بعيدا عن الرياضة قريبا من الناس !!

بالعربي الكسيح

محمد الطيب الأمين

بعيدا عن الرياضة قريبا من الناس !!

داير ليهو (موكب موكبين) !!
* حتى وقت قريب كانت (البرادو وأخواتها) من لوزام (رجال الأعمال واخوانهم) .
* واليوم أصبحت (البرادو وأخواتها) من لوزام (القونات وصحباتهم) .
* فنانات عملن (لحن) لونسة أقرب لونسة الشماسة وركبن أفخم العربيات.
* أول مرة أعرف إنو (الصوت) ما من شروط الغناء .
* لو في (قونة) عندها (وجنات) و(ساق سمح) ممكن تركب توسان .
* السماحة سماحة (الساق) وليس الصوت .
* حاجة تكسف .
* المثل بيقول : (الطين في الكرعين ما ببقى نعلين) .
* لكن ممكن يبقى (شراب) .
* مع خريف السنة ده (الطين ببقى نعلين ونص وخمسة) .
* كلما يجي الخريف شوارع الظلط وشوارع الما ظلط بتكون في مستوى واحد من السوء .
* نفس (الحفر) الما في الظلط موجودة في الظلط .
* نفس الطين والعجين والموية الراكدة و(الراقدة) .
* وأول مرة في حياتي أشوف لي موية راكدة في الظلط.
* وغايتو جنس غايتو .
* منذ أيام الطفولة رسخ عندنا إن (الكلبة) أشرس من (الكلب) وبالذات (الكلبة الوالدة) .
* ونحن وأولاد حلتنا لكل منا (ذكرى أليمة) مع (كلبة والدة) أو (كلبة على وشك الولادة) .
* بتذكر كان في (كلبة) في حلتنا اتخصصت في العبدلله.
* والغريبة ما كانت (والدة) .
* بالرصد والمتابعة عرفنا إنها (اخت الكلبة الوالدة) .
* يعني (خالة) .
* خالة أيوة .. لأنو من ناحية نسب (اخت الأم بتبقى ليك خالتك) .
* وهي خالة الجريوات.
* قبل أيام قابلت سيد (الكلبة ده) بعد (١٨) سنة .
* عزمتو شاي وقربت اسألو من (الجريوات) لكن خفت يسألني من دستة البناطلين (المشرطة) من الخلف .
* نسكت علي بعض الذكريات خوفا من الفضيحة .
* فهم برضو .
* (البرود) الفيهو مدني عباس مدني لا يشبه (سخونة) الثورة .
* مدني عباس مدني محتاج (يدفوهو) بموكب موكبين .
* والله صحي .
* لا نقول : (قليلة هي العيون التي تبكي من خشية الله) ولكن نقول كثيرة هي العيون التي بكت من خشية (بكرة) .
* لو كانت للدموع (مجاري) و(خيران) لفاضت شوارع البلد .
* خريف الدموع في السودان يحتاج لهيئة إرصاد و(نشرة جوية) .
* بلدنا محفزة للبكا في كل شئ .
يجي الخريف نفقد أرواح وبيوت ، نسافر نموت في الأسفلت بحوادث حركة سببها الأول (سوء الشوارع) ، نمشي المستشفيات نلقى جثث قتلها الإهمال ، نطلع الشارع اوساخ لها رائحة ، تمشي تقضي مصلحة تدفع رشوة ، داير تركب مواصلات إلا تكون شايل في جيبك نصف مليون .
* الوجع راقد .
* بلد محل ما تهبشها (هي) تبكي و(انت) تبكي .
* وبما إنو (المقتولة ما بتسمع الصايحة) فنحن كذلك لا سامعين (نحيب) البلد ولا البلد سامعة (بكانا).
نسأل الله الفرح وهذا (أقوى الإيمان وليس اضعفه) .
* والحمد لله من قبل ومن بعد .
* أثبتت الأيام أن علاقة صف الرغيف أقوى من علاقة صف البنزين.
* وهذا لا يقلل من متانة علاقة صف الجاز .
* لتبقى علاقة (صف الحتة الناشفة) هي الأقوى بين جميع العلاقات .
* في الخرطوم بعد كل مطرة عشان تعبر الطريق لازم تقيف صف.
* الله يجازي الإنقاذ وسنين الإنقاذ.
* جات لابسة طرحة (نمر) ، وشايلة شنطة من جلد (الأصلة) ولابسة تيشيرت فيهو صورة (أسد) ، والجزمة جلد (بقر) (والمفتاح فيهو علاقة من صوف الأرنب والعيون عيون (غزال) .
* كانت (حيوانة) جدا .
* مرت بينا مرور الكرام وكل (قرد طلعت شجرتو) .
* هي حسناء تستاهل (نقطع تذاكر عشان نشوفها) .
* شايلة (الغابة) وحايمة ولا عزاء لشرطة الصيد والحياة البرية .
و..و..
* وما قلنا ليك الحب طريق قاسي وصعيب من أولو ما رضيت كلامنا وجيت براك أهو…………. (ديك كلبة والدة شد حيلك بس) .