الحاجات البعمل فيها (ميسي) ..(كابتن ماجد) في افلام (الكرتون) ما عملها

صابنها

محمد عبدالماجد

الحاجات البعمل فيها (ميسي) ..(كابتن ماجد) في افلام (الكرتون) ما عملها

· ثقافة الحلة زمان – يلاقيك واحد صاحبك ، بعزك وبقدرك ، وعشان كدا بقول ليك دكان (التليم ود كجم) جاب ليه (طحنية) عجيبة.

· المعني الزول دا قاعد يعزك.

· والطحنية (السمحة) معزة.

· او ممكن يلاقيك زول قريبك .. يوصيك ، ويخصك بالكلام دا (دكان شمعميدي الايامات دي بشد ليه في فول رهيب).

· ثقافة الحلة زمان كدا.

· الناس بتشايل.

· والحاجات بتتناقل.

· في زول قدر ما يلاقيك يقول ليك : الليلة شنو؟.

· وفي زول محل ما تقابلو – يقول ليك نمشي نفطر.

· في صحبة كدا.

· بتفرز (شركات) دائمة.

· عندنا صاحبنا قدر ما نسوقو معانا عشان نمشي نزور لينا زول راقد في المستشفى بقول لينا نفس الكلام.

· أي عنبر دخلو عشان نعايد لينا مريض – اول ما نطلع من باب العنبر – صاحبنا بقول لينا : (الزول دا ما بعيش).

· ثم يكتل ضلو ويدخل لينا في دور (خبير) ويقول لينا (زول الموت ظاهر)…يمين (الدِرب) المركبنو ليه دا ما يلحق يكملو.

· نحن نقعد نعاين في (الدِرب) متل (كراسة الاملاء).

· قبل ما نصل الموقف – يجيبوا لينا خبرو.

· و(الدِرب) معلق في شماعتو.

· الغريبة كمان زول الموت وقت تمشو تزورو في المستشفى بتلقى جنبو (طربيزة) فيها (كوز) كبير.

· ما عارف علاقة (الكوز) بالموت شنو؟.

· لكن (الكيزان) وجودهم في المستشفى في عنبر المريض يعني (الموت) الأكيد.

· زمان وقت تمشي تودع ليك زول مسافر من الحلة – ماشي الخرطوم او مهاجر برة البلد – تلقاه قاعد يكوي في (هدومو)..ومشغّل ليه (مسجل) بغني فيه حمد الريح.

· ما عارف السر في ذلك شنو؟.

· غايتو نحن في حاجات لقيناها كدا.

· لغاية الآن ما عارفين سرها.

· يمكن عشان حمد الريح بغني (حليلو قال ناوي السفر).

· طبعا (نية) السفر عند المحبين ، اخطر من (السفر) ذاتو.

· الزول البتلقاه قاعد يقطّع ليه في (بطيخة)…معنوياتو بتلقاها في السماء.

· حاجة عجيبة.

· بكون (فرحان).

· ليه ..ما عارف؟.

· والصالون البتلقى فيه (المرواح) شغالة براها، وما في زول قاعد فيه…بحصل فيه عرس بعد 45 يوم.

· احسبها.

· ما عارف علاقة (المراوح) بالعرس شنو؟.

· ما عارف.

· انا الحاجات دي لقيتها كدا.

· ما اخترعتها ليكم.

· ولا قطعتها من رأسي.

· وصراحة كدا – ما سألت منها.

· قبل سنوات قريبة – الكلام دا ما بعيد …ظهر (ميسي) كلاعب (شافع) في برشلونة.

· كان ولد صغير …الناس كلها شفقانة عليه.

· ميسي كان بدخل الملعب شايل ليه (بسكويت)…اول ما تبدأ المباراة بفك البسكويت ..ويمسك (باكات) الفريق الخصم.

· ميسي وقت ظهر في برشلونة (وبراءة الاطفال في عينيه)…كان شعره كتير وعيونه خدر متل (الكديسة).

· الوقت داك ميسي كان أي حاجة عاوز يعملها بالكورة بعملها.

· بفلّس الطبلة.

· ويفتح الخزنة.

· ويدوّر العربية.

· ويشغّل (المكيّف).

· كل هذه الحاجات كان ميسي بعملها بالكورة.

· والله الواحد كان لو عاوز ليه (طحنية) – لو عاوز ليه (باسطة) ..ميسي كان بجيبها ليه.

· تقعد تعاين ليه كدا – زي البتاكل ليك في (باسطة).

· الايام مضت.

· والسنين جرت.

· و ميسي بقى كبير.

· السن ليها احكام.

· ميسي الآن يعتبر من (عواجيز) اللاعبين …ونحن لغاية الآن بنعاين ليه على انه (طفل).

· ولاعب ناشيء.

· ما قادرين نتصالح ..ونتكيف مع ان ميسي مواليد مواليد 24 يونيو 1987.

· يعني ميسي في 24 يونيو بعمل 33 سنة.

· بي بساطة كدا ..ميسي بي سنو دي لو جابوه لينا في الهلال …ناس مزمل ابوالقاسم وكابو ومعاوية الجاك بطلعوا يقولوا لينا (عجوز).

· ولاعب (كبير).

· وما بعيد بابكر سلك يقول لينا (ماسورة) عديل كدا.

· المريخاب بعملوها.

· ايام ميسي في الكورة بقت محدودة …ونحن والله الخسرانين.

· الموسم دا برشلونة قدم اسوأ موسم له.

· تقول (الكورونا) ما ضربت فريق غير (برشلونة).

· المتضرر الاول من كورونا هو فريق برشلونة.

· الزول البقعد يحضر مباراة لبرشلونة هذه الايامات …متل الزول المشي لي ناس وسمع صوت (الخلاطة)…متخيل يجيبو ليه (العصير)…جابوا ليه (الشاي).

· الشاي عاوز ليه (خلاطة)…لو ما (مكاجرة) منكم ساي.

· كورة برشلونة الموسم دا كدا.

· بالمناسبة ريال مدريد اذكي من برشلونة ..والريال (عملي) اكتر من البارشا…..ريال مدريد فريق (عقلاني)…وبرشلونة فريق (عاطفي)…عشان كدا كورة برشلونة (احلي) من ريال مدريد …ولكن نتائج ريال مدريد (افضل) من نتائج ريال مدريد.

· احسبها ليكم.

· جني وجن الزول البتكون فاتح ليك موضوع – وانتوا شايفو (مهم)..يقوم ينط ليك في موضوع تاني.

· يشتت ليك تركيز الناس.

· والزمن دا ما في زول بركز معاك بالساهل.

· الواحد إلّا تقول ليه الموضوع دا فيه (قروش) – عشان يركز معاك.

· عقلانية ريال مدريد تمثلت في الاستغناء عن (رونالدو) مبكرا ..والبحث عن بدلاء له ..والتعوّد على فقدانه …ومحاولة تعويضه…وقد انفك ريال مدريد اخيرا من تأثير (رونالدو).

· الريال اتخلص من لعنة رونالدو.

· أي نجم كبير طبعا عندو (لعنة).

· برشلونة ح يقعد يمسك (ميسي) لمن يبقى (عضم)…ولن يستطيع برشلونة تعويض (ميسي) سريعا.

· انا شخصيا عاوز لي (4 او 5) مواسم عشان اتعود على برشلونة من غير ميسي.

· بقيت اشرب (الشاي) بدون سكر – عشان اتعود على رحيل ميسي من برشلونة.

· ميسي دا كان اخطر من (كابتن ماجد).

· نحن زمان بنحضر مسلسل كابتن ماجد ..وبنعتقد ان ما يفعله كابتن ماجد لا يمكن ن يحدث في ارض الواقع.

· لكن جينا ..وشفنا بعد ذلك (ميسي)..ولقيناه – الله يسألني بعمل في حاجات اخطر من الحاجات الكان بعمل فيها (كابتن ماجد) في مسلسل وافلام الكرتون.

· كابتن ماجد قدام ميسي (علي جعفر).

· ميسي كان ما اعتيادي.

· ما طبيعي.

· بعمل ليه في حاجات ..زي (الطحنية).

· الليلة انا مالي؟.

· مالي شبكت ليكم في (الطحنية) كتير كدا؟.

· ميسي مع انه وصل لسن 33 سنة ..لكن برضو بحقق في (ارقام) عجيبة.

· ممكن يحقق (ارقام)..لكن (المتعة) صعبة يحققها ميسي في كرة القدم تاني.

· خلاص للسن احكام.

· ليونيل ميسي حقق جائزة هدّاف الدوري (جائزة البيتشيتشي) للمرة السابعة في تاريخه.. ويصبح أكثر من حقق الجائزة في تاريخ الليجا.

· سجل 25 هدفا في هذا الموسم.

· شوفوا الكلام دا.

· ارقام غريبة.

· والله الاجيال الشافت وحضرت رونالدو وميسي وهم في بداية المشوار…شافوا كل حاجة في كرة القدم.

· اتمتعوا في الدنيا دي جنس متعة.

· روعة ميسي ورونالدو كانت في متلازمة (المنافسة) بينهما.

· الصراع والسباق والتنافس.

· الموضوع ما كان متعة بس..الموضوع ما كان كورة والسلام.

· السباق والصراع بين ميسي ورونالدو كان بالارقام.

· صراع (ارقام).

· وقوته ان كان بين برشلونة وريال مدريد ..اقوى وافضل اندية في العالم.

· عشان كدا حكاية ميسي ورونالدو تاني في كرة القدم ما بتتكرر.

· الاجيال القادمة ح تكون مظلومة عشان ما شافت ميسي ورونالدو والتنافس بينهما.

· الزول البجي اخر الحفلة ….لو لحق ليه (اغنية)…ما بلحق (العشاء).

· بلقى العشاء انتهى.

· ولو جابوا ليه (عشاء)..بجيبوا ليه (صحن الكوكتيل) ناقص.

· جن وجني يجيبوا ليك في حفلة (صحن كوكتيل) ناقص.

· هسع الناس البشوفو في ميسي ورونالدو لو حضروا ليهم (فاصل) في الحفلة ..ما بلقوا ليهم (عشاء).

· احسن الواحد يكون واضح معاهم…ويقولها ليكم في عينكم.

· احسن اجيبها ليكم بالشعاء – عشان تقع ليكم.

· ……………

متاريس

· الكاردينال قال تنظيم (عزة الهلال) ح يحكم الهلال بعدو.

· الكاردينال عاوز يمشي ويخلي لينا (صورتو) المعلقة في المقصورة قاعدة.

· عاوز يحكمنا بالصورة.

· كان غيرك اشطر يا ريّس.

· كلام زي دا نحن في الهلال ما عندنا.

· انت قاعد بي لحمك ودمك ..خصمو مننا (6) نقاط ..لو مشيت وحكمت الهلال بالوكالة يخصمو مننا كم نقطة.

· لجنة التطبيع سوف تكون امام اصعب امتحان.

· التسجيلات القادمة الهلال يجب ان يدخل بقوة.

· في عناصر ممتازة في الدوري الممتاز جيبوه الهلال.

· الاهلي شندي بعد رحيل الكاردينال ممكن يطلق صراح لاعبيه للهلال.

· وصلاح ادريس ما بقيف عقبة امامهم بعد رحيل الكاردينال من مجلس الهلال.

· جيبوا لينا ياسر مزمل ووالي الدين خضر من الاهلي شندي.

· عزام عادل ويوسف فداسي من الخرطوم الوطني.

· تمبش كابتن بشير من الامل عطبرة.

· من المريخ جيبوا لينا (4) عناصر من غير تحديد اسماء.

· الهلال عاوز لاعبين.

· في الفلاح هناك (الشمالي) وفي الاهلي مروى احمد بيتر وكولينا.

· الهلال عاوز تسجيلات صاح.

· اتحركوا.

· واعملوا حاجة.

· صلاح ادريس ذاتو السنة دي ممكن يساهم في التسجيلات.

· وطه علي البشير والامين البرير.

· أي واحد من هذه الاسماء ممكن يسجل ليه لاعبين للهلال.

· حددوا وامشوا عليهم.

· ما بنقيف عند الكاردينال.

· الكاردينال صفحة واتقلبت.

· …………….

· اخر ترس : ديل منتظرين المطرة تجيب ليهم (رصيد سوداني) بالتحديد