حققه الهلال وقالوا يجب ان يلعب الهلال خارج ملعبه عشان (عدالة المنافسة) نقول ليهم الهلال لعب الدورة الاولى كلها في (الولايات) وفي ملاعب تسببت في اصابة لاعبي الهلال والمنتخب الوطني.
هل تعلموا ان الهلال وفي شهر رمضان وفي الولايات وفي ملاعب سيئة لعب في 24 يوم فقط في الفترة ما بين 6 مايو وحتى الثلاثين من نفس الشهر (9) مباريات حقق الانتصار في ( مباريات بينما تعادل فقط امام الاهلي مروى.
هذا الامر يجب ان يحفظ للجهاز الفني للهلال الذي خاض الدورة الاولى في ظروف صعبة وحقق مع ذلك نتائج جيدة.
الهلال ادي ضريبته كاملة ومن حقه ان يلعب على ملعبه.
الهلال بعد العيد لعب ثلاث مباريات خلال ( ايام ..وهو يتجول بين عطبرة وبورتسودان والأبيض.
الهلال يعمل ليكم اكتر من كدا شنو؟
ما عاوز اتكلم ليكم عن الفريق الذي لعب الدورة الاولى وكشفه فيه (41) لاعبا غير (الحكام) وإعلامه وجماهيره يتحدث عن (عدالة المنافسة).
اين كانت عدالة المنافسة وصبري محمد فضل يحرم الهلال من هدف (شرعي) في مباراة القمة الاخيرة سجله مهاجم الهلال وليد الشعلة؟
عدالة المنافسة ظهرت الآن مع نجيل استاد الهلال.
علما ان ارضية ملعب استاد الهلال لم تكن جيدة ..وقد ظهرت بمظهر سيء في مباراة الهلال الشرطة القضارف وهذا امر يجعلنا نلوم لجنة تطبيع الهلال على تدهور الاوضاع في استاد الهلال. واضح ان الاهمال نال من ملعب الهلال.
هذا المظهر الذي ظهرت به ارضية ملعب الهلال يمكن ان يكون سببا في حرمان الهلال من ملعبه في البطولة الافريقية في الموسم الجديد.
الهلال عندما يلعب على ملعبه وعلى ارضية افضل نسبيا من ارضيات الملاعب الاخرى لا يلعب في ملعبه وحده ..بل يلعب على الارضية المنافس الذي يمكن ان يستفيد من الارضية ملثما يستفيد الهلال.
يعني الهلال ما لعب امام الشرطة في استاد الهلال في الوقت الذي لعبت فيه الشرطة امام الهلال في ملعب النقعة في دارفور.
انتوا عاوزين لجنة تطبيع الهلال تجيب (الدعم السريع) عشان يحفروا استاد الهلال عشان نلعب في ملعبنا.
نقلع النجيلة يعني؟
على اندية الولايات وعلى نادي المريخ اصلاح ملاعبهم حتى تكون جاهزة لاستقبال مبارياتهم.
الهلال ليس ملزم بان يلعب في ملاعب انديتها نفسها لا تلعب عليها.
نتمنى ان يحدث تأهيل لكل الملاعب حتى تكون جاهزة ومستوفية لشروط عدالة المنافسة حقا.
عاوزين تحاسبونا على (جوز الحمام) الذي اكله (الكديس).
منطق زي دا انا عمري ما شفتو ..ولا سمعت بيه.
……
متاريس
ما تدخلوا في جدل مع ناس المريخ.
خلوهم ..دي (هرطقة) ساكت.
كلام برة العقل.
هضربة.
ناس المريخ قالوا (كاس) لم تحرم المريخ من فترة تسجيلات جديدة.
التسجيلات القادمة سوف تأتي وح نشوف.
ورونا ح تسجلوا في فترة التسجيلات القادمة كيف؟
بالمناسبة ناس المريخ قالوا نفس الشيء عندما حرموا في احدى فترات التسجيلات وجاءت التسجيلات وفشلوا في اضافة أي عنصر لكشوفات المريخ.
السيستم عند (الفيفا).
السيستم ما عند (متعصب) عبدالسلام.
التسجيلات ما بعيدة.
(جني الوزين) خلوه يكون جاهز.
(جني الوزين) بموت في الهلال.
بالمناسبة المصطلح الجديد للعملية هو (جني الوزين).
لمن اقول ليكم (جني الوزين) خليكم عارفين انا قاصد منو؟
افهموها براكم.
تاني ما تسألوني.
ما بقول ليكم أي كلمة.
ولا بلمح ليكم.
نصف العناصر التى اختارها برهان للمنتخب من المريخ (مصابة) ولا تشارك مع فريقها.
صديق كوة ما شفنا منو حاجة غير (الحلاقة).
لو دا (كوة) ح تندموا على محمد موسي الضي.
….
ترس اخير : لو مباراة الهلال والشرطة حكمها صبري محمد فضل كان انتهت تعادل 0 / 0.

