ﺗﺎﻧﻲ ﺟﺎﺑﻮ ﺳﻴﺮﺓ ﺍﻟﺰﻣﺒﻘﺔ

ﻧﺒﺾ ﺍﻟﺼﻔﻮﺓ
ﺍﻣﻴﺮ ﻋﻮﺽ

ﻳﺎﺥ ﺃﻧﺎ ﺇﻗﺘﻨﻌﺖ ﺃﻧﻮ ﺍﻟﻤﺮﻳﺨﺎﺏ ﺩﻳﻞ ﻣﻀﻄﻬﺪﻳﻦ ﺍﻟﻬﻼ‌ﻻ‌ﺏ.
ﺃﺻﻠﻮ ﻣﺎﻑ ﻣﺴﺎﻭﺍﺓ ﻓﻲ ﺍﻟﺒﻠﺪ ﺩﻱ.
ﺇﺿﻄﻬﺎﺩ ﺭﺳﻤﻲ ﻭ ﺷﻌﺒﻲ.
ﻳﺎﺥ ﻣﺎ ﻣﻤﻜﻦ.. ﻗﺒﻞ ﺍﻟﻜﻮﺭﺓ ﺗﺒﺪﺃ ﺍﻟﻤﺮﻳﺨﺎﺏ ﻧﺰﻟﻮﺍ ﺇﺣﺼﺎﺋﻴﺎﺕ ﻟﻠﻘﻤﺔ ﺗﻄﻤﻢ ﺍﻟﺒﻄﻦ.
ﺇﺣﺼﺎﺋﻴﺎﺕ ﻋﻤﻠﺖ ﺃﺯﻣﺔ ﻓﻲ ﺍﻟﻠﻴﻤﻮﻥ.
ﺍﻟﺴﻔﻦ ﺃﺏ ﺍﻹ‌ﺗﺒﺎﻉ ﺍﻟﻠﻴﻠﺔ ﻓﻲ ﺳﻨﺔ ﻛﺎﻣﻠﺔ ﻣﺎ ﺇﺗﺒﺎﻉ.
ﻗﺎﻟﻮﺍ ﻓﺮﻕ ﺍﻟﻤﺒﺎﺭﻳﺎﺕ (٣٢) ﺇﻧﺘﺼﺎﺭ.
ﻭ ﻳﺠﻲ ﻭﺍﺣﺪ ﻳﻘﻮﻝ ﻟﻴﻚ ﺍﻟﺒﻠﺪ ﺩﻱ ﻓﻴﻬﺎ ﻣﺴﺎﻭﺍﺓ!!
ﻭ ﺃﺭﻗﺎﻡ ﻗﻴﺎﺳﻴﺔ ﻛﻤﺎﻥ.
ﺑﻠﺪ ﺍﻟﻤﺮﻳﺦ ﻓﻴﻬﺎ ﺳﺎﺣﻖ ﺍﻟﻬﻼ‌ﻝ ﻓﻲ ﻛﻞ ﺍﻟﺒﻄﻮﻻ‌ﺕ ﻭ ﺍﻟﻤﻮﺍﺟﻬﺎﺕ ﻟﻤﺎ ﺟﺎﺏ ﻟﻴﻬﻢ ﻧﻔﺴﻴﺎﺕ.
ﺧﻼ‌ﻫﻢ ﻳﻔﺘﺸﻮﺍ ﻋﻦ ﺭﻗﻢ ﻗﻴﺎﺳﻲ ﻓﻲ ﺑﻄﻮﻟﺔ ﻭﺍﺣﺪﺓ.
ﻧﻐﻠﺒﻬﻢ ﺃﻓﺮﻳﻘﻴﺎً ﻭ ﻧﻠﻄﺸﻬﻢ ﻓﻲ ﻗﻤﺔ ﺩﻋﻢ ﺍﻟﻄﻼ‌ﺏ ﻭ ﻳﺠﻮ ﻳﻘﻮﻟﻮﺍ ﻟﻴﻚ ﻋﻨﺪﻧﺎ ﺭﻗﻢ ﻗﻴﺎﺳﻲ ﻓﻲ ﺍﻟﻤﻤﺘﺎﺯ!!
ﺍﻟﺮﻗﻢ ﺍﻟﻘﻴﺎﺳﻲ ﺍﻟﺒﻔﻄﻮ ﻟﻴﻬﻮ ﺍﻟﻐﻠﺐ ﺩﻩ ﺃﺻﻠﻮ ﻣﺎ ﻓﻬﻤﻨﺎﻫﻮ.
ﻣﺒﺎﺭﻳﺎﺗﻮ ﺗﻔﺘﺸﻬﺎ ﻓﺘﻴﺶ.
ﺭﻗﻢ ﺯﻱ (ﺍﻟﺴﺮﻳﺤﺔ).
ﻣﺎ ﺑﺘﺸﺎﻑ.
ﺍﻟﻤﻬﻢ ﺍﻟﻤﺮﻳﺨﺎﺏ ﺍﻟﻠﻴﻠﺔ ﻗﺎﻟﻮﺍ ﺍﻟﺰﻣﺒﻮﻕ ﺩﻩ ﺑﻨﺤﺪﺩﻫﺎ ﻣﻌﺎﻫﻮ.
ﻳﺎ ﻧﺤﻦ ﻳﺎ ﺭﻗﻢ (ﺍﻟﺴﺮﻳﺤﺔ) ﺍﻟﻤﺪﺳﻮﺱ ﺩﻩ.
ﻗﺒﻞ ﺍﻟﻜﻮﺭﺓ ﺗﺒﺪﺃ ﺍﻹ‌ﺿﻄﻬﺎﺩ ﺑﺪﺃ.
ﺍﻟﻤﺪﺭﺟﺎﺕ ﺍﻟﺤﻤﺮﺍﺀ ﻛﻠﻬﺎ ﻫﺘﻔﺖ (ﺍﻟﻄﻴﺶ.. ﺍﻟﻄﻴﺶ).
ﺟﻨﺲ ﻣﺴﺎﺧﺔ ﻏﺎﻳﺘﻮ.
ﺍﻟﻨﺎﺱ ﺩﻳﻞ ﻛﻠﻤﺎ ﻳﻨﺴﻮﺍ ﺍﻟﻤﺮﻳﺨﺎﺏ ﻳﺠﻴﺒﻮ ﺳﻴﺮﺓ ﺍﻟﺰﻣﺒﻘﺔ.
ﻃﻴﺶ ﺃﻓﺮﻳﻘﻴﺎ ﺩﻱ ﺃﺻﻠﻮ ﻣﺎ ﺧﻠﻮﻫﺎ.
ﺇﺿﻄﻬﺎﺩ ﻏﺮﻳﺐ!!
ﺇﺩﺍﺭﺓ ﺍﻟﻤﺮﻳﺦ ﻗﺒﻞ ﻳﻮﻣﻴﻦ ﺟﺎﺑﺖ ﺳﻴﺮﺓ ﻛﺸﻒ ﺍﻟﻤﻨﺸﻄﺎﺕ.
ﺩﻩ ﻛﻤﺎﻥ ﺇﺿﻄﻬﺎﺩ ﺟﺪﻳﺪ؟
ﻣﻨﺸﻄﺎﺕ ﺷﻨﻮ ﻳﺎ ﻣﺮﻳﺨﺎﺏ؟
ﺍﻟﻨﺎﺱ ﺩﻳﻞ ﻋﻨﺪﻫﻢ ﻏﺮﻓﺔ (ﻣﺨﺪﺭﺍﺕ) ﻭ ﺍﻧﺘﻮ ﺗﺘﻜﻠﻤﻮﺍ ﻋﻦ ﺍﻟﻤﻨﺸﻄﺎﺕ؟!
ﻟﻴﻪ ﻳﺎ ﺍﺣﻤﺪ ﻣﺨﺘﺎﺭ ﺗﻘﻮﻝ ﻛﺪﻩ؟
ﻣﻨﺸﻄﺎﺕ ﻛﻴﻒ ﻭ ﺯﻣﺒﻘﺔ ﺑﻨﻲ ﺍﻟﻐﺮﻓﺔ ﺩﻱ ﺗﺤﺪﻳﺪﺍً ﻋﻠﺸﺎﻥ ﻳﻜﺎﻓﺤﻬﺎ؟
ﺃﻫﻮ ﺇﺿﻄﻬﺎﺩﻛﻢ ﺩﻩ ﺧﻠﻲ ﺑﺸﺔ ﻳﺘﻢ ﺍﻟﺸﻮﻁ ﺍﻷ‌ﻭﻝ ﺑﻜﺮﺍﻣﺔ ﺍﻟﺒﻠﻴﻠﺔ.
ﺧﻠﻲ ﺃﻟﻤﻨﻐﻮ ﺃﺗﻌﻮﻕ ﺑﺪﻭﻥ ﺯﻭﻝ ﻳﻠﻤﺴﻮ.
ﺇﺿﻄﻬﺎﺩ ﺇﺗﺴﺒﺐ ﻓﻲ ﻃﻠﻮﻉ ﺃﺑﻮ ﻋﺎﻗﻠﺔ.
ﺑﺎﻟﻐﺘﻮ ﻣﻊ ﺍﻟﺰﻣﺒﻮﻕ ﻟﻜﻦ.
ﺧﺴﺎﺭﺓ ﺍﻟﻐﺪﺍﺀ ﺍﻻ‌ﺗﻐﺪﺍﻫﻮ ﻛﺮﺩﻧﺔ ﻣﻊ ﺍﻟﻤﻮﺍﺳﻴﺮ.
ﻧﺎﺱ ﺃﻃﻬﺮ ﻳﺠﻐﻤﻮ ﻓﻲ ﻣﻮﻳﺔ ﺍﻟﺼﺤﺔ ﻭ ﻧﻔﺴﻬﻢ ﻣﺎﺭﻗﺔ ﻣﻦ ﺍﻷ‌ﻛﻞ.
ﺃﻃﻬﺮ ﻛﻠﻤﺎ ﻳﺘﺬﻛﺮ ﺍﻟﺘﺶ ﻭ ﺗﻴﺮﻱ ﻳﺤﺲ ﺑﺎﻟﺤﻴﺮﻗﺎﻥ.
ﺑﻮﻱ ﺍﻷ‌ﺭﻭﺵ ﻭ ﺍﻟﺠﺮﻳﻒ ﺯﻱ ﺍﻷ‌ﻃﺮﺵ ﻓﻲ ﺍﻟﺰﻓﺔ.
ﺃﻭﻝ ﻣﺮﺓ ﺃﺷﻮﻑ ﻟﻲ ﻗﻠﺒﻲ ﺩﻓﺎﻉ ﻳﻌﻤﻠﻮﺍ ﺿﺮﺑﺘﻲ ﺟﺰﺍﺀ ﻓﻲ ﻣﺒﺎﺭﺍﺓ ﻭﺍﺣﺪﺓ ﻭ ﻓﻲ ﺷﻮﻁ ﻭﺍﺣﺪ.
ﺩﻩ ﺷﻨﻮ ﺍﻟﺒﺰﺍﺭ ﺩﻩ؟
ﻋﺎﺭﻓﻨﻜﻢ ﻛﻴﺸﺔ ﻟﻜﻦ ﻛﻤﺎﻥ ﻣﺎ ﺗﺒﺎﻟﻐﻮ.
ﺍﻟﻤﻮﺝ (ﺍﻷ‌ﺯﺭﻍ) ﺩﻩ ﻣﺼﺮﺍﻧﻮ ﺍﻷ‌ﻋﻮﺭ ﻗﺮﺏ ﻳﻨﻔﺠﺮ.
ﺩﻱ ﺍﻟﺤﺎﻟﺔ ﻗﻌﺪﻭﺍ ﺍﻟﻤﺎﺳﻮﺭﺓ ﺍﻟﻘﻠﻔﻨﺎﻳﺰ ﻣﺤﻤﺪ ﺍﻟﻤﻌﺘﺼﻢ ﺑﺮﻩ!!
ﺟﺎﺑﻮ ﻟﻴﻨﺎ ﺛﻨﺎﺋﻲ ﻃﻴﻮﺭ ﺍﻟﺠﻨﺔ ﻋﻠﺸﺎﻥ ﻳﺤﺮﺳﻮﺍ ﺍﻟﺠﻨﻴﻨﺔ.
ﺟﻨﻴﻨﺔ ﻭ ﻏﻔﻴﺮﻫﺎ ﻧﺎﺋﻢ.
ﺍﻟﻤﺒﺎﺭﺍﺓ ﺩﻱ ﻣﻦ ﺑﺪﺍﻳﺎﺗﻬﺎ ﻋﺮﻓﺘﻬﺎ ﻓﻴﻬﺎ ﺯﻣﺒﻘﺔ.
ﺍﻟﺰﻣﺒﻘﺔ ﻧﺤﻦ ﺑﻘﻴﻨﺎ ﻧﻌﺮﻓﻬﺎ ﻣﻦ ﺍﻟﺮﻳﺤﺔ.
ﺍﻟﻤﺮﻳﺨﺎﺏ ﻋﺎﺭﻓﻴﻦ ﻃﻴﺶ ﺃﻓﺮﻳﻘﻴﺎ ﺟﻨﺎﺯﺓ ﺑﺤﺮ ﻭ ﻋﻤﻠﻮﺍ ﻓﻴﻬﺎ ﻋﻤﻴﺎﻧﻴﻦ.
ﻗﺎﻟﻮﺍ ﻳﺎ ﻧﺤﻦ ﻳﺎ ﺍﻟﺮﻗﻢ ﺍﻟﻘﻴﺎﺳﻲ.
ﺣﻠﻔﻮﺍ ﻳﻘﻄﻌﻮﺍ ﺍﻟﻠﺴﺎﻥ ﺍﻟﻄﻮﻳﻞ ﺩﻩ.
ﻣﻦ ﻟﻐﺎﻟﻴﻐﻮ.
ﺍﻟﻠﻴﻠﺔ ﺍﻟﺠﻌﻴﺮ ﺣﻴﺪﻭﺭ ﻓﻲ ﺍﻟﺘﺤﻜﻴﻢ.
ﻣﺎ ﻣﺘﻌﻮﺩﻳﻦ ﻋﻠﻲ ﺍﻟﺒﻠﻨﺘﻴﺎﺕ ﺩﻱ ﻛﻠﻬﺎ.
ﻧﺎﺱ ﺍﻟﺠﺮﻳﻒ ﺩﻳﻞ ﺑﺮﻓﺴﻮ ﺯﻱ ﻣﺎ ﻋﺎﻳﺰﻳﻦ ﺯﻭﻝ ﺑﺴﺄﻟﻬﻢ ﻣﺎﻑ.
ﺑﻠﻨﺘﻴﻦ ﻓﻲ ﺷﻮﻁ ﻭﺍﺣﺪ؟
ﺧﻠﻴﺘﻮ ﺷﻨﻮ ﺗﺎﻧﻲ ﻳﺎ ﻛﺘﻴﺒﺔ (ﺍﻟﻤﻮﺍﺳﻴﺮ ﺗﻴﻢ).
ﺯﻧﺒﻘﺔ ﺩﻩ ﻣﺎ ﻟﻮﻣﺘﻮﻫﻮ ﻣﻊ ﺍﻟﻤﻌﺎﺭﺿﺔ.
ﻳﻮﺩﻱ ﻭﺷﻮ ﻭﻳﻦ ﻣﻦ ﺍﻷ‌ﺭﺑﺎﺏ؟
ﻳﺘﻀﺎﻳﺮ ﻛﻴﻒ ﻣﻦ ﺍﻟﺒﺮﻳﺮ؟
ﺣﺮﺍﻡ ﻋﻠﻴﻜﻢ ﻳﺎﺥ.
ﻛﺪﻩ ﺍﻟﻜﻮﻧﻔﻴﺪﺭﺍﻟﻴﺔ ﺿﺎﻋﺖ ﻭ ﻛﺄﺱ ﺍﻟﺴﻮﺩﺍﻥ ﺭﺍﺡ ﻭ ﺍﻟﻤﻤﺘﺎﺯ ﺩﺍﺏ.
ﻗﻠﺘﻮ ﻟﻲ ﻗﺎﻝ ﻟﻴﻜﻢ ﺍﻧﺎ ﻣﺎ ﻋﺎﻳﺰ ﺍﻟﻜﻮﻧﻔﻴﺪﺭﺍﻟﻴﺔ ﻭ ﻋﺎﻳﺰﻛﻢ ﺗﻐﻠﺒﻮ ﺍﻟﻤﺮﻳﺦ ﺑﺲ!!
ﻛﺮﺩﻧﺔ ﺩﻩ ﻟﺬﻳﺬ ﺧﻼ‌ﺹ.
ﻣﻦ ﺍﻟﺒﺪﺍﻳﺎﺕ ﻛﺎﻥ ﺣﺎﺳﻲ ﺑﺎﻟﺰﻣﺒﻘﺔ.
ﻋﺎﺭﻓﻜﻢ ﻣﺎ ﺑﺘﻨﺴﺘﺮﻭﺍ.
ﻣﺨﺼﻮﺹ ﻗﺎﻝ ﻳﻤﺸﻲ ﻣﺤﻞ ﺍﻟﺮﻫﻴﻔﺔ.
ﻛﺮﺩﻧﺔ ﺧﺎﻳﻒ ﺍﻟﺮﻫﻴﻔﺔ ﺗﻨﻘﺪ.
ﺍﻟﻜﻼ‌ﻡ ﺩﻩ ﻗﺒﻞ ﺍﻟﻤﻌﺎﺭﺿﺔ ﺗﻈﻬﺮ.
ﻗﺒﻞ (ﺍﻟﺤﺸﺮﺍﺕ ﻭ ﺍﻟﻜﻼ‌ﺏ) ﻳﻈﻬﺮﻭﺍ.
ﻣﻦ ﺍﻟﻠﻴﻠﺔ ﺣﻨﺸﻮﻑ ﺩﺍﺭﺍﻣﺎﺕ ﻋﺠﻴﺒﺔ.
ﺣﺮﺏ ﺍﻟﺒﻴﺎﻧﺎﺕ ﺣﺘﺪﻭﺭ.
ﺍﻟﺠﻤﻌﻴﺔ ﺍﻟﺠﺎﻳﻪ ﻛﺮﺩﻧﺔ ﻳﺸﻮﻑ ﻟﻴﻬﻮ ﺻِﺮﻓﺔ.
ﺑﻌﺪ ﺍﻟﺘﻠﻄﻴﺶ ﺩﻩ ﺍﻟﻠﻪ ﺍﻟﻌﻠﻴﻢ ﺗﻘﻌﺪ ﺗﺎﻧﻲ.
ﺧﺴﺎﺭﺓ ﺍﻟﺴﻴﺦ.
ﺍﻟﻘﺎﻝ ﻟﻴﻚ ﻣﻨﻮ ﺗﺠﻲ ﻗﺪﺍﻡ ﺍﻟﻘﻄﺮ.
ﻳﺎ ﺣﻠﻴﻠﻚ ﻳﺎ ﺯﻣﺒﻘﺔ.
ﺣﺘﻮﺣﺸﻨﺎ.
ﺍﻟﺰﻣﺒﻮﻕ ﺩﻩ ﺣﻴﺴﺎﻓﺮ ﺷﻨﺪﻱ ﻛﻴﻒ؟
ﻣﺎﺷﻴﻦ ﻳﻌﻤﻠﻮﺍ ﺷﻨﻮ ﻫﻨﺎﻙ؟
ﺃﻭﻻ‌ﺩ ﺍﻷ‌ﺭﺑﺎﺏ ﺑﺴﻔﻔﻮﻛﻢ ﺍﻟﺘﺮﺍﺏ.
ﻳﺎ ﺣﻠﻴﻞ ﺍﻟﺪﻭﺭﻱ.
ﻻ‌ ﺩﺍﺋﻢ ﺇﻻ‌ ﻭﺟﻪ ﺍﻟﻠﻪ.
ﺍﻟﻌﺮﺍﺏ ﺭﺍﺟﻴﻬﻮ ﺍﻟﺨﺮﺍﺏ.
ﻣﻴﺘﻪ ﻭ ﺧﺮﺍﺏ ﺩﻳﺎﺭ.
ﺣﻘﻮ ﺍﻟﻨﺎﺱ ﺗﺤﺎﻭﻝ ﺗﻌﻤﻞ ﺑﻴﺎﻥ ﺳﺮﻳﻊ.
ﺑﻴﺎﻥ ﺇﺩﺍﻧﺔ ﻟﻠﺘﺤﻜﻴﻢ.
ﻳﻄﻠﻊ ﺯﻣﺒﻘﺔ ﻓﻲ ﻗﻨﺎﺗﻮ ﻳﻬﺪﺩ ﺍﻹ‌ﺗﺤﺎﺩ.
ﻣﺎ ﺗﻘﻌﺪﻭﺍ ﺳﺎﻛﺖ.
ﻗﺒﻞ ﻛﺪﻩ ﻛﻠﻤﺘﻜﻢ ﻋﻦ (ﺍﻟﻜﻀﻢ).
ﻣﺎ ﺗﻜﻀﻤﻮﺍ ﺍﻟﻮﺟﻊ.
ﻓﻀﻔﻀﻮﺍ.
ﺃﺑﻜﻮﺍ ﻭ ﺍﺭﺗﺎﺣﻮﺍ.
ﺍﻟﺴﻨﺔ ﺩﻱ ﺭﻳﻘﻜﻢ ﻧﺸﻒ ﻣﻦ ﺍﻟﺒﻜﺎﺀ.
ﺩﻣﻌﺘﻜﻢ ﺑﻘﺖ ﻗﺮﻳﺒﺔ.
ﺗﺸﻮﻓﻮﺍ ﺃﻱ ﺻﻴﻮﺍﻥ ﻃﻮﺍﻟﻲ ﺗﺪﻣﻌﻮﺍ.
ﻋﺎﻡ ﺍﻟﺮﻣﺎﺩﺓ ﺍﻷ‌ﺯﺭﻕ.
ﺳﻨﺔ ﻛﺒﻴﺴﺔ ﻋﻠﻴﻜﻢ.
ﻃﻴﺮﺍﻥ ﻣﻦ ﺗﻤﻬﻴﺪﻱ ﺍﻷ‌ﺑﻄﺎﻝ.
ﺭﻓﺮﻓﻪ ﻣﻦ ﺗﻤﻬﻴﺪﻱ ﻛﺄﺱ ﺍﻟﺴﻮﺩﺍﻥ.
ﻃﻴﺶ ﺍﻟﻜﻮﻧﻔﻴﺪﺭﺍﻟﻴﺔ.
ﻭ ﺍﻟﻤﻤﺘﺎﺯ ﻓﻲ ﺍﻟﺒﺎﻱ ﺑﺎﻱ.
ﻃﻴﺎﺷﺔ (ﺩﻓﻊ ﺭﺑﺎﻋﻲ).
ﺑﺎﻟﻤﻨﺎﺳﺒﺔ ﻓﻲ ﻗﻤﺔ ﺗﺎﻧﻲ ﺑﻌﺪ ﺃﺳﺒﻮﻋﻴﻦ.
ﻏُﻤﺔ ﺟﺪﻳﺪﺓ.
ﺃﻭﻉ ﺗﻨﺴﺤﺒﻮﺍ.
ﻣﺤﺘﺎﺟﻴﻦ ﻟﻴﻜﻢ ﻓﻲ ﺭﻗﻢ ﻗﻴﺎﺳﻲ.
ﻋﺎﻳﺰﻳﻦ ﺍﻟﻔﺮﻕ ﻓﻲ ﻋﺪﺩ ﻣﺮﺍﺕ ﺍﻟﻔﻮﺯ ﺑﺎﻟﻘﻤﺔ ﻳﺼﻞ ﻟﻠﺮﻗﻢ (34).
ﻟﻮ ﻣﺎ ﻃﺮﺗﻮ ﻣﻦ ﺗﻤﻬﻴﺪﻱ ﻛﺄﺱ ﺍﻟﺴﻮﺩﺍﻥ ﻛﺎﻥ ﻭﺻﻠﻨﺎ (35).
ﺧﺴﺎﺭﺓ.. ﻣﺎ ﻋﻨﺪﻧﺎ ﻗﺴﻤﺔ.
ﻟﻜﻦ ﺑﺎﻟﻠﻪ ﻣﺎ ﺗﺤﺮﻣﻮﻧﺎ ﻣﻦ ﻣﺘﻌﺔ ﺍﻟﻠﻄﺸﺔ ﺍﻷ‌ﺧﻴﺮﺓ.
ﻏﺎﻟﺒﺎً ﻛﺮﺩﻧﺔ ﻳﻨﻔﻌﻞ ﻭ ﻳﻨﻈﻢ ﻛﺄﺱ ﺍﻟﻌﺪﺍﻟﺔ.
ﻻ‌ﺯﻡ ﻳﻨﻘﺬ ﺍﻟﺤﺎﻟﺔ ﺍﻟﻤُﺼﻔﺮﺓ ﺩﻱ.
ﺍﻟﻤﻌﺎﺭﺿﺔ ﺣﺘﺄﻛﻞ ﻟﺤﻤﻮ ﻟﻮ ﻗﻌﺪ ﻓﻲ ﺍﻟﺼﻘﻴﻌﺔ ﻛﺪﻩ.
ﺃﻗﺘﺮﺡ ﺩﻭﺭﺓ ﺛﻨﺎﺋﻴﺔ ﺑﻴﻨﻜﻢ ﻭ ﺑﻴﻦ ﺍﻟﺨﺮﻃﻮﻡ ﺍﻟﻮﻃﻨﻲ.
ﻃﻴﺶ ﺃﻓﺮﻳﻘﻴﺎ ﻭ ﻃﻴﺶ ﺍﻟﻨﺨﺒﺔ.
ﻭ ﻣﺎ ﺣﺼﻞ ﻏﻠﺒﻜﻢ.. ﻳﻌﻨﻲ ﻛﺄﺱ ﻣﻀﻤﻮﻥ.
ﺳﻤﻮﻫﻮ ﻛﺄﺱ (ﻃﺎﺵ ﻣﺎ ﻃﺎﺵ).
ﻟﻜﻦ ﺍﻟﺤﻜﻢ ﺑﺎﻟﻎ.
ﻟﻼ‌ﻥ ﺍﻧﺎ ﻣﺎ ﻣﺼﺪﻕ.
ﺑﻠﻨﺘﻴﻦ ﻓﻲ ﻳﻮﻡ ﻭﺍﺣﺪ؟!
ﻗﻠﺒﻨﺎ ﺍﻟﺼﻐﻴﺮ ﻻ‌ ﻳﺤﺘﻤﻞ ﻳﺎ ﺍﻟﻨﻮﺭ ﺍﻟﻄﻔﻴﺖ ﺍﻟﻨﻮﺭ.
ﺣﺴﻴﻦ ﺍﻟﺠﺮﻳﻒ ﺩﻩ ﻋﺒﺎﺭﺓ ﻋﻦ ﻋﻠﺒﺔ ﺑﻠﻨﺘﺎﺕ ﻣﺘﺤﺮﻛﺔ.
ﺃﺭﻭﺵ ﺭﻭﺍﺷﻪ ﻋﺠﻴﺒﺔ.
ﺑﺮﻃﻌﺘﻮ ﺫﺍﺗﻬﺎ ﺑﺘﺪﻝ ﻋﻠﻲ ﺃﻧﻮ ﻣﺎ ﻣﺘﻨﺎﺳﻖ.
ﻓﻴﻬﻮ ﺣﺎﺟﺔ ﻛﺪﻩ ﺃﻗﺮﺏ ﻷ‌ﻧﻮ ﻳﻜﻮﻥ ﺑﻠﻨﺖ.
ﺩﺧﻠﺘﻮ ﻋﻠﻲ ﺍﻟﻜﻮﺭﺓ ﻓﻴﻬﺎ ﺍﻟﺸﺘﺎﺭﺓ.
ﻭ ﻟﻤﺎ ﻳﺘﻠﻤﻮﺍ ﻋﻠﻴﻚ ﺍﻟﺸﺘﺎﺭﺓ ﻭ ﺍﻟﺮﻭﺍﺷﺔ ﻳﺒﻘﻲ ﺗﺸﻮﻑ ﺭﻳﺎﺿﺔ ﻏﻴﺮ ﻛﺮﺓ ﺍﻟﻘﺪﻡ.
ﺣﺴﻴﻦ ﺩﻩ ﻣﻜﺎﻧﻮ ﻓﺮﻳﻖ ﺟﺮّ ﺍﻟﺤﺒﻞ.
ﻟﻜﻦ ﻳﺒﻘﻲ ﻗﻠﺐ ﺩﻓﺎﻉ؟
ﺩﻱ ﻛﺘﻴﺮﺓ ﻭ ﻣﺎ ﺑﺘﺘﺒﻠﻊ.
ﺣﺴﻴﻦ ﺍﻟﺠﺮﻳﻒ ﺯﻱ (ﺍﻟﺒﻠﻮﻟﺔ).
ﻗﺎﻟﻮ ﺍﻟﺒﻠﻮﻟﺔ ﺩﻩ ﺯﻭﻝ ﻣﺎ ﺷﺎﺀ ﺍﻟﻠﻪ.. ﻃﻮﻝ ﻓﻲ ﻋﺮﺽ.
ﺭﺟﻠﻮ ﻣﻘﺎﺳﻬﺎ (٥٥).
ﻳﻮﻡ ﻗﺎﻋﺪﻳﻦ ﻫﻮ ﻭ ﺍﺑﻮﻫﻮ ﻭ ﺍﺧﻮﺍﻧﻮ.
ﺧﺎﺗﻴﻦ ﺍﻟﻌﺸﺎﺀ ﻗﺪﺍﻣﻬﻢ ﻭ ﻣﻮﻟﻌﻴﻦ (ﻟﻤﺒﺔ ﺑﻨﻴﺔ).
ﺷﻮﻳﺘﻴﻦ ﻋﻨﺪﻫﻢ (ﺗﻴﺲ) ﺍﺗﻔﻚ.
ﺃﺑﻮﻫﻢ ﻗﺎﻝ ﺃﻗﺒﻀﻮﺍ ﺍﻟﺘﻴﺲ ﻳﺎ ﺃﻭﻻ‌ﺩ.
ﻗﺎﻟﻮﺍ ﺍﻟﺒﻠﻮﻟﺔ ﻗﺎﻡ ﻋﻠﻲ ﺣﻴﻠﻮ ﻭ ﺑﺮﺟﻠﻮ ﺍﻟﻴﻤﻴﻦ ﺷﺎﺕ ﺍﻟﻠﻤﺒﺔ ﻓﻲ ﺻﻴﻨﻴﺔ ﺍﻟﻌﺸﺎﺀ ﻟﻤﺎ ﺍﺗﻄﻔﺖ.
ﻭ ﺍﻟﺮﺟﻞ ﺍﻟﺘﺎﻧﻴﺔ ﻃﻠﻊ ﺑﻴﻬﺎ ﻓﻲ ﺑﻄﻦ ﺃﺑﻮﻫﻮ.
ﻗﺎﻟﻮﺍ ﺍﻷ‌ﺑﻮ ﺑﻘﻲ ﻳﻜﻮﺭﻙ.. ﺧﻠﻮ ﺍﻟﺘﻴﺲ ﺃﻗﺒﻀﻮ ﺍﻟﺒﻠﻮﻟﺔ.
ﺃﻣﺲ ﺍﻟﻌﺎﻟﻤﻲ ﺫﺍﺗﻮ ﺑﻘﻲ ﻳﻜﻮﺭﻙ ﻟﻨﺎﺱ ﺍﻟﺸﻐﻴﻞ.
ﺧﻠﻮ ﺍﻟﺘﺶ ﺃﻗﺒﻀﻮ ﺣﺴﻴﻦ ﺍﻟﺠﺮﻳﻒ.
ﺑﻴﺒﻮ ﺟﺎﺭﻱ ﺑﻲ ﺃﻃﻬﺮ ﻣﻦ ﺑﺮﺝ ﺍﻟﺒﺮﻛﺔ.
ﺃﻃﻬﺮ ﺟﺮﻱ ﻟﻤﺎ ﻓﺘﺮ ﻣﺎ ﺣﺼﻠﻮ.
ﻣﺪّ ﻳﺪﻭ ﻋﻠﺸﺎﻥ ﻳﻘﺒﻀﻮ ﻣﺎ ﻗﺪﺭ.
ﺍﻟﺠﺮﻳﻒ ﻳﺘﺒﺮﻃﻊ ﺯﻱ ﺣﻤﻞ ﺍﻟﺨﺮﻳﻒ ﺑﻲ ﺟﻨﺒﻬﻢ.
ﺑﻴﺒﻮ ﻛﺴﺮ ﻋﻠﻲ ﺟﻮﺓ ﺍﻟﺘﻤﻨﺘﺎﺷﺮ.. ﻭ ﺍﻟﺠﺮﻳﻒ ﺟﺎﺀ ﻧﺎﻃﻲ ﺟﻮﺯ.
ﻗﺎﻝ ﻟﻴﻚ ﺍﻟﻤﺪﺭﺏ ﺍﻟﻤﻮﻧﺪﻳﺎﻟﻲ ﺇﺗﺸﻬﺪ ﻓﻲ ﺍﻟﻠﺤﻈﺔ ﺩﻱ.
ﺭﻃﻦ ﻟﻴﻬﻮ ﺭﻃﺎﻧﺔ ﻣﺎ ﻣﻔﻬﻮﻣﺔ.
ﻟﻜﻦ ﺍﻟﺼﻔﻮﺓ ﺍﻟﺒﻔﻬﻤﻮﺍ ﻟﻐﺔ ﺍﻹ‌ﺷﺎﺭﺍﺕ ﻗﺎﻟﻮﺍ ﺍﻟﻤﻮﻧﺪﻳﺎﻟﻲ ﺟﺎﺏ ﻛﻠﻤﺔ (ﻛﻴﺴﻲ).
ﻳﻜﻮﻥ ﻗﺎﻝ ﻟﻴﻬﻮ ﻃﻴﺮﺕ ﻛﻴﺴﻲ ﺍﻟﻠﻪ ﻳﻄﻴﺮﻙ ﻣﻦ ﺍﻟﻜﺸﻒ.
ﻋﻠﻲ ﺳﻴﺮﺓ ﺍﻷ‌ﻛﻴﺎﺱ.. ﻣﺎ ﺷﺎﻳﻔﻴﻦ ﺣﺮﻛﺔ.
ﺍﻟﻨﺎﺱ ﺩﻳﻞ ﺍﻟﻤﻌﺎﺭﺿﺔ ﻧﺴﺘﻬﻢ ﺍﻟﺸﻐﻞ.
ﻭﻳﻦ ﺃﻛﻴﺎﺳﻚ ﻳﺎ ﺍﻟﻤﻨﺴﻘﺔ ﻣﻌﺎﺵ؟
ﻣﺎ ﺗﻘﻌﺪﻱ ﺳﺎﻛﺖ ﻓﻲ ﺍﻷ‌ﻭﺿﺎﻉ ﺩﻱ.
ﺃﻭﻉ ﺗﻜﻀﻤﻲ ﺍﻧﺖ ﻛﻤﺎﻥ.
ﺍﻟﻤﺮﻳﺨﺎﺏ ﻗﺪﺭ ﻣﺎ ﻓﺘﺸﻮﻛﻢ ﺃﻳﺎﻡ ﺍﻟﻀﺤﻴﺔ ﻣﺎ ﻟﻘﻮﻛﻢ.
ﻋﺎﻳﺰﻳﻦ ﻧﻀﺤﻲ ﺑﻴﻜﻢ ﻛﻨﺎ.
ﻧﻘﻄﻊ ﺍﻟﺮﻭﻳﺲ ﺃﺏ ﺩﺍﻗﻮﺱ ﺩﻩ.
ﻟﻜﻦ ﺍﻟﺤﻤﺪﻟﻠﻪ ﺭﺑﻨﺎ ﺟﺎﺑﻜﻢ ﻟﻴﻨﺎ ﻓﻲ ﺭﺃﺱ ﺍﻟﺴﻨﺔ.
ﺃﻫﻲ ﻛﻠﻬﺎ ﺭﻳﺴﻴﻦ.
ﻋﻠﺸﺎﻥ ﻛﺪﻩ ﺿﺒﺤﻨﺎﻛﻢ ﻓﻲ ﺍﻟﺘﺮﻭﻳﺴﺔ.
ﺍﻟﻨﺼﻴﺤﺔ ﻟﻲ ﺍﻟﻠﻪ.. ﺣﺮﺟﻤﻨﺎﻛﻢ.
ﺍﻟﻮﻟﺪ ﺍﻟﻀﺒﺢ ﻗﻄﻊ ﺍﻟﺮﺃﺱ ﻏﻠﻂ.
ﺑﺪﺃ ﻣﻦ ﺍﻟﻘﻔﺎ.
ﺭﺍﺳﻜﻢ ﺍﻟﻤﻔﻠﻖ ﺩﻩ ﻣﺎ ﻣﻌﺮﻭﻑ ﻋﺪﻟﺘﻮ ﻣﻦ ﻗﻠﺒﺘﻮ.
ﺑﻌﺪ ﺃﺳﺒﻮﻋﻴﻦ ﺑﻨﺴﻠﺨﻜﻢ.
ﺍﻟﺴﻨﺔ ﺩﻱ ﺇﻻ‌ ﻧﻌﻤﻠﻜﻢ ﻣﻨﺪﻱ.
ﺑﺴﻴﺮﺓ ﺍﻟﺨﺮﻓﺎﻥ ﺩﻱ ﺫﻛﺮﺗﻮﻧﻲ ﻭﺍﺗﺎﺭﺍ.
ﻭﻳﻦ ﺍﻹ‌ﺳﻢ ﺩﻩ ﺑﺎﻟﻠﻪ.
ﺃﺑﻮ ﻋﺎﻗﻠﺔ ﺑﻘﻲ ﻟﻌﺒﻮ ﺯﻱ ﻟﻌﺐ ﻭﺍﺗﺎﺭﺍ.
ﻧﻔﺲ ﺍﻟﺒﺮﻃﻌﺔ ﻭ ﺍﻟﻄﺮﺑﻘﺔ.
ﻭﺍﺗﺎﺭﺍ ﺩﻩ ﻛﺎﻥ ﻻ‌ﻋﺐ ﻭﺍﻟﻼ‌ ﻭﺑﺎﺀ.
ﺇﻧﺘﺸﺮ ﻓﻲ ﺍﻟﻜﺸﻒ ﺑﺼﻮﺭﺓ ﻣﺨﻴﻔﺔ.
ﺍﻟﻠﻌﻴﺒﺔ ﺃﻏﻠﺒﻬﻢ ﺃﺗﻮﺗﺮﻭﺍ.
ﺟﻴﻮﻓﺎﻧﻲ ﺩﻩ ﺍﻧﺘﻮ ﻣﺘﺄﻛﺪﻳﻦ ﺍﻧﻮ ﺑﺮﺍﺯﻳﻠﻲ؟
ﺟﻮﻓﺎﻧﻲ ﺩﻩ ﺫﻛﺮﻧﻲ ﻗﺼﺔ ﻧﺎﺋﺐ ﻭﺍﺣﺪﺓ ﻣﻦ ﺍﻟﺪﻭﺍﺋﺮ ﻓﻲ ﺍﻟﺠﻤﻌﻴﺔ ﺍﻟﺘﺄﺳﻴﺴﻴﺔ.
ﻗﺎﻟﻮ ﻛﺎﻥ ﺭﺍﺟﻞ ﻫﻴﺒﺔ.
ﺗﺸﻮﻓﻮﺍ ﺗﺤﻠﻒ ﺗﻘﻮﻝ ﺭﺋﻴﺲ ﺩﻭﻟﺔ.
ﻃﻮﻝ ﻓﻲ ﻋﺮﺽ.
ﺷﻨﺐ ﻣﺒﺮﻭﻡ.
ﻃﻮﺍﻟﻲ ﺑﻘﻌﺪ ﻓﻲ ﺁﺧﺮ ﺻﻒ ﻓﻲ ﺍﻟﺠﻤﻌﻴﺔ ﺍﻟﺘﺄﺳﻴﺴﻴﺔ ﻭ ﺃﺻﻠﻮ ﻣﺎ ﺑﺸﺎﺭﻙ.
ﺭﺋﻴﺲ ﺍﻟﺠﻤﻌﻴﺔ ﻣُﻌﺠﺐ ﺑﺎﻟﺮﺍﺟﻞ ﺍﻟﻔﺨﻴﻢ ﺩﻩ ﺟﺪﺍً ﺟﺪﺍً.
ﻋﺎﺣﺒﺎﻫﻮ ﺍﻟﻬﻴﺒﺔ ﻭ ﺍﻟﺮﺻﺎﻧﺔ ﺩﻱ.
ﻓﻲ ﻳﻮﻡ ﺍﻟﺠﻤﻌﻴﺔ ﻣﺪﻭﺭﺓ ﻧﻘﺎﺷﺎﺕ ﺣﺎﺩﺓ ﺣﻮﻝ ﺍﻟﻤﻴﺰﺍﻧﻴﺔ ﺍﻟﺠﺪﻳﺪﺓ ﻭ ﺇﺿﺮﺍﺏ ﻋﺪﺩ ﻣﻦ ﺍﻟﻨﻘﺎﺑﺎﺕ.
ﺍﻟﻨﻘﺎﺷﺎﺕ ﻣﻮﻟﻌﺔ.
ﺻﺎﺣﺒﻨﺎ ﻷ‌ﻭﻝ ﻣﺮﺓ ﺭﻓﻊ ﻳﺪﻭ.
ﺭﺋﻴﺲ ﺍﻟﺠﻤﻌﻴﺔ ﺍﻟﺘﺄﺳﻴﺴﻴﺔ ﻗﻌﺪ ﺍﻟﻌﻀﻮ ﺍﻟﺒﺘﻜﻠﻢ ﻭ ﻃﻮﺍﻟﻲ ﺣﻮﻝ ﺍﻟﻔﺮﺻﺔ ﻟﻠﻌﻤﺪﺓ ﺩﻩ.
ﺯﻭﻟﻨﺎ ﻧﻔﺦ ﺍﻟﻤﻜﺮﻓﻮﻥ ﻭ ﻗﺎﻝ ﻟﻴﻬﻢ ﺑﺼﻮﺕ ﻋﺎﻟﻲ.. ﻳﺎ ﺃﺧﻮﺍﻧﺎ ﻧﺤﻦ ﺍﻟﺒﻴﺒﺴﻲ ﻣﺎ ﻗﺎﻋﺪ ﻳﺼﻠﻨﺎ ﻭﺭﺍﺀ.
ﻗﺎﻝ ﻟﻴﻚ ﺭﺋﻴﺲ ﺍﻟﺠﻤﻌﻴﺔ ﺷﻨﻖ ﻧﻔﺴﻮ ﺑﻌﺪ ﻧﻬﺎﻳﺔ ﺍﻟﺠﻠﺴﺔ.
ﺟﻴﻮﻓﺎﻧﻲ ﺩﻩ ﺫﺍﺗﻮ ﺯﻱ ﺍﻟﺰﻭﻝ ﺩﻩ.
ﺗﺸﻮﻑ ﺟﻮﺍﺯﻭ ﺗﻘﻮﻝ ﺧﻼ‌ﺹ ﻣﻨﻘﻄﻬﺎ.
ﺗﻌﺎﻳﻦ ﻟﻴﻬﻮ ﻓﻲ ﺍﻟﻤﻠﻌﺐ ﺗﺤﻠﻒ ﺗﻘﻮﻝ ﻛﻮﺗﻨﻴﻬﻮ.
ﻳﺪﻭﻫﻮ ﺍﻟﻜﻮﺭﺓ ﺍﻟﻘﻮﻥ ﻓﺎﺿﻲ ﻳﺸﻮﺗﻬﺎ ﻓﻲ ﺍﻵ‌ﻭﺕ.
ﺑﺮﺍﺯﻳﻠﻲ ﺷﻨﻮ ﺩﻩ؟
ﻣﻌﻘﻮﻝ ﺑﻠﺪ ﺳﻘﺮﺍﻁ ﻭ ﺯﻳﻜﻮ ﻭ ﺭﻭﻧﺎﻟﺪﻭ ﻭ ﻧﻴﻤﺎﺭ ﺗﺠﻴﺐ ﺍﻷ‌ﺭﻭﺵ ﺩﻩ؟!
ﻛﺪﻱ ﺭﺍﺟﻊ ﻭﺭﻕ ﺍﻟﺰﻭﻝ ﺩﻩ ﻳﺎ ﻛﺮﺩﻧﺔ.
ﺷﻮﻓﻮ ﺑﺮﺍﺯﻳﻠﻲ ﻣﻦ ﻳﺎﺗﻮ ﺣﻠﺔ.
ﺍﻧﺎ ﺧﺎﻳﻔﻮ ﻳﻄﻠﻊ ﻣﻦ ﻛﻮﺑﺎ.
ﻷ‌ﻧﻮ ﺑﻀﻴﻊ ﺍﻟﻔﺮﺹ ﺯﻱ ﺍﻟﻌﻨﺪﻭ ﺭﻃﻮﺑﺔ.
ﺃﻱ ﻻ‌ﻋﺐ ﺃﻣﺮﻳﻜﻲ ﻋﻨﺪﻭ ﺭﻃﻮﺑﺔ ﺑﻜﻮﻥ ﻣﻦ ﻛﻮﺑﺎ.
ﺩﻱ ﺍﻟﻨﻴﻔﺎ ﻗﺎﻟﺖ ﻛﺪﻩ.
ﺑﺎﻟﻨﺴﺒﺔ ﻟﻠﻨﻴﻔﺎ ﺑﺘﺎﻋﺖ ﺭﺍﺳﻜﻢ ﺍﻟﻤﺤﺮﺟﻢ ﺩﻩ ﻋﺎﻳﺰﻧﻬﺎ ﻭﺍﻟﻼ‌ ﻧﺠﺪﻋﻬﺎ ﻓﻲ ﺍﻟﺨﻮﺭ.
ﺍﻟﺨﻮﺭ ﺫﺍﺗﻮ ﻣﻠﻴﺎﻥ (ﺣﺸﺮﺍﺕ ﻭ ﻛﻼ‌ﺏ ﻭ ﻣﻮﻳﺔ ﻣﻄﺮ ﻭ ﺩﻣﻮﻉ).
ﻧﺮﺟﻊ ﻟﻠﻜﻮﺭﺓ.
ﺇﻧﺘﺼﺎﺭ ﻣﻬﻢ.
ﻭ ﺿﺮﻭﺭﻱ.
ﺟﺎﺀ ﻓﻲ ﻭﻗﺘﻮ ﺗﻤﺎﻣﺎً.
ﺷﻮﻁ ﺃﻭﻝ ﻋﺠﻴﺐ ﻟﻠﻤﺮﻳﺦ.
ﻭ ﺷﻮﻁ ﺗﺎﻧﻲ ﻓﻴﻬﻮ ﻓﺮﻓﺮﺍﺕ ﻣﺬﺑﻮﺡ.
ﺑﻴﺒﻮ ﻭ ﺍﻟﺘﺶ ﺇﺗﺴﺠﻠﻮﺍ ﺳﻮﺍ ﻭ ﺳﺠﻠﻮ ﺳﻮﺍ.
ﺃﺻﺤﺎﺏ ﺃﺻﺤﺎﺏ ﺣﺘﻲ ﻓﻲ ﺟﻠﺪ ﺍﻟﺰﻣﺒﻮﻕ.
ﺣﻜﻢ ﺷﺠﺎﻉ.
ﻣﻊ ﺍﻧﻮ ﻇﻠﻤﻨﺎ ﺷﺪﻳﺪ.
ﺍﺣﺘﺴﺐ ﺗﻼ‌ﺗﺔ ﺿﺮﺑﺎﺕ ﺟﺰﺍﺀ ﻓﻲ ﻗﻤﺔ ﻭﺍﺣﺪﺓ.
ﺩﻱ ﻣﺎ ﺃﻇﻦ ﺣﺼﻠﺖ ﻗﺒﻞ ﻛﺪﻩ.
ﻋﺸﺮﻳﻦ ﺳﻨﺔ ﻣﺎﻑ ﺣﻜﻢ ﺇﺣﺘﺴﺐ ﻟﻴﻨﺎ ﺿﺮﺑﺔ ﺟﺰﺍﺀ ﻓﻲ ﺍﻟﻤﻤﺘﺎﺯ.
ﺍﻟﻘﺎﻧﻮﻥ ﺍﻟﺴﺮﻱ ﺍﻟﻠﻴﻠﺔ ﻓﻲ ﺇﺟﺎﺯﺓ.
ﺍﻟﺰﻭﻟﻔﺎﻧﻲ ﺃﻧﻘﺬ ﺍﻟﻤﻮﺳﻢ.
ﻟﻜﻦ ﺇﺩﺍﺭﺗﻮ ﻟﻠﺸﻮﻁ ﺍﻟﺜﺎﻧﻲ ﻣﺎ ﻛﺎﻧﺖ ﺑﻘﺪﺭ ﺍﻟﻤﺴﺘﻮﻱ.
ﺍﻟﺘﺒﺪﻳﻼ‌ﺕ ﺍﻟﻐﻠﻂ ﻗﺮﺑﺖ ﺗﻀﻴﻊ ﺍﻻ‌ﻧﺘﺼﺎﺭ ﻭ ﺍﺩﺕ ﺍﻟﺰﻣﺒﻮﻕ ﺭﻭﺡ ﻳﻔﺮﻓﺮ ﺑﻴﻬﺎ.
ﻭ ﺍﻟﻼ‌ﻋﺒﻴﻦ ﻛﺎﻧﻮﺍ ﻓﻲ ﺍﻟﻤﻮﻋﺪ.
ﻭ ﻧﺨﺺ ﻣﻨﻬﻢ ﺑﻴﺒﻮ ﺍﻟﺤﺮﻳﻒ ﺍﻟﺮﺷﻴﻖ.
ﻧﺠﻢ ﺍﻟﻠﻘﺎﺀ ﺑﻼ‌ ﻣﻨﺎﺯﻉ.
ﻣﺒﺮﻭﻙ ﻟﻨﺠﻮﻡ ﺍﻟﻤﺮﻳﺦ ﻭ ﺟﻬﺎﺯﻳﻬﻢ ﺍﻟﻔﻨﻲ ﻭ ﺍﻹ‌ﺩﺍﺭﻱ.
ﻭ ﺃﻟﻒ ﻣﺒﺮﻭﻙ ﻟﺼﻔﻮﺓ ﺍﻟﻤﺪﺭﺟﺎﺕ ﺍﻟﺬﻳﻦ ﺃﺑﺪﻋﻮﺍ ﻭ ﺃﻣﺘﻌﻮﺍ ﻓﻲ ﺍﻟﺘﺸﺠﻴﻊ.
ﻧﺠﻴﻜﻢ ﺑﻜﺮﺓ ﺑﺮﻭﺍﻗﺔ.
*ﻧﺒﻀﺔ ﺃﺧﻴﺮﺓ*
ﺿﺮﺏ ﻏﺮﺍﺋﺐ ﺍﻹ‌ﺑﻞ.
#ادمن_بعيد