هلاريخ شغل شاغل ومشغول !!؟
لهيب النار
هاشم الطيب
هلاريخ شغل شاغل ومشغول !!؟
& ما أن تفتح جريدة زياضية اجتماعية سياسية والا تطالع بالبنط العريض الهلال عمل وسوي عين وشطب وأقال تمرن سافر مدربين مشوكشبن من الطياره ما نزلوا رجعوا من محل ركبوا هذا حال الهلال وهشام السوباط قال صرح قابل وهلمجرا!!
& المريخ يتصدر الصحف سوداكال فعل وسوي وفتح بلاغ في الجريدة الفلانيه والأسد ما أسد وبخيت ما سبت ورمضان بعد قصير اما الرشيد قصته قصه المدرب كيسه فاضي شايله الهوا والأحمر الما وهاج وزعيم خالي أطيان بالمانشيتات والبنط العريض! !
& الريموت كنترول مؤشر الوادي كلها هلال مريخ ستات الشاي يبعن على أنغام تطاقش الكبابي لحن بالطول بالعرض مريخنا يهز الأرض في الحافله الهلال متسيطر والمريخاب في بص الوالي!!
& أصبحنا نتنفس هلال مريخ في صف الغاز البنزين الرغيف وحتي الصراف الآلي دخل الصفوف وهلال مريخ الشغل الشاغل وباكر السبت في الجزاير يا كمال التشغيل شوف ليك مخارجه وفي ستاد الجوهرة الزرقاء المريخ بدون جمهور (كوره بس) !!
& وزير الرياضه الهم الأول المريخ والهلال وكأن الرياضة فقط كورة قدم وما خلا الهلال والمريخ باطل وباني يبرمج بالمساء وبرنامج المساء يمحوه النهار والشينه منكوره وكل حاجه ولا هلاريخ والباب البيجيب الريح أقفله وارتاح وريح الجرايد !! & لاعبنا البطل القومي العداء عبد المنعم يحي من معسكره في كينيا يترقب وصول تذكرة الطياره للسفر لجيبوتي للمشاركة في نصف الماراثون الأفريقي ومنعم أيها الكرام هو بطل النسخه السابقة لهذه البطولة لاتحاد سيادة العميد هشام ولا اللجنة الأولمبية السودانية يا ريس هاشم مهتمين يسافر يقعد ما مشغولين بيه !!
خط أحمر ::
________
لا تحدثوني عن العداء عبد المنعم لو جاب كأس الماراثون العالمي وهزم جولت الجمايكي لا يساوي ذرة في لقاء السبت في ام درمان والجزائر ولسان الحال يقول قوموا بلا لمه وفعلا صدق والي الجزيره اللواء عبد الرؤوف عهد حكومة المشير سوار الدهب عندما قدمت له الدعوة لحضور مباراة أهلي إتحاد لتكريمه ماذا قال نفس القصه يا بطل عبد المنعم نحن عندنا لقاءات في الأبطال أهم من جيبوتي قال شنو نصف مارثون وسيد البلد والزعيم لاعبين تقول لي رسلوا لي تذكرة طياره !؟