ولا بتقول ديل ناس كانوا في ماضينا !!
بالعربي الكسيح
محمد الطيب الأمين
ولا بتقول ديل ناس كانوا في ماضينا !!
* ورد في الأخبار أن تعرفة تذكرة زيارة المستشفى قد زادت وأصبحت (15) جنيه للشخص الواحد ..
* الشخص (غير المريض) يدفع (15) جنيه عشان يزور الشخص المريض.
* طيب الـ(15) جنيه دي أنا لو إشتريت بيها (15) رغيفة للزول المريض مش أفضل من إني أزورو بيها جوة المستشفى ويدي فاضية ؟؟
* المريض ما بيستفيد من (زيارتي) لكن قطع شك ممكن يستفيد من (رغيفي) ..
* و(15) رغيفة ما هينة والله ..
* عموماً.. نطلب من مجلس الهلال أن يصدر نشرة يحدد فيها سعر (السيلفي مع الجوهرة الزرقاء لغير الهلالاب) ..
* بالنسبة للهلالاب السيلفي مجان، ولكن لغير الهلالاب السيلفي بقروش وذلك تماشيا مع الزيادات الحاصلة ..
* الهلالاب البحبو الهلال بدون مصلحة (السيلفي مجان)، الهلالاب جناح الأرباب السيلفي بـ(25) رغيفة، المريخاب يأخدوا السيلفي مع الجوهرة بـ(75) رغيفة ..
* وغايتو جنس غايتو..
* أكبر خطأ إرتكبه فريق الإتحاد الليبي هو تعاقده مع السماني الصاوي..
* الإتحاد الليبي سجل السماني الصاوي ويعاني الآن من طلبات المريخ الكثيرة والمسيخة ..
* منحوهم السماني الصاوي وإشترطوا عليهم الحضور إلى بورتسودان ومن ثم الخرطوم واللعب أمام أهلي شندي واللعب أمام المريخ مرتين وعدم اللعب أمام الهلال وعدم اللعب أمام هلال الأبيض ..
* المريخ على حس السماني ح يبقى للإتحاد الليبي في رقبتو ..
* زي قصة (باقة العسل) ..
* المريخ تاني لو داير (سلفية) ممكن يتصل لناس الإتحاد الليبي ، لو في لاعب مصاب في المريخ ممكن يسفرهو لطبيب الإتحاد الليبي ..
* ناس الإتحاد الليبي عشان يرتاحوا من طلبات المريخ إلا يشطبوا السماني الصاوي ده ..
* أتوقع إنو رئيس الإتحاد الليبي يقول لمجلس المريخ : (مش ده السماني شيلو ما دايرنو) ..
* لكن الخوف تاااااااني ناس المريخ يمشوا للإتحاد الليبي ويقولوا ليهم : (نحن الناس الرجعتو ليهم السماني) ..
* حاجة تكسف ..
* كل المباريات التى خاضها منتخبنا الوطني في بطولة الشان (كوم) ومباراة اليوم (كوم تاني) ..
* وإذا كان المنتخب النيجيري خطير فان منتخبنا أخطر ..
* وحتى نثبت ذلك لابد أن نقدم كل ما عندنا وأن نجتهد حتى نثبت إننا الأفضل ..
* ربما يكون خط هجوم المنتخب النيجيري أضعف خطوطه الثلاثة وبالمقابل أن دفاع منتخبنا ليس هو الأقوى بين خطوطنا الثلاثة ..
* الحذر واجب ..
* نتمنى التوفيق لمنتخبنا الذي خذل كل التوقعات وكان أفضل وأقوى من تشاؤمنا ..
* وحقيقة نتعاطف كثيراً مع النجم محمد أحمد بشة الذي يعاني من رهق كبير ..
* بشة تم إستهلاكه بشكل كبير في موسم الهلال الأخير وقد أثر ذلك على مستواه في خواتيم الموسم والآن مع المنتخب الوطني ..
* بشة محتاج راحة لا تقل عن أسبوعين ..
* ولو لم يرتاح لن يستفيد منه الهلال في الموسم الذي هو على الأبواب الآن ..
* ريحوهو هسه عشان يرجع ويقدم الأفضل ..
* صحيح ان الهلال مجابه بمباراة ليبيريا ويحتاج لجهود بشة ولكن لا أتوقع أن يقدم بشة أكثر من الذي يقدمه هذه الأيام مع المنتخب ..
* عموماً كل التوفيق للنجم الكبير بشة ولكل أخوانه ..
* تردد أن فريق قورماهيا قد طلب (150) ألف دولار مقابل مقابلة الهلال ودياً بكينيا ..
* لا أعرف مدى صحة هذه المعلومة ولكن نتساءل : (شن طعم قورماهيا عشان يطلب مبلغ قدر ده) ؟؟
* الـ(150) ألف دولار دي ممكن نجيب بيها الترجي التونسي ومعاهو الوحدات الأردني (هوادة) ..
* قورماهيا يفترض هو اليدفع عشان يلعب مع الهلال ..
* إذا صح أن قورماهيا طلب هذا المبلغ فننصح الهلال بأن يلعب مع حي العرب (تاني) ومع ود هاشم سنار (تاني) ونبقى مارقين علي ليبيريا ..
* المهم ..
* تمر علينا اليوم الأربعاء الذكرى الشهرية السادسة للمريخ بدون رئيس ..
* عليك الله شوف الأيام دي بتجري كيف ؟؟
* قريب ده إحتفلنا بالذكرى الشهرية الثانية للمريخ بدون رئيس ..
* واليوم نحتفل بالذكرى الشهرية السادسة ..
* الأيام بتجري والله ..
* عموماً.. أنسب زول يترأس المريخ هو صلاح ادريس..
* أنا ما عارف ليه خطوة إنتخاب أو تعيين الأرباب رئيساً للمريخ تأخرت كل هذه الفترة ..
* الأرباب يجب أن يكسب زمنه ويجلس على كرسي المريخ حتى (يعادي) الهلال بشكل أوضح وأفضل ..
* أهلي شندي ما ح يبقى هلال عشان كده الأرباب يفترض يكسب زمنو ويجي المريخ عديييل ..
* والمريخ لن يجد رئيساً (يعادي) الهلال أكثر من صلاح ادريس..
* بمناسبة صلاح ادريس ..
* قناة المريخ سيتم إفتتاحها بعد أن أصبح طابق شاخور مثل مدرجات الهلال الشعبية قبل (15) سنة ..
* هسه تلقوا ليكم مريخاب وين عشان يشتغلوا في قناتكم ..
* الحسنة الوحيدة في قناة المريخ إنو ح يشيلوا سهام عمر (المريخابية) من قناة الهلال ..
* دي الحسنة الوحيدة ..
* غير كده أنا ما شايف إنو في سبب بخليكم تعملوا قناة ..
* ما في سبب ..
* قناة لشنو يعني ؟؟
* هو في زول بيعمل قناة وما عندو رئيس نادي ؟؟
* إنتو كده ألقوا ليكم (رئيس) بعد داك القناة هينة ..
* القناة أسهل من إيجاد رئيس ..
* بعدين يفترض إنكم تعملوا جريدة بعد داك تفكروا في القناة ..
* ما تقلدوا الهلال ..
* الهلال عندو إمكانيات وإنتو ما عندكم ..
* نفعتكم قروش الصاوي (القربت تنتهي دي) ..
* وإن شاء الله تنتهي وتريحنا ..
* وغايتو السنة دي بالذات يا متنا من الضحك ويا كمان الضحك كتلنا ..
* ونركب صافنات ونجيبة (رزيقية) وأصلو الزول بيموت والذكرى تفضل حية ..
* و..و..
* وبقيت تمر بينا ومحال تجيني علينا ولا بتقول ديل ناس كانوا ……(بيقرضوا معانا الرغيف) ..
حمل تطبيق كورة سودانية لتصفح أسرع وأسهل
لزوارنا من السودان متجر موبايل1
http://www.1mobile.com/net.koorasudan.app-2451076.html
2,456حملو التطبيق
لزوارنا من جميع انحاء العالم من متجر قوقل
https://play.google.com/store/apps/details?id=net.koorasudan.app
17756 حملو التطبيق
على متجر apkpure
https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app
على متجر facequizz
http://www.facequizz.com/android/apk/1995361/
على متجر mobogenie
https://www.mobogenie.com/download-net.koorasudan.app-3573651.html
على متجر apk-dl
http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9
على متجر apkname
https://apkname.com/ar/net.koorasudan.app