قد يعجبك أيضا
11 تعليقات
  1. صلاح يقول

    الله عليك يا ود عبد الماجد، عمود أكثر من رائع ومكتوب بحروف من ذهب !!
    أصح حاجة ذكرتها هو عدم الإنشغال بهرطقة الإعلام السالب، ويخلوهم يهرجوا كدة في الفاضي ويموتوا بغيظهم، وبالمناسبة هم زعلانين من الطاقم التدريبي المكتمل للهلال، وليهم مراد بكرة دي الهلال ينهي التعاقد مع موتا بالصباح وفي المساء حاتلقي الكاهن الأعظم أليخماو معاه في الفندف، عشان كدة شغالين يبخسوا في شغلة……
    حلمبوش ذي الشافع الصغير، عاوز أي حاجة في يد سيد البلد….!!
    …. صحي حمام ناس كلتوم !!

  2. .Musa يقول

    ود عبدرالماجد يا معزبهم

  3. ابو عمار يقول

    ياخي الواحد بياجل قراية عمودك عشان هو التحليه بالنسبه لينا تسلم ابو عبد الماجد ويسلم يراعك كلم جماعة الكورال بكره كل واحد يجيب معاه سلطانيه ياخد منك شوية منطق

    1. عوض يقول

      اكثر شي عجبني ما يخصنا الا وهو الاهتمام بالملعب والنجيل اما الباقي كما قلت لا يهمنا كلامهم في شي الذي لا يتعلم يعلم انه يعلم اذا مافي خسارة للاتحاد والمريخ اذا لماذا تم معاقبتهم بالسداد لتكاليف القضيه بغض النظر عن القرارات الاخري

  4. asam يقول

    دي الكلام البخلي ناس الدلاقين يعرفو من الطفاء النور اضرب ي عبد الماجد اصلو الجماعة طار ليهم الدرب بوقي بهضربو ساكت تسلم ايدك ي عبد الماجد دي الحسد حاسدين فريق الشعب الهلال عشان عندو إسناد وهم عندهم الحفرة العميقة هههههههاي تحياتي

  5. Hajjam يقول

    تسلم ياود عبدالماجد. بتعرف تدي الدلاقين بالحتة الفيها الحديدة. الكاهن والكورال مكابرين ولا يعترفون بالهزيمة ابدا. اليخماو رفع الشارة والكورال والمخدرين بدأوا الشتائم ضد الطاهر يونس والتقليل من قرارات كاس. مكابرتهم والتقليل من شان سيد البلد في كل شئ حتي عندما احرزوا مركز طيش اطياش افريقيا.
    ليلة الكاف فجعهم بالتصنيف الجديد ووضع الهلال الفريق رقم ١٦ بينما حلمبوش في المراكز المتأخرة ورحم الله امرئ عرف قدر نفسه

  6. Hajjam يقول

    وضع الهلال في مركز مميز ..(كاف) يصدر تصنيف للاندية يحبط عشاق المريخ
    وضع الهلال في مركز مميز ..(كاف) يصدر تصنيف للاندية يحبط عشاق المريخ

    Post Views: 16في مايو 19, 2022
    حل للهلال في المرتبة (١٦ ) في قايمة افضل الاندية الافريقية لموسم (٢٢ -٢٣ ) بمجموع نقطي بلغ (٢٤.٥ ) بينما جاء نادي المريخ في المرتبة (٢٨ ) اذ لم يحصد سوي (٩) نقاط فقط ووفقا للنسبة التراكمية التي حوتها القائمة ورصدتها (سودانافوق) فان الاهلي المصري تصدر القائمة برصيد (٧٨ )نقطة يلية الوداد المغربي برصيد (٦٨ )نقطة واستحوذ الرجاء المغربي علي المركز الثالث برصيد (٦٠ )نقطة والترجي خامسا ونهضة بركان سادسا ثم صن داونز الجنوب افريقي ومازيمبي الكنغولي وليمت الدلاقين المكابرين بغيظهم😡😡😡

  7. Badreldin يقول

    الجهل مصيبه الإفلاس مصيبه أكبر.لي حق الصفر يعشعش

  8. احمد العوض يقول

    دا قايل بغطى ( الخواء ) بتاعو ب خفة الدم ( المصطنعه ) وحياة ابوى دمو اتقل من زيت الديزل
    عندنا جارتنا … والسميح ود رجب … والسقيد ود حمد
    انت بتتكلم عن مزمل ؟؟؟
    مزمل ترتيبو الاول … انت الكم يا ابو دم شربات ؟؟؟

  9. احمد العوض يقول

    دا قايل بغطى ( الخواء ) بتاعو ب خفة الدم ( المصطنعه ) وحياة ابوى دمو اتقل من زيت الديزل
    عندنا جارتنا … والسميح ود رجب … والسقيد ود حمد
    انت بتتكلم عن مزمل ؟؟؟
    مزمل ترتيبو الاول … انت الكم يا ابو دم شربات ؟؟؟

  10. جمال الدين عمر الخليفة يقول

    ههههه والله لو اشتغل 100 سنه صحافة لي قدام مايجي ضفر مزمل قال الفيفا حرمت المريخ من التسجيلات ياخي قوم لف مزمل فاهم فوانين العبة انت خليك في حكاوي جوز الحمام والكلام الفارغ كل همك انو الهلال يسجل لاعبين من المريخ مامقتنع بي لعيبتك اسع اجاجون وفيري والجييش الجرار من الاعبين دول لو قلنا ليكم اعطونا ليهم وشييلو مننا توني توافقو جري والله لاني توني يساوي الجمبع

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد