قصة (سفر المريخ) الجمعت رأسين بالحلال !!
بالعربي الكسيح
محمد الطيب الأمين
قصة (سفر المريخ) الجمعت رأسين بالحلال !!
* لو صحت مقولة (قلة الشغلة بتعلم المشاط) لكانت كورونا قد علمت كل الشعب (المشاط) .
* ولكن أعتقد أن هذه المقولة لا أساس لها من الصحة والدليل (ما فينا زول أتعلم المشاط) .
* الحظر .. (قلة شغلة وملل وزهج وفلس) .
* حاولنا نستفيد من الحظر في القراية والإطلاع.
* في السباحة والرماية وركوب الخيل .
* في الونسة و(الليدو) و(الضمنة) .
* في النوم والمكوة والغسيل .
* فعلنا كل ذلك ولم نقتل الملل ولا الزهج .
* نحن وأولاد حلتنا نتقابل يوميا في (منتدى) مصغر وغير مستوفي الشروط الصحية .
* نجلس ونتسامر بالنهار .
* أي عارف السمر بالليل لكن نحن بنتسامر بالنهار .
* على كيفنا أفتكر .
* نتسامر في الوقت البريحنا .
* أمبارح قعدنا مجموعة من أولاد الحلة .
* كنا حوالي (١١) شخص .
* ال(١١) ديل فينا (١٢) هلالاب .
* قعدنا نتونس .
* اتكلمنا أولا في الدين وتوقفنا كثيرا عند علاقة سيدنا الحبيب محمد صلى الله عليه وسلم بالصحابي رضى الله عنه بلال (مؤذن الإسلام) .
* والعلاقة بين سيدي رسول الله صلى الله عليه وسلم وبلال رضى الله عنه علاقة حب بدأت بي (ارحنا بها يا بلال) وانتهت عندما اعتزل بلال (الآذان) بعد وفاة الرسول الغالي.
* ثم تحدثنا عن السياسة والكورونا وغلاء الأسعار.
* تحدثنا عن ظروف ناس معانا في الحلة اعتزلوا وجبة الفطور بعد أن (اتعزز العدس) .
* تحدثنا عن الخريف الجاي وعن الإحباط الذي أصاب طلاب الشهادة السودانية الذين علقت كورونا امتحاناتهم لأجل غير معروف .
* تحدثنا عن ذكريات الطفولة والحب من أول نظرة ، وعن الباسطة اللاصقة في ورقة الجريدة .
* تحدثنا عن بت الجيران وستات الشاي والسفر وجرح الاحبة.
* وفجأة جبنا سيرة الرياضة .
* أول حاجة اتكلمنا عن (الكوز) القال : (العارف عزو مستريح) .
* واقترحت لاولاد الحلة أن احكي لهم قصة المريخ الشهير ب(الإصيفر) عندما سافر إلي الكنغو لمقابلة (الخال) مازيمبي .
* القصة دي ممتعة جدا وانا بحبها وبحب احكيها.
* قبل كده عندنا صديقنا مشى يتقدم ليهو لبت أبوها هلالابي .
* أبو البت ده عندو رأي في أي عريس أتقدم لبتو.
* المهم .. هذا الصديق ساقنا معاهو .
* وللأمانة أبو البت استقبلنا استقبال فاتر في البداية .
* بدينا معاهو ونسة ودخلنا ليهو في الرياضة .
* عمك لما دخلنا في الرياضة فتح في الونسة شوية كده .
* طوالي أنا قلت أرفع ليهو مزاجو وحكيت ليهو قصة المريخ في الكنغو .
* عمك إتكيف جدا وجابوا لينا بعد داك (الكيك واللبن) .
* رغم إنو (الكيك) بتاعهم كان فيهو ريحة (تخزين) لكن قلنا ما مشكلة .
* (كيك) قديم ، شكلو عمك ده بطرد العرسان بالكيك المعفن ده .
* نجي للقصة .
* المريخ كان لاعب مباراة الإياب أمام مازيمبي في الكنغو .
* قام جمال الوالي الشهير ب(عزو) أجر ليهم طيارة خاصة .
* الطيارة كان فيها اللاعبين والجهاز الفني بقيادة غارزيتو والبعثة الإدارية.
* وتاني ؟
* وتاني فيها عدد عشرة (بودي قارد) .
* والله صحي .
* بودي قارد لشنو يعني ؟
* اسألني دبل عليك الله .
* عشرة بودي قارد يعني (تشكيلة إلا بودي قارد) .
* طيب وتاني ؟
* ساقوا معاهم في الطيارة عدد أربعة طباخين.
* نظام الفريق كبير وما باكل إلا أكل مضمون .
* وساقوا معاهم (٢) فنيين لفحص هواء المكيف .
* أقسم بالله صاح .
* (٢) ديل قالوا فنيين بفحصو هواء المكيف لو فيهو مادة مخدرة ولا ما فيهو.
* عليك الله (عزو) ده ما ببالغ .
* هسه المريخ ده داير ليهو (تخدير) .
* جماعتك أول ما وصلوا معقل مازيمبي الشرطة والجمهور دقوا البودي قاردات.
* دقوهم دق عيش .
* دق عديل .
* وقطعوا منهم الكهربا في الفندق .
* لا طباخ ولا هواء ولا مكيف ولا كلام فارغ .
* وشبكونا ليك المريخ يشكو مازيمبي للكاف .
* كاف ب(القاء) .
* يوم المباراة مازيمبي بقيادة الأخ غير الشقيق مبينزا دور فيهم خلى ليك المريخ في حتة ونجمة المسالمة في حتة .
* دقوهم وغلبوهم.
* رغم إنو تحت تحت قالوا الطيارة كان فيها حوالي ٤ شيوخ .
* الشيوخ ذاتهم دقوهم .
* وبدأ البكا .. غارزيتو باعنا، وولد غارزيتو اشترانا.
* القصة دي يا جماعة أنا لما اتذكرها بضحك بالصوت العالي والله العظيم.
* المهم .. أي مريخابي تمهيدابي يقول ليك مازيمبي ده اداك خمسة ، قول ليهو الخمسة دي انت أخدتها من هلال التبلدي .
* انا أول فريق يغلب مازيمبي في بلدو يا بتوع (فنيين الهواء) انتو.
* و..و…
* ومن حور الجنان أم انت من ……. (الكنغو) .
