تحالف (ستات) العرقي و(أسياد) اللبن !!
بالعربي الكسيح
محمد الطيب الأمين
تحالف (ستات) العرقي و(أسياد) اللبن !!
* مانعين السفر والناس بتسافر .
* قافلين الكباري بعد (٦) و الناس بتعبر . * محاربين تجار الدولار وتجار الدولار شغالين .
* ليتهم حاربوا (الرشوة) حتى يختفى كل ما ذكر أعلاه.
* ليتهم والله .
* السودان ماشي بالرشوة .
* حاجة تكسف .
* قبل الحظر كانت تزن (٦٤) كيلو ولها (جوز وجنات) .
* وبعد الحظر شفناها بالصدفة فقدرنا لها (١٠٢) كيلو واختفت (الوجنات) .
* واحد من أتنين : يا إما الوجنات (صناعية) ويا كمان صناعية (الوجنات) .
* حالة صعبة .
* إقامة كل مباريات الدوري بالخرطوم هو قرار (طبي) في المقام الأول.
* ومحاولات بعض الأندية وعلى رأسها المريخ لرفض اللعب يعتبر جعجعة ساكت .
* الهلال لن يستفيد كثيرا من قرار اللعب في الخرطوم طالما المباريات تقام بدون جمهور .
* الفائدة الوحيدة هي تجنب السفر للولايات .
* غير كده كل الأندية في الهوا سوا .
* عشان كده ناس المريخ ما يعملوا لينا فيها عندهم شخصية.
* العبوا لعبكم وبلاش فوضى .
* من أبرز صفات ومواصفات (السكران) هي : (الريحة وتقلت اللسان والترنح) .
* وقبل أيام قابلت لي (سكران) فلم أجد عنده (الريحة) ولا (تقلت اللسان) ولا (الترنح) .
* طوالي عرفت إنو (ستات العرقي) اتحالفن مع (أسياد اللبن) ، فلم يعد (العرقي) عرقي ، ولم يعد (اللبن) لبن .
* كلو مغشوش وزايدنو موية .
* بالمناسبة .. ليه صناعة العرقي ارتبطت بالستات؟؟
* أنا ما بفسر وأنت ما تقصر .
* الذهاب إلي السوق لشراء إحتياجات اليوم (سكر ، بصل ، زيت وبطاطس) يحتاج لشجاعة (أدبية) إذا توفرت القروش .
* ما عندك شجاعة أدبية ما تمشي السوق حتى لو عندك قروش .
* أما المواصلات في الخرطوم فهي تحتاج لرأس مال .
* قصة وآخرها لسه .
* قبل فترة (حاورت) فنان السودان أبو عبيدة حسن وذكر أنه لا يملك ثمن (قطرة العيون) .
* وعمنا أبو عبيدة رأس ماله أغنيات بحجم (عقد الجواهر) و(والله ما رضيناها ليك تغمر الدمعات عينيك) .
* واختنا عشة الجبل كل رأس مالها أغنية (هيي دي مالا) واشترت لنفسها عربة (نسيان بترول) .
* ما حاسدنك يا عشوشة لكن قطع شك أبو عركي البخيت ضيع مستقبلو في (واحشني) و(بحبك حب) و(بخاف) .
* زي ما قلنا لو العربيات حسب الأغنيات يفترض عشة الجبلية تركب (تكتوك) .
* (هيي دي مالا) لو بالغت بتركبك (ترحال) يا عشوشة.
* أقول ليك حاجة يا عشة : زمان نحن لما نسمع زيدان بيغني (دمعة الحزن التي تسكبها فوق ذراعي) كنا بنبكي بدون ما نعرف الميت منو .
* وهسه لما نسمع (هيي دي مالا) برضو بنبكي لكن عارفين الميت منو.
* ليهن حق بنات حلتنا الأيام دي كل واحدة جابت ليها دلوكة و(باروكة) .
* الباروكة عند الفنانة أهم من إجازة الصوت .
* وغايتو جنس غايتو
* المعنى الحقيقي (لكسر العين) هو إنك تشوف لحمة الضأن و(تدنقر رأسك) .
* والمعنى الحقيقي (لقوة القلب) إنك تشوف لحمة الضأن وتسأل من سعرها حتى بعد داك (تدنقر رأسك) .
* جميلة ومستحيلة .
* اللحم لمن استطاع إليه سبيلا .
* وبمناسبة اللحم.
* السنة دي (بنضحي) بالبطيخ .
* اضبح بطيخة وحس أنها خروف .
* الواحد لو ما بخاف الله بكرة دي يطلع إشاعة يقول إنو (الخرفان السودانية عندها كورونا) .
* تفك الإشاعة دي بكرة أغلى خروف تلقاهو بخمسة ألف جنيه.
* حليل زمن كان القش أغلى من الخروف .
* زمن كنا بنشتري فيهو القش وبدونا معاهو الخروف هدية .
* الله المستعان .
* نسأل الله أن يخفف على الناس ويرحم الفقراء والمساكين.
* و..و..
* وليه تردد ذكرياتنا ويوم ألاقيك ما بتسلم ……. (لسه خايف من كورونا ولا شنو) .
العربي المسيخ هههه ناس روفا ضاربين فندق كردنة والتكييف والمريخ لعب في حراية النقعة والفاشر والابيض وكادوقلي ونيالا ٨ مباريات وانت بنفس فاتحة وبدون خجل داير بطولة تمييييع ههه يا هوي يا مريم سونكي ركب فزيتو..انا ما ماشي نيالا أوه أوه انا ماشي النقعة أوه اوه بالله عليك دي فيها عدالة ودايرة ليها فبركة اشتباك بين باني وشداد وبعد يومين تمييع بدل مجموعتين وكلو فاكرين الناس سكرانة ياخي حتى البارسا لعبوهو خارج ارضه وخسر وتعادل وذهبت البطولة للريال لكن شداد العنيد داير يكمل الجميل لحبه المدعوم ويجيب النقعة لحدي المعبرة والوادي وهلال هارون يلعب صاغرا في المعبرة…والمريخ لو يقفل النادي للابد مفروض يا يلعب في عبثية التمييع.
رشهم يا حمادة رشهم رشاهم المرض !!
حليل أيام لجان المكاتب، الفطامة حارة ياشداد، وشداد راجلا بشد الحيل وبيعدل الميل ههههه
أخبار قروشنا العملوا بيها طابق شاخور شنو؟
صحيح عالم ما عندها ذرة حياء بالله يا صلاح انت ما بتخجل داير كل الفرق تجي وتلعب باقي الدوري في المعبرة احسن يتوجو المدعوم ويفضوها سيرة. أما عن القروش نحن دايرين نسالك وين المليارات الدخلت كرش ابوالهل بواسطة الحاج عطا المنان وبعدين حكاية المرض دي ما عرفناها!!!! هههه اكييد ديل ناس احيييا متين اشوف الخرطوم….