في الحتة القبل (الركبة) مباشرة !!

بالعربي الكسيح

محمد الطيب الأمين

في الحتة القبل (الركبة) مباشرة !!

* لا نقول : (قليلة هي العيون التي تبكي من خشية الله) ولكن نقول كثيرة هي العيون التي بكت من خشية (بكرة) .
* لو كانت للدموع (مجاري) و(خيران) لفاضت شوارع البلد .
* خريف الدموع في السودان يحتاج لهيئة إرصاد و(نشرة جوية) .
* بلدنا محفزة للبكا في كل شئ .
* يجي الخريف نفقد أرواح وبيوت ، نسافر نموت في الأسفلت بحوادث حركة سببها الأول (سوء الشوارع) ، نمشي المستشفيات نلقى جثث قتلها الإهمال ، نطلع الشارع اوساخ لها رائحة ، تمشي تقضي مصلحة تدفع رشوة ، داير تركب مواصلات إلا تكون شايل في جيبك نصف مليون .
* الوجع راقد .
* بلد محل ما تهبشها (هي) تبكي و(انت) تبكي .
* وبما إنو (المقتولة ما بتسمع الصايحة) فنحن كذلك لا سامعين (نحيب) البلد ولا البلد سامعة (بكانا).
* نسأل الله الفرح وهذا (أقوى الإيمان وليس اضعفه) .
* والحمد لله من قبل ومن بعد .
* بعد خمسة شهور إكتشف المريخ أن مدربه التونسي (ما مدرب) .
* وللمريخ باع طويل في حكاية (المقالب دي) .
* وتعال أناقشك.
* قبل كده المريخ جاب لاعب من البوسنا اسمو (نجاد) ولما الدوري بدأ إكتشفوا إنو اللاعب ده (ما لاعب) .
* إختار المريخ (نجاد) عشان حاجتين أتنين.
* الحاجة الأولى كان طويل وعالي .
* والحاجة التانية كان يرتدي بنطلون جينز مشروط في الحتة (القبل الركبة مباشرة) .
* والله صحي.
* دارت السنين وشرب (الإصيفر) من نفس الكأس.
* قبل أيام اكتشفوا إنو المسلمي (ما مدرب) .
* الراجل كان (طباخ) الإفريقي التونسي .
* وجماعتك ديل شافوا (اللون) و(عوجة اللسان) و(بناطلينو الضيقة) وافتكروا إنو المسلمي مدرب .
* القاعدة التي يجب أن يعلمها ويتعلمها أهل المريخ هي : (ما أي زول لابس بنطلون جينز مشروط في الركبة معناها مدرب أو لاعب) .
* أول مرة في حياتي أشوف لي فريق بيجيب مدرب (ما مدرب) .
* حاجة تكسف .
* الوزيرة متفقة مع لجنة الطوارئ الصحية .
* وقرار الوزارة هو قرار الطوارئ الصحية .
* والفيفا لو (كسرت رقبتها) ما بتقدر تجبر وزارة الصحة ولجنة الطوارئ على عودة النشاط عشان خاطر شداد .
* يعني الموضوع ده يا بروف ما فيهو تصعيد.
* ولا فيهو عنتريات .
* وكل العالم ولاكثر من خمسة شهور تحت رحمة وزارة الصحة .
* العناد والاستفزاز دي نهايتو يا بروف.
* لو تمنينا عودة الدوري سيكون ذلك بسبب عبد الرؤوف.
* ما شبعنا من روفا.
* كورونا حرمتنا من (ادروب الهلال الفنان) .
* عبد الرؤوف هو الهدية الأغلى من الكاردينال ولذلك سنشكره بعد كل تمريرة لروفا وبعد كل هدف.
* لو في كرة القدم في (صدقة جارية) ياهو عبد الرؤوف ده .
* شكرا الكاردينال على هذا النجم .
* بالمناسبة.
* وين عبد الرحمن سر الختم وأحمد حسب الرسول بدر والخلفية مختار مكي .
* ما شفنا لينا (كيس موز) من هذه الهيئة الإستشارية في تمارين الهلال .
* فصاحة ساكت .
* الهيئة الإستشارية (للتحنيس) .
* وغايتو جنس غايتو .
* البيشوف المريخ (قايم وقاعد في التدريبات) يحلف يقول ما مشاركين في البطولة الأفريقية (صحبة راكب) .
* الهلال دخلهم الأبطال (صحبة راكب) ، وكورونا اعفتهم من التمهيدي.
* بختكم والله .
* ماشة معاكم عسل على رأي المثل .
* والله الزول لو ما بشوفها شينة يتمنى الهلال يكون قاعد مرتاح زي المريخ كده .
* قاعد ساكت .
* يجي وصيف في الدوري ، ويشارك صحبة راكب ، وتجي كورونا من السماء تعفيهو من التمهيدي .
* عزة جد .
* اموركم واضحة.
* أجمل حاجة إنو ما في نادي بيحسد المريخ .
* يحسدو علي شنو ؟
* على الوصافة ؟
* ولا على (صحبة الراكب) ؟
* ولا على الإعفاء الصحي بسبب كورونا ؟
* إعفاء صحي بسبب كورونا.
* سيسجل التاريخ أن (الإصيفر السوداني) ، و(السحلب الصومالي) ، و(الشاش الجنوب السوداني) هي الفرق الأكثر إستفادة من كورونا .
* معفيون صحيا.
* كما نذكر أن المريخ هو أول نادي في العالم يخسر بالسبعة والسبب (البرد) .
* وغايتو الله يكفينا شر (المصدي) اللمعتو الأيام.
* ونركب صافنات ونجيبة (ديامية) واصلو الزول بيموت والذكرى تفضل حية .
* و..و..
* وما قالوا عليك حنين نان وينا …….. (الكورة الشالها زيكو) ؟