يا خافظ كلامك شين !!
لهيب النار
هاشم الطيب
يا خافظ كلامك شين !!
* الشاب الوجيه المريخي القُح حافظ محمد احمد سل سيفه اقصد قلمه وهاك يا هجوم علي التحكبم والحكام وتحريش جماهير المريخ ضد قليلة الحكام وكل ما يصبح صباح ويتعثر الزعبم بفعل نجومه يتحول حافظ سبب النقيط الحكم صبري الحيطه القصيره !!
* يا ولدنا حافظ نعاين في الفيل وتطعن الضُل عيب والله !!
* ما كنت بتشكر طيلة الايام الفائته في ريكاردو ريكاردو نجح رياكادرو عمل وفعل الجد شنو الخلاه يربط عفشه استعداداً المغادرة !!؟؟ * ،ابداً ابداً لا الومك زول في كل مايخته( سخطه ) براعم !!
* اظنكم لاحظتوا كترت علامات التعجب لاني متعجب ومستغرب في كلام زول فهمه في الكوره زي فهمي للغة الصينيه !!
*يا حافظ اقول ليك بالدارجي عدييييل ابعد من الحكام والتحكيم لانك لا تفقه شيء في هذه الروايه !!
* مرات حافظ وهو ماحافظ اي حاجه مرات يشكر هذا وتارة شغال تحريش اللاعبين ضد مدربهم البرازيلي الذي لم يترك الفرصه للعقرب ووصي بمعاقبة نمر والتش ما عارف شنو وشنو وشنو !!
* مادام بتعرف ده كله يا حافظ مضيعين مال المريخ الما عارف كوعه من بوعه مالكم أمسك قيادة الجهاز الفني وتريح جيوب ابو جبين من صرف الدولارات في مدرب كيسه فاااضي !!!
* المريخ في القضارف فاز بشق الانفس حافظ قال جماهير القضارف فرقوها بالبنبان والحكم خرج بعد حصار .!! ّّ
* الحكم صبري طرد نمر بدون ذنب جناه صلاح صاح والحكم حاقد ومر….!!!مش احسن تجي تحكم وتخلي الكتابه الما جايبه حقها .!!!
* ولدنا حافظ لو عاوز تصبح ناقد صاح مثل المراحيم عمر عبدالتام وحسن عز الدين واحمد محمد الحسن ركز في الكوره سوف موقع الحكم وين عندما احتسب ركلة الجزاء ولو بعيد أو قريب لكن حكاية حكم متحيز ما حبابا !!!
* لو تظن يا حافظ المريخ مريخك لوحدك فقد ظلمت المريخ ونفسك لأن الملايين تعشق المريخ حتي النخاع وانت نقطة في محيط المريخ الما ليه حدود ولا عدد !!
@** يا حارس يمينك ::
~~~~~~~~~~~~
قالوا اقلعت طائرة من مطار الخرطوم وعلي متنها مائة وكم شاب وشابه برءاسة الشيخ لإظهاره شيخ الامين علي التذاكر والاقامة والاكل وتذاكر المونديال علي حساب الشيخ وبركات الشيخ لحقت اسود الاطلس ولولاه ما كانت الاسود عبرت بعدما سمع الحارس صدي صوت الشيخ يمينك وصد الركلة الرابعة يا ساريا الجبل !!!
يا عمك انت ما شفت كورة وضاح الماشة القون ومنو الصداها.. معقولة انت ما شاهدت كورة شلش؟ ولا ما شاهدت ماذا فعل المحبوب اما صبري فهذا قصة حقد قبيحة جابت ليها هدف رابع بعد تدمير جبرة والعقرب وقصة تيري كما قال نمر اتهمه بالرشوة وهل سيؤدي القسم على ذلك والا سيكون مخلب قط مثل باقي حكام صلاح صالح والنجومي.. يا عمك ما تشيلك الهاشمية باعتبارك حكم متقاعد وتدافع عن الظالمين.. قسما بالله العلي العظيم التحكيم في أسوأ ناس ينضحون حقدا على المريخ وصبري بتاعك دا اولهم وما محتاح إضاءة وعندك عبدالعزيز جعفر الحاقد ووليد الطيب وكتاب نحن عافنهم لكن نشكوهم لله المنتقم الجبار فهو أولى بهم.
كلامك في هذا الذي لا ما أسميه … كلام صحيح مائة بالمائة.
ههههه عمك حاول يبقي محايد ويكسب أراضي جديدة. لكن الصبي العجوز مستعارخي ردمه ردم الجن 😆😆😆
طويس ما بطال يا حاج….!!