هسه نقول ليكم مبروك عليكم ولا البركة فيكم؟

بالعربي الكسيح

محمد الطيب الأمين

هسه نقول ليكم مبروك عليكم ولا البركة فيكم؟

* في المشرحة هنالك (جثث) تمضي أيام طويلة داخل (تلاجات المشرحة) لأسباب متفاوتة .
* أسباب منها .. الموت خارج أرض الوطن
أو عدم التعرف على هوية المتوفي .
* قد تمكث (الجثة) أسبوع أو أسبوعين أو شهر في (تلاجة الموتى) .
* يحدث هذا برغم إن إكرام الميت دفنه .
* في ناس (بفرشوا) عند سماع خبر الموت ولا ينتظرون (الدفن) .
* يفرشوا ويرفعوا الفراش بعد داك (الجنازة) تطلع من التلاجة .
* لما يمشوا يستلموا الجثمان يكون المرحوم اقترب من الأربعين يوما .
* تكون دموعهم إنتهت وحتى حزنهم تناقص .
* الواحد يستلم الجثمان من (التلاجة) بعد ٣٥ يوما يكون وقتها (الحزن برد) مرة واحدة .
* وبما أن ذلك كذلك فإن المريخ سيستلم اليوم (جثة أشبه بالكأس) .
* أو هو (كأس أشبه بالجثة) .
* يستلمون (الجثة من تلاجة الإتحاد العام) .
* كأس التواطؤ (٢٠١٨) ، البطولة التي حققها الهلال (جوة الملعب خدمة يمين وعرق جبين) .
* وتحصل عليها المريخ (بره الملعب خدمة مكاتب وعرق آخرين) .
* وأعوذ بالله من (عرق الآخرين) .
* البيسرق (عرق الخصم في مباراة واحدة عادي ممكن يسرق عرق الخصوم في موسم كامل) .
* لكن ما مشكلة .
* كأس السنة دي حقنا برضو .
* تعالوا شيلو.
* بحساباتنا نحن كأس (٢٠١٨) حقنا .
* ما بنعرف غير كده .
* بحسابات العرق حقنا ، أما بحسابات الما عرق .. حلال عليكم .
* وأنا والله المحيرني .. لمتين المريخ ح يكون كده ؟
* لمتين بالطريقة دي ؟
* والبيزعل أكتر هسه تلقاهم فرحانين .
* والله صحي .
* فرحانين بالجثة الباردة .
* لكن اسمعوا كلامي ده ، بعد أيام ح تسمعوا خبرين والله الدنيا تمسخ ليكم .
* جايكم القاضية .
* وتبكو بس .. عين قطرة وعين مس .
* المهم .
* الهلال اليوم أمام تحدي الخرطوم (٣) .
* طبعا (الخرطوم الوطني) إسم خرج للناس بعد شراكة النادي مع محمد عطا مدير جهاز الأمن السابق .
* وبما أن محمد عطا راح فيها وكذلك البشير ذاتو فنحن سنعود للاسم القديم .
* الهلال لا يملك خيارات أخرى بخلاف الفوز حتى يتابع انتصاراته ويواصل صدارته .
* أمام هلال كادوقلي (لعب الهلال وفاز في الشوط الأول فقط) .
* مباراة كادوقلي أكدت أن الهلال لم يتحصل على الفورمة حتى الآن.
* وهذا أمر مفهوم بالنسبة لنا ولكن نطالب بضرورة الإجتهاد أكثر.
* تاريخيا لا يعاني الهلال أمام الخرطوم (٣) .
* ولكن هذه المرة قد يعاني الهلال .
* يعاني لأن إعداده ناقص ، بينما الخرطوم أعد نفسه بصورة أكثر من ممتازة .
* نريد النقاط والمحافظة على فارق النقاط الذي نتمنى ونأمل أن يزيد هذا الفراق اليوم .
* فريق الفلاح عطبرة لو شد حيلو ممكن يعملها في (الإصيفر) .
* خسر المريخ بالتعادل أمام أهلى الخرطوم في المباراة السابقة ونأمل أن يخسر اليوم بالهزيمة .
* نأمل ذلك .
* وأي زول طبعا حر في (امالو) .
* لابد أن يحسم الهلال اللقب قبل أسبوعين تلاتة من نهاية الدوري .
* دايرين نتفرغ لإكمال الصفقات المحلية .
* صفقات ولا في الأحلام.
* تسجيلات الهلال هذا العام ستكون تحت شعار (الزول بفتخر وبباهي بالعندو) .
* والله عينكم ما تشوف إلا النور .
* والنور ذاتو مع قطوعات الكهرباء دي ما ح تشوفو .
* عينكم ما تشوف إلا الضلام .
* ونركب صافنات ونجيبة (ديامية) واصلو الزول بيموت والذكرى تفضل حية .
* و..و..
* هسه نقول ليكم مبروك عليكم ولا البركة فيكم ؟