(فارس) الحوبة جيبوا ليه (سيف) وزحو منو بعيد!!

0
1413

وان طال السفر

محمد عبدالماجد

• أرجع ليكم للوراء شوية – نهاية الموسم الماضي…الكلام دا ما بعيد.
• جيبوا ليكم (ورقة وقلم).
• وفتحوا لي (عيونكم) العاملة زي (مديدة البلح) وقت الزول يقوم من النوم.
• يتنفط متل (صواني الخبيز).
• لا غاز.
• لا رغيف.
• الزول وقت تكون (رقبتو) طويلة بمدها في سؤال ولا بيستحق.
• نحن (رقابنا) ما بنمدها إلّا فوق الاسئلة الصعبة.
• الاسئلة البتستاهل.
• في لخبطة بين (العيون) وقت تكون قايم من النوم و(مديدة البلح).
• هسع دا ما موضوعنا.
• امس كنا فاطرين برة زي عمر صالون.
• ازمة الغاز ظهرت في (شوربة الفراخ).
• جابوا لينا في الفطور (دمعة فراخ).
• طاعمة!!.
• الظاهر الجماعة الكانوا عازمننا كانوا ضابحين ليهم (ديك).
• لكن عشان ازمة الغاز ، (الديك) شوف عيني ينطط في الصحن.
• الديك في الصحن بي علعلو…لو قلت ليه (كر) يقوم جاري من (الصينية).
• ونحن قاعدين ناكل فيه.
• ازمة غاز حادة.
• عشان ما أنسى.
• في الموسم الماضي، الهلال حسم بطولة الدوري الممتاز وفاز بها بعد ان حقق الفوز على المريخ بهدفين دون رد.
• الناس بتذكر هدف سموأل (الصاروخي).
• جمال سالم لغاية الآن عطشان.
• كل ما يجيبوا المباراة اعادة في قناة الملاعب ، جمال سالم بيمشي يقطع ليه (جردل) موية.
• هدف سموأل (الصاروخي) جدّع ليك لاعبي المريخ كل واحد منهم مشى ليه بلد.
• علي جعفر (شطب).
• ابراهيم جعفر (شطب).
• علاءالدين يوسف (شطب).
• راجي عبدالعاطي (شطب).
• باسكال (انهاء تعاقد).
• ضفر (صرف نظر).
• جمال سالم (عدم صرف استحاقات).
• هدف سموأل عمل كل هذه العمائل في المريخ ، بما في ذلك اقالة محمد موسى المدير الفني للمريخ.
• هدف صاروخي.
• فرتك دفاع المريخ.
• المشى حي الوادي.
• والمشى حي العرب.
• والرجع الأهلي الخرطوم.
• في شندي كان هناك هدف (صاروخي) آخر جعل فريق الأهلي شندي يفوز بكأس السودان.
• هدف جاء في جمال سالم من نص الملعب.
• انا لغاية الآن وقت اشاهد الهدف في اليوتيوب بمشي اشرب وارجع تاني ، واخد لي نومة واقوم اشاهد بقية الهدف والكورة تعانق شباك المريخ.
• هدف زي (ليالي الحلمية) 6 اجزاء.
• الكورة ماشه (6) شهور من منطقة المخالفة الى ان وصلت لمرمي المريخ.
• جمال سالم ما فهم أي شيء.
• هدف الأهلي (الصاروخي) سجله فارس عبدالله الطرف الشمال لاهلي شندي.
• وهدف الهلال في المريخ في نهائي كأس الممتاز سجله سموأل الطرف اليمين في الهلال.
• كدا بقى عندنا كم صاروخ؟.
• صاروخين.
• الاتنين في الهلال.
• خليكم متابعين.
• صاروخ يمين.
• وصاروخ شمال.
• أمانة فيكم بعد (الصواريخ) دي عاوزين جمال سالم يقعد ليكم.
• جمال سالم ما يعملها ليكم (حقوق مادية).
• ما يعملها ليكم (زعل).
• وامه عيانة.
• وعندو ظروف في يوغندا.
• واخوانه 6 بيصرف عليهم.
• جمال سالم ما يعمل ليكم الحاجات دي حيلة.
• جمال سالم بعد (الصواريخ) دي ما بقعد ليكم.
• صاروخ واحد جهجهو.
• مع الصاروخ التاني دا لو ربطوه ما بقعد ليكم.
• آدم سوداكال ذاتو ما اظن يقعد ليكم تاني.
• دي ما (صواريخ) نصاح.
• الزول دا طعون ساكت جهجهته.
• صواريخ زي دي تعمل فيه شنو؟.
• يمين السنة دي ما تفهموا شيء.
• صاروخ يمين.
• وصاروخ شمال.
• فارس دا لