البشير لو عارف تطبيق (اغلاق الكباري) دا ..كان قعد تاني (30) سنة
صابنها
محمد عبد الماجد
البشير لو عارف تطبيق (اغلاق الكباري) دا ..كان قعد تاني (30) سنة
غايتو أنا ما عارف – يمكن الموضوع يكون (اجتهادات) مني ساكت.
ويمكن هو (تطبيق) عملي لي (الما بريدك في الضلمة بحدر ليك).
الايامات دي في ثقافة (تطبقيات) حايمة.
والله ساعة الكهربة تكون قاطعة ..وتقوم ترجع فجأة كدا – تلقى الناس كلها (حادرة) ليك.
في شنو؟.
الحاصل ايه؟.
الحافلة الجابت المتهمين بتدبير وتخطيط انقلاب 30 يونيو 1989..قالوا قبل ما تصل للمحكمة حصلت فيها مشكلة.
أنا ما عارف… الكلام دا اجتهادات ساكت.
تخيلات كدا.
تهيأت.
زمان كنا بندخل السينما …الواحد فينا لو حفظ ليه كلمة هندية واحدة في الفيلم بطلع عامل فيها (اميتاب باتشان).
والله ما تسأل في زول.
الحافلة التى اتت بالمتهمين من سجن كوبر الى المحكمة كان فيها زي 15 او 16 نفر من عمر البشير وعلي عثمان محمد طه ونافع علي نافع وبكري حسن صالح وحتى ابراهيم السنوسي.
الحافلة دي وقت (الكمساري) عاوز يخلصها….قالوا بدأ من علي عثمان محمد طه عشان كان راكب قدام…اول ما الكمساري طقطق ليه ..علي عثمان محمد طه قال ليه : (هي لله ..هي لله).
الكمساري ما قدر يقول ليه شيء؟.
الكمساري قال احسن ما اسوطها معاه ساكت …الحكاية دي يمكن تكون لسه ما سقطت.
الكمساري طقطق لي ابراهيم السنوسي .. السنوسي دفع نصف القيمة ..وقال للكمساري (طالبان) وهو يشير الى الزبير محمد الحسن.
الكمساري قرب يقوم جاري.
طالبان الجابها هنا شنو؟.
نافع علي نافع ..طبعا زول صعب وقت سمع كلمة (طالبان) – افتكر الموضوع موضوع (دواس) في الحافلة.
الناس ديل اصلهم ما ركبوا ليهم في حافلة مواصلات قبل كدا.
عشان كدا الكمساري اول ما طقطق لنافع علي نافع ..نافع قال ليه (داعش).
اذا (طالبان) دفعوا نص القيمة – اكيد (داعش) ما تدفع ولا قرش.
السوّاق سمع كلمة (داعش)..بدون ما يشعر لقى نفسو قابض فرامل.
اها وقت الكمساري وصل للبشير وطقطق ليه …البشير قال ليه النفر كم؟.
الكمساري قال ليه 20 جنيه.
البشير قال ليه وصلت 20 جنيه ..والله حمدوك عرف ليكم …انتوا وقت عملناها ليكم 5 جنيه طلعتوا الشارع.
اشمعنا هسع راضيين وساكتين ..وعندكم زي العسل.
قبل ما نمشى من الحتة دي ..والله انا شايف الناس البتحاكموا فيهم عشان عملوا انقلاب 30 يونيو ..البشير وعلي عثمان محمد طه ونافع علي نافع وبكري حسن صالح ..مفروض تضموا ليهم الصادق المهدي.
الصادق المهدي ذاتو مفروض يتحاكم معاهم – عشان فرط فيها ..وسلمها ليهم.
انقلاب 30 يونيو ..لو لقى حكومة الصادق المهدي شايلة حيلها ما كان وقع.
عشان كدا المتهم الاول في انقلاب 30 يونيو 1989 هو الصادق المهدي.
نمشي حتة تانية.
أنا فترت من المشي.
زمان كانوا بقولوا لينا لو صبت في (سدني)…ناس الحزب الاتحادي الديمقراطي بشيلوا (شمسياتهم) في الخرطوم بحري.
الحزب الاتحادي طبعا عندو (شفقة) ما حصلت.
شفقة غريبة.
هسع في الزمن دا لو في زول عطس في (حلة حمد)..بقفلوا كبري (المك نمر).
كبري النيل الازرق بتاع الحديد …بقى زي تلفون الفنان محمد الامين – دائما (مقفول).
والله البشير راحت عليه.
جايب محمد عطا.
وصلاح قوش.
وعامل ليهم تدريبات خارجية في روسيا…
وموفر ليهم (جهاز امن ومخابرات) بامكانيات في امريكا مافي.
مع ذلك اغلاق (الكباري) دا ما عرفوه.
الحمدلله.
لله شافنا.
تطبيق (اغلاق الكباري) دا لو الكيزان كانوا عارفنو كان البشير ح يقعد ليكم تاني (30) سنة.
كنا هسع مدورين في (ما لدينا قد عملنا)…(ولن نذل ولن نهان)..و(هي لله ..هي لله).
وعلي عثمان محمد طه كان بكون شغال ندوة في ميدان المولد الكبير في الخرطوم.
الله شافنا بس.
عشان ما تلخبطوا ..وتفهموا كلامي دا غلط.
يا جماعة (الكباري) دي قفلتها (الكورونا).
عشان ما يحصل اختلاط وتزاحم.
عشان كدا بقفولوا الكباري.
بمناسبة الكباري دي.
او بدون مناسبة.
خلوني علي كيفي.
قالوا ناس المريخ معترضين على عودة الدوري الممتاز ليلعب عن طريق (التجميع) في الخرطوم.
وقالوا ان المريخ هدد بالانسحاب…عشان الطريقة دي في صالح الهلال.
باعتبار ان الهلال متصدر للدوري الممتاز الآن بفارق 3 نقاط من الوصيف.
الى جانب ان الهلال كان عندو مباريات كتيرة خارج الخرطوم ..قامت (كورونا) تسببت في ان تنقل كل تلك المباريات الى الخرطوم…والمريخ لعب معظم مبارياته التى كانت في الولايات.
الجدول جابها كدا.
الجدولة.
اكيد ناس الفاتح باني ما كانوا عارفين موضوع (كورونا) دا.
قول عارفين.
الجدول وضع عن طريق (القرعة).
والقرعة خدمت الهلال هنا – المشكلة شنو؟.
جات كدا.
للرد على المريخ في هذه (الجرسة)..نقول ليهم اول حاجة الهلال ما عندو ايد في الموضوع دا.
الطريقة دي فرضتها (كورونا).
الامر الثاني ..اذا لعبت هذه المباريات في الخرطوم او في الولايات ..سوف تكون واحد ..لأنها جوة الخرطوم وبرة الخرطوم سوف تلعب بدون جمهور.
واضحة دي.
يعني ما في داعي للتلتلة والسفر وخسارة القروش وتعريض حياة الناس للاصابة بي كورونا.
الامر الثالث وهو الاهم – اثناء الحراك الثوري لعب المريخ في الخرطوم مع هلال الابيض وخسر المباراة بسبب الاحداث المؤسفة التى حدثت في تلك المباراة بسبب اشتباك بكري المدينة مع حكم المباراة ودخول جمهور المريخ للملعب ليتسبب ذلك في عدم اكمال المباراة.
بتذكروا الكلام دا.
الاتحاد العام بعد تلك الاحداث قام الغى المنافسة …وعمل ليه منافسة جديدة.
كان يفترض ان يعاقب المريخ وان يعتبر مهزوم ويحرم من جمهوره اضافة الى عقوبات اخرى.
كل هذا الكلام لم يحدث – اذ تم الغاء المنافسة كلها.
يعني المستفيد الوحيد من الموضوع دا كان المريخ.
والمتضرر الاكبر كان الهلال.
وقتها ما كان في (كورونا) مع ذلك الهلال ما اعترض وواقف ولعب الدوري الممتاز وخسرو.
لو بتذكروا في ذلك الموسم …الهلال تعادل في اول مباراته مع الخرطوم الوطني وتسبب ذلك التعادل في ان يفقد الهلال لقب الممتاز.
بينما لم يحضر فريق مريخ الفاشر ليلعب امام المريخ واعتبر على ضوء ذلك المريخ فائزا.
هسع يا ناس المريخ وقت جابت ليها (كورونا) مالكم بقت ليكم حارة؟.
ألعبوا كورتكم ساكت.
ما عندكم كورة ..امشوا شوفوا ليكم شغلة تانية.
اعملوا (جرستكم) دي بعيد مننا.
نحن فترنا من (البكا) دا.
السنة كلها يشكوا.
ويبكوا.
ونحن ما بنلعب.
عليكم الله هسع الناس في شنو؟.
………………
متاريس
الاتحاد العام اعلن عن فترة التسجيلات بانها سوف تكون في اكتوبر القادم.
يعني بعد شهرين.
والهلال عاوز كتير.
لجنة التطبيع التى سوف يتم تعيينها للهلال سوف تكون امام مهمة صعبة ..وهي تشرف على التسجيلات القادمة.
الهلال عاوز ليه 7 – 8 عناصر على الاقل.
مجلس الهلال في باقي ايامه دي مفروض يحسم عودة جمال سالم.
جمال سالم مهم يكون مع الهلال في الدوري وفي الموسم القادم.
محمد احمد بشه …مهم جدا يكون في لجنة التطبيع التى سوف يتم تعيينها للهلال.
وجود بشه في المجلس مهم.
بشه زول شارب الكورة شراب…وعارف أي حاجة.
………..
اخر ترس : العيد جمعة ..برضو ح يقفلوا الكباري!!.