المحترف في الهلال قبل (صورتو) ما تطلع بطلع من الهلال
الحصة الصباحية
عماد محسن محترف الهلال السابق – سرح (قصتو) – وجابها لي قدام – عاوز يرجعها وراء – لقى مجلس الهلال انهى تعاقده معه.
القُصة دي يعني خصلة الشعر.
غايتو الهلال عندو رئيس ..شطب اللاعب من كشوفات الفريق عنده اسهل من شطب رقم التلفون من قائمة (جهات الاتصال).
………..
• كتبنا كثيرا عن (الصورة) زمان ، وقيمتها ، ومكانتها التى تراجعت في السنوات الاخيرة.
• والبعيو بغني من كلمات حسن الزبير (صورتك الخايف عليها ونحن ما خايف علينا) – زمن كان في خوف على الصور.
• ما في بنت بتدي صورتها لي ولد.
• بقطعوا رقبتها.
• هسع (السيلفي) شغال شمال ويمين زي (البارد).
• وردي فنان افريقيا الاول غني من كلمات اسحاق الحلنقي (توعدنا وتبخل بالصورة) – ما في زول بيدي ليه زول تاني صورة.
• ما في كلام زي ده.
• وعبدالعظيم حركة غني (الصور العندي شيلها)..من ترجع ليك لي زول صوره – خلاص يعني قطعتها معاه.
• تاني لو السماء انطبقت مع الارض ما بترجع ليه.
• الصورة زمان كانوا بغني ليها.
• المهم….(ما عاوز ادخل ليكم في التفاصيل).
• واطول ليكم في الموضوع.
• قيمة (الصورة) ومكانتها زمان ، كان ناتجة من صعوبتها – يعني الزول زمان بتصور ثلاثة مرات في حياتو.
• ما اكتر من كدا.
• لو بتنقطها – ما بتتصور في حياتك اكتر من تلات صور.
• مرة للجنسية.
• ومرة للجواز – اذا طلعت ليك جواز سفر.
• ومرة للعرس.
• حياتك كلها بتكون اتصورت فيها (3) مرات.
• بس.
• عشان كدا (الصورة) زمان كان عندها قيمة – الاستديو ما بتدخلوا إلّا في الشديد القوي.
• إلّا في الاعياد.
• تمشي الاستديو – تلقى قدامك عشرين واحد عاوزين يتصوروا.
• تنتظر دورك – ولا بتزهج ..ولا بتعترض – ولا بتقول حاجة.
• ما في زول بقول حاجة في (الاستديو) بتاع التصوير – أي زول بكون في منتهى الاحترام والتقدير لمن يكون في الاستديو.
• الاستديو كان عندو (هيبة).
• تقعد فيه ساكت – لمن دورك يجي.
• لمن تخش الاستديو جوة عشان تصور – يصلحوا ليك (الستائر) – وممكن يجيبوا ليك (زهرة) عشان تشيلها او تضعها امامك.
• ما عارف تقليعة (الزهور) دي شنو في الصور؟.
• تصلح قعدتك.
• والمصور قبل ما يدوس على الفلاش للصورة بقول ليك (ابتسم).
• صور زمان نادر جدا تلقي فيه زول ما قاعد يضحك.
• البلد دي كلها كانت بتضحك.
• كلها (مبتسمة).
• بعدين انت وقت تدخل الاستديو للصورة – بتكون (فرحان) من دون اردتك.
• بتكون مبسوط.
• عشان كدا (الابتسامة) البتكون في الصورة ما كانت ابتسامة خادعة.
• كانت ابتسامة (حقيقية).
• طالعة من القلب.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• تتصور وتطلع من الاستديو بعد ما تستلم (الوصل) – فيه تاريخ الصورة وتاريخ استلامها.
• يا زول الصورة كان عندها قيمة…وما بتسلمها إلّا بي (وصل).
• اوعك الوصل يضيع منك.
• ما يروح.
• لو الوصل راح – اقنع من الصور…انت الزول الفي الصورة بدون (وصل) ما بدوك ليها.
• اعملوا شير.
• الاستديوهات كان عندها قيمة.
• وكانت استديوهات محترمة.
• عشان كدا الصورة كانت حاجة كدا.
• بتاع الاستديو بقول ليك تجي تستلم الصورة بعد اسبوع.
• تنتظر الاسبوع دا زي (السماية).
• واول ما يجي يوم الاستلام – تمشي السوق عشان تستلم الصورة.
• بتلقى الاستديو قافل.
• ما عارف معظم الاستديوهات كانت ما بتشتغل الصباح.
• معظمها كان بفتح فقط (المساء) ، زي العيادات الخارجية.
• الاستديوهات كانت حاجة كدا.
• وصاحب الاستديو ذاتو بتلقاه زول انيق ولطيف وبتكلم انجليزي – وعندو نضارة بينسون.
• مرات تجي بعد اسبوع عشان تستلم الصور – يقولوا ليك معليش الصور حرقت في التحميض.
• يا زول موضوع الصور دا كان موضوع صعب شديد.
• انتوا قايلنو فوضى زي هسع.
• هسع الزول لو جاب ليه (سمك) – بفتح التلفون ويتصور مع السمك.
• لو شاف ليه (كديسة) – بتصور مع (الكديسة).
• في القطر.
• في شارع النيل.
• أي حتة يمشي ليها – يطلّع موبايلو ويتصور.
• اعملوا شير.
• زمان بنت جيرانك – صورتها ما بتشوفها إلّا في العرس.
• تعال شوف الآن.
• لو دخلت صفحتها في الفيسبوك تلقى صورها اكتر من (الصين الشعبية).
• لو شفت تلفونها – تلقاها كل ربع ساعة بتغير صورة الملف الشخصي.
• الصور ذاتها بقت مسيخة.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• الكلام دا انتوا هسع عاوزين تعرفوا مناسبتو شنو؟.
• انتوا لو بتصبروا بتعرفوا.
• ما تضيقوا.
• الضيق كعب.
• المهم….(ما عاوز ادخل ليكم في التفاصيل).
• واطول ليكم في الموضوع.
• المحترف في الهلال في عهد الكاردينال بقى قبل ما تطلع صورته بطلع هو من كشوفات الهلال.
• يجيبوا ليك محترف بالطائرة – بعد مفاوضات طويلة ..وسفريات ..وبشريات..وفيديوهات للاعب.
• وكشف طبي.
• وصور.
• يدفعوا فيه الشيء الفلاني.
• واول ما يتعاقدوا معاه.
• اسبوع.
• او مباراة.
• والتانية.
• ويتم الاستغناء عنه.
• يا جماعة ما في محترف يمكن ان يثمر في خلال 45 يوم.
• أي محترف جاء الهلال لم يثمر وينتج إلّا في الموسم التاني.
• حتى ناس كلاتشي وسادومبا ويوسف محمد.
• في شجرة ليمون ممكن تتطرح ليمون بعد شهر.
• المحترف البتجيبوه اصبروا عليه.
• او ما تجيبوه من الاساس.
• قلنا ليكم – مع الكاردينال ركزوا لينا على الوطنيين.
• ما عاوزين محترفين.
• الكاردينال ما بقدر على صرف الدولار.
• صرف الدولار عندو حار.
• يجب ليك المحترف (مقاولة) ..اول ما الهلال يخرج من المنافسات الخارجية يتم الاستغناء عنه.
• خسارة قروش ساكت.
• من الاول لو جبت لينا تمبش كان احسن لينا.
• لو جبت لينا كابتن بشير كان افضل لينا.
• بدل الجهجهة دي كلها.
• الطريف الكاردينال بقول وبصرح انو بجيب ساماتا والاخطر من ساماتا.
• انت ناس عماد محسن قومو نفسك يا الكاردينال عاوز تجيب ساماتا والاخطر من ساماتا.
• الهلال في ظل هذه الاوضاع – اقنعوا من بطولات منه.
• حتى البطولات الداخلية – الدوري والكاس فقدها الهلال في الفترات الاخيرة.
• بقينا الممتاز ما بنحققو.
• وقت نحقق بطولة الممتاز تشيلو مننا (كاس).
• بقينا قاعدين ساكت.
• وكل هذا الخلل سببه الكاردينال.
• ما في بطولات يمكن ان تتحقق بهذه الصورة.
• اقنعوا منها.
• شوفوا ليكم موضوع تاني.
• خلونا نتكلم عن (كورونا).
• نحن فترنا من الكلام.
• وبقى ما في حل ..غير الكاردينال يمشي.
• يمشي بس.
• هذا هو الحل الوحيد.
• أي كلام غير كدا لا جدوى منه.
• ………….
متاريس
• هسع التسجيلات القادمة يا ناس الهلال عاوزين تعملوا فيها شنو؟.
• التسجيلات باقى ليها شهرين وشوية.
• مع كورونا دي ما عارف يحصل شنو؟.
• الله يغطي على العباد والبلاد.
• والله يرفع عن الامة الوباء.
• مفروض ناس الهلال يتجاوزوا الكاردينال.
• شوفوا بتعملوا في تسجيلاتكم القادمة شنو؟.
• لو انتظرتوا الكاردينال ….اطهر الطاهر ح تفقدوه.
• احسن تصرفوا براكم.
• وما تنتظروا الكاردينال.
• …………
• الصبة الاخيرة : باقى المطر ..صرينا في عيون العشم.
