نضرب الأهلي ونعمل (12) نقطة والمريخ يضرب ديم سلمان ويعمل (نايم)!!

بالعربي الكسيح
محمد الطيب الأمين
نضرب الأهلي ونعمل (12) نقطة والمريخ يضرب ديم سلمان ويعمل (نايم)!!

* بتذكر زمان في حلتنا عندنا جارتنا عندها ولد بليد جداً.
* النوع البيجي التاني حتى لو امتحن براهو.
* وعندنا جارتنا تانية ولدها شاطر جداً.
* بيجي الأول ومحبوب في المدرسة والحلة.
* وبخلاف الشطارة كان ولد نظيف وجسمو خالي من (شقوق الشتاء) .
* الزمن داك كلنا أجسامنا من (شقوق الشتاء) بقت زي قزاز العربية المضروب بحجر.
* أجسامنا مدشدشة عديل.
* حلتنا كلها بعد المغرب بتبكي.
* بنبكي من ألم الجرسلين في (شقوق الشتاء).
* تقريباً الوحيد الما ببكي أهو ولد جارتنا الشاطر ده.
* شاطر ونضيف.
* أها المرا دي والمرا التانية بينهم مشكلة تاريخية.
* (أم الشاطر) و(أم البليد) ما بدورن بعض.
* مقاطعين بعض وما بدخلن على بعض ولا بجاملن بعض.
* يوم النتائج أم الولد البليد لما تعرف ولدها جا الطيش بتتعامل معاهو عادي وبتقول ليهو السنة الجاية شد حيلك.
* بتقول ليهو ولا يهمك وما تزعل أنا (بحبك في كل الظروف).
* لكن المرا دي أول ما تسمع زغاريد طالعة من بيت ناس المرا الولدها شاطر طوالي كديستها بتقوم.
* لما يقولو ليها ود فلانة جا الأول بتقوم تشيل ليها أقرب عكاز وبتمشي على ولدها.
* بدق ولدها بعد تعرف نتيجة ولد المرا التانية.
* والله صحي.
* نجاح الولد داك بيزعلها أكتر من فشل ولدها.
* وبما أن ذلك كذلك أعتقد أن جمهور المريخ بالأمس، زعل من المريخ أكتر من زعلهم يوم طيران المريخ.
* بعد عرفوا نتيجة الهلال حتى ياداب زعلوا من المريخ.
* نفس فهم جارتنا.
* لما يطيروا من التمهيدي يقول ليك (نهواه في كل الظروف)، ولما يشوفوا الهلال ماشي بيزعلوا من المريخ بأثر رجعي.
* ونتيجة الزعيم أمبارح ولعت النار في السودان ومصر.
* الأهلي المصري فعل بعض المستحيل وكل الممكن من أجل أن يخسر الهلال أمام بلاتينيوم.
*ولكن ربك رب الخير انتصر الهلال.
* والنتيجة رفعت رصيد الزعيم إلى تسع نقاط.
* الأهلي اليوم يضرب النجم ويعمل عشر نقاط.
* ونجي نحن نضرب الأهلي ونعمل (12) نقطة.
* ويقوم المريخ يضرب ديم سلمان ويعمل (نايم).
* دي الحسابات كده.
* حسابات واضحة وصريحة.
* وحقيقة أكثر شيء عجبني في مباراة الأمس هو (شرف المنافسة).
* المباراة أثبتت أن الهلال نادي للتربية والقيم بالفعل.
* أي فريق في محل الهلال كان ممكن يشتري الحكم أو يشتري حتى الفريق المنافس.
* كل ظروف (البيع والشراء) كانت متوفرة.
* رئيس النادي الكاردينال موجود مع البعثة، عندنا سادومبا الزيمبابوي كان ممكن يسهل لينا، هذا فضلاً عن أن بلاتينيوم ودع المنافسة قبل المباراة.
* كل الظروف كانت مناسبة للشراء ومع ذلك تعامل الهلال بخلقه الرفيع .
* والحمدلله أفريقيا كلها شافت ركلة الجزاء الوهمية التي احتسبها الحكم ضد الهلال.
* ركلة جزاء غير صحيحة ضاعت ولو سجل منها بلاتينيوم لكسب اللقاء.
* بلاتينيوم كان الطرف الأفضل في اللقاء وقد أهدر فرص سهلة وشبه مضمونة.
* نحن فرحانين لأخلاق الهلال أكثر من فرحتنا بالنصر.
* دي أخلاق الزعيم سيد البلد الذي يقدم دروس مجانية لكل أفريقيا .
* شكراً أبطال الهلال، شكراً رئيس بعثة الهلال وشكراً رئيس الهلال.
* ألف شكر وتقدير محمد موسى الضي.
* عملتوا العليكم وخلوا الباقي علينا.
* من الليلة ما عندنا شغلة غير الأهلي.
* موت أحمر.
* يوم 1 بإذن الله هي الضربة القاضية بالنسبة (للأحمر المصري والأحيمر السوداني).
* نضرب الأحمر المصري حتى يتألم (اللحيمر السوداني).
* ونركب صافنات ونجيبه (هلالابية) وأصلو الزول بيموت والذكرى تفضل حية.
* و..و..
* وناس أفراحها زايدة وناس …. (بيبكوا من الجرسلين).