صحيفة كورة سودانية الإلكترونية

الغربال يسجل على طريقة (العفش داخل البص على مسؤولية صاحبه)

1٬370

صابنها

محمد عبد الماجد
الغربال يسجل على طريقة (العفش داخل البص على مسؤولية صاحبه)
• زمان وقت كنا بنقطع تذاكر عندما ننوى السفر – كان اول شيء بننظر خلف التذكرة .. كان بنلقى في خلفية التذكرة مكتوب (العفش داخل البص على مسؤولية صاحبه).
• بخط عريض وواضح.
• الموضوع دا كان عامل لينا قلق.
• عامل لينا ارق شديد.
• ما بنوم الليل.
• المقولة دي كان عندنا منها عقدة. وكنا بنعتبرها حسب فهمنا نوع من الحقارة – ان تشحن عفشك في (البص) وان يكون تحت مسؤوليتك.
• ظللنا طول عمرنا عندنا رأي في مقولة (العفش داخل البص على مسؤولية صاحبه).
• كان عندنا رأي واضح وقاطع في الحتة دي.
• كنا بنعتبرها قمة (التعسف).
• كنا شايفنها تعدي على حققوقنا.
• ونحن كنا (شفوت) – عندنا رأي في أي حاجة.
• امس وأنا بحضر في مباراة الهلال وهلال الساحل وبعد ان شاهدت هدف محمد عبدالرحمن (الغربال) في شباك هلال الساحل اتفسرت لي حكاية (العفش داخل البص على مسؤولية صاحبه).
• اقتنعت عديل كدا.
• اتمنطقت يا جدعان.
• وخليت الغلّاط الكتير وأنا بشاهد هدف الغربال يتهادى في مرمى كاميني حارس هلال بورتسودان.
• اقول ليكم شنو؟
• عندي ضلعة اتكسرت.
• سمعت ليك (طق) دي افتكرتها في صدر الزول القاعد جنبي.
• اصلو ما شعرت ليك بي حاجة.
• اقول ليكم الهدف دا عمل مشكلة في (الكهربة) قبل ما يتسجل ..عشان كدا قطعت.
• كشافات الهلال ما بتستحمل الحاجات دي.
• دي قوة فوق تحملها.
• ام اقول ليكم الهدف عمل مشكلة في (الانترنت) بعد ان اتسجل ، الصورة طفشت.
• بقيت اشوف ليك كاميني حارس هلال بورتسودان عشرة عشرة.
• طشاش طشاش.
• غايتو يا ناس قناة الملاعب عندكم نقل زي الزول القاعد ياكل ليه في (جلي).
• اقول ليكم حاجة.
• زي الزول البنظف ليه في ام فتفت.
• يتشاف ليك رهاب رهاب.
• تشوفو هنااااك – وهو قاعد جنبك.
• أنا اول مرة في مباراة امس يجيني ضعف نظر في (الضهر).
• اول مرة الحكاية دي تحصل لي.
• زغزغة شديدة.
• بعد هدف الغربال عندنا باقى (شربوت) مصبن في التلاجة من ايام العيد – شربوت عادي ما وصل مرحلة (الحرمة).
• اوعكم عقلكم يمشي لي بعيد.
• قلت احسن وقت اشرب (الشربوت) بعد ان سجل الغربال والنتيجة اصبحت 2 / صفر.
• ما في افضل من هذا الوقت.
• دا وقت الشربوت ذاتو.
• طلعت الشربوت من التلاجة …شربت منو شوية.
• وقعدت في التلفزيون.
• عادي ما شعرت بي أي شيء.
• بقيت اشوف ليك في حاجات ما ياها في التلفزيون.
• الصورة بقيت اشوفها ليك طشاش ..طشاش.
• الشاشة تقرب لي وتاني تبعد مني.
• وكاميني حارس هلال بورتسودان بقيت اشوفو ليك 110 – 110.
• قلت يمكن عشان الاسعار ارتفعت.
• أي حاجة زادت.
• اتعاملت مع الموضوع بحسن نية.
• فارس بقيت اشوفو ليك داخل في العقيد..وحسين الجريف اشوفو ليك راموس.
• دا شنو دا؟
• عيوني (زغللت).
• حكم المباراة النور القضارف وقت يجري جنوب بشوفو جاري شمال…ووقت يجري شمال بشوفو جاري جنوب.
• عبدالرؤوف (الكورة) بعمل فيها زي ما عاوز مرة يمررها تحت الارجل ومرة فوق الرؤس.
• بدخل في حتات صعبة.
• ويطلع زي الشعرة من العجين.
• انا افتكرت الموضوع من (الشربوت).
• قلت اوعك هدف الغربال دا يكون (خيال).
• هدف (خيال علمي).
• معقولة الشربوت بعمل كدا؟
• يا زول هدف الغربال دا ما عادي.
• الهدف دا ما طبيعي.
• الشربوت عمل عمائلو.
• اكيد.
• قربت اقتنع بالموضوع دا واخت اللوم على (الشربوت) اتاريه الموضوع في النهاية طلع من ناس قناة الملاعب.
• لا شربوت ولا حاجة.
• والله (شربوتي) ما عندو أي ذنب.
• شربوتي عادي – ما وصل للمرحلة دي.
• معقولة يا ناس قناة الملاعب نحن في القرن الواحد وعشرين لمن تقطع الكهربة وترجع ما تعرفوا تظبطوا الصورة.
• انتوا الكورة قاعدين تنقلوها بي شنو؟
• بي (حقنة)؟
• شغلكم دي شغل (3310).
• اصلو ما اكتر من كدا.
• يا ناس قناة الملاعب مباراة بالصورة دي ما تنقلوها لينا.
• اعتذروا.
• دا شغل بتاع (بشتنة).
• بتاع (استهداف).
• هسع لو الكلام دا حصل قبل هدف الغربال …كان موقفكم يكون شنو؟
• معقولة تحرمونا من هدف بهذه الروعة.
• والله يا جماعة انا في البداية كنت عاوز اكتب عن هدف عثمان ميسي – هدف برضو ما ساهل.
• فيه جماعية وفيه روح (ميسي).
• نقلات.
• ومربعات.
• وانتقال من حتة لي حتة.
• هدف كسر صمود دفاع هلال بورتسودان.
• هدف انهى المباراة.
• لكن وقت شفت هدف الغربال – نسيت هدف ميسي وهو يسجل اول اهدافه مع الهلال بصورة رائعة بعد ان تصعبت المباراة على الهلال.
• انا بخاف من المباراة البتقطع فيها الكهرباء.
• بخاف من العوارض الكتيرة – والاصابات والاهداف السهلة عندما تضيع.
• وبشعر بي اننا ممكن نفقد نتيجة المباراة.
• هدف عثمان ميسي بدد هذه المخاوف وضمن نتيجة المباراة.
• لكن كمان هدف الغربال حاجة تانية.
• كاميني طلع.
• رجع تاني.
• وقف.
• قال لا احسن اقعد.
• جلس على ركبته.
• رفع ايدو.
• شتر نظرو.
• مرق نفسو.
• جبد حيلو.
• الغربال برم الكورة.
• كاميني لقى الكورة خلفو في الشبكة.
• مرت كيف ما عارف؟
• اتلعبت كيف ما عارف؟
• جاءت بي وين ما عارف؟
• كاميني زينا واحد لقى الكورة في الشبكة.
• وهو زي الشايلو السيل.
• او الواقع ليه من جمل.
• مسكين.
• ما عارف أي شيء.
• الهدف دا لو جاء في الدوري الانجليزي كان اللانجليز فهموا حاجة.
• الهدف دا لو جاء في الدوري الاسباني كان الاسبان اتكلموا عربي.
• الهدف دا لو جاء في الدوري الايطالي – الطليان كان اتخلوا من مدرستهم الدفاعية وشافوا ليهم شغلة تانية.
• شوف يا الفاضل ابو شنب.
• شوف يا الفاتح باني.
• شوفوا الاهداف بتسجل كيف؟
• لا ضربات جزاء.
• ولا تأجيل.
• بالمناسبة قالوا غارزيتو وصل…وسوداكال اتفق معاه.
• وناس محمد موسى الكندو عندهم لقاء تفاكري مع اقطاب المريخ.
• والله ليكم حق تسجلوا عضويتكم وتعملوا جمعيتكم في (حديقة الموردة).
• شغلكم دا شغل (حدائق) ساكت.
• شغل (رومانسية) ومسلسلات تركية.
• سوداكال شغال.
• وبتعاقد.
• وبسجل.
• وناس الكندو عندهم لقاء (تفاكري).
• انتوا قاعدين تتفاكروا في شنو؟
• عافرم عليك يا سوداكال قدرت على الجماعة.
• لا اتحاد عام.
• ولا شرطة.
• ولا نيابة.
• نفعت مع الزول دا.
• …………
متاريس
• في الساحة هناك لاعب اهلي شندي السابق ولاعب المنتحب الفلتة حسن متوكل…ميسي اخر.
• حسن متوكل قدم مسوم استثنائي في السعودية – يمكنكم ان تسألوا عن ذلك.
• حسن ميسي.
• لموا لينا حسن ميسي مع عثمان ميسي واباذر ميسي عشان (الميسيات) تكمل.
• الهلال في حاجة الى هذا اللاعب.
• لاعب صغير في السن وصاحب قدم شمال قاطعة.
• حسن متوكل يلعب في الطرف الشمال ويلعب في خط الوسط.
• لاعب جوكر.
• كوكتيل خانات الشمال.
• او هو كانسلتو شمال.
• هناك تحرك من المريخ ومن سوداكال تحديدا نحو هذا اللاعب – وسوداكال يبحث عن رفع اسمه وتوجيه ضربات لخصومه بعد التعاقد مع غارزيتو.
• الذي اعرفه ان سوداكال متحرك بجدية تامة لتسجيل اللاعب في المريخ.
• اللاعب كان يمكن ان يوقع للمريخ في التسجيلات الماضية لولا ان المريخ كان محروم من التسجيل.
• يا ناس الهلال احسموا موضوع هذا اللاعب …لن تندموا.
• هذا اللاعب لا تجعلوه يفلت منكم.
• الهلال في حاجة الى اصحاب القدم اليسار.
• الهلال في حاجة الى هذه المواهب.
• يا الفريق السر.
• يا الفاضل التوم.
• يا نزار مالك.
• يا القليعي.
• احسموا تسجيلاتكم من بدري.
• حارسكم.
• ولاعبكم.
• و…و..
• وما عاوزين نقول اكتر من كدا.
• سوداكال يريد ان يفعل أي شيء من اجل ان يكسب ود جماهير المريخ.
• سوداكال عاوز يدخل الانتخابات بـ (حسن ميسي).
• كلمتكم انا.
• املك معلومات وتفاصيل دقيقة عن تحرك سوداكال نحو هذا اللاعب.
• اللاعب حر ويمكن حسم امره والتوقيع معه الآن.
• ونراهن على هذا اللاعب.
• اذا ذهب اللاعب للمريخ سوف يندم الهلالاب كثيرا عليه.
• ……
• ترس اخير : كلمتكم!!

قد يعجبك أيضا
5 تعليقات
  1. صلاح يقول

    هههههه انت يا ود عبد الماجد عندك ضعف نظر في ضهرك، طيب الصبي العجوز أبو المستعار المندلاوي يكون عنده تايفويد في الإضنين ولا شنو 😆😆😆
    الزعلة على الولد ميدو لسه ظاهرة علي المرخرخين، ولو ما أخاف الكضب عمك أبو دليبة أمبارح بكون ما جهز العمود إلا بعد قوون ميدو العالمي، وطوالي حايتذكر لينا الطاغية شداد وتابعه المخرب سدوكل 😝😝😝

  2. ياسر عبدالملك يقول

    ما شفت التسلل؟ هههه قلت لي حسن متوكل؟ هو ميسي واحد بس هو الهلال الا يبقى تيم بت مسيمس ههههاي والله العظيم الحرام حدو قريب ونقاط التسلل وضربات الجزاء السجلها الغربال تندموا عليها قريب …يمهل ولا يهمل.

  3. Hajjam يقول

    أبو المستعار جاك باسم جديد ياابوصلاح. تعدد الاستعارات والاسلوب واحد. مفردات اليخماو ومفردات أبو المستعار التي كررها مئات المرات. وبعض الاحيان تكرار مفردات اليخماو كوبي اند بيست. 😹😹😹😹

    1. خالي شغل يقول

      ونسه مشجعين….انت عايز تسجل اي لاعب في الهلال؟ تيري موجود هههه زمان الهلال كان عايز يسجل ٩ لعيبه من نيجيريا دفعه واحده ..كمال شداد رفض وقف الف احمر قال ده لو تم حنسمي هلال نيجيريا هههههه

  4. عادل نوار يقول

    والله يا هجام نفس اوهام وأساطير بعض ناس المنطقة المعروفة عن شي اسمو البعاتي بالضبط زي المستعار الذي يبدد نوم عيونك يا ساذج..ه اي زول يعلق مستعار؟ وانت منو يا وهم حتى تنصب نفسك وتحكم على كل يكتب انت شخص ساذج ومعلوماتك عن التعايش مع الناس ضعيفة جدا لأنك كما يوصفك الدكتور سامر بابكر انك من نوعية من ضواحي الدنيا قادم ومعاك كراكيب وهتش وعفش… ضحل متفلت متعصب

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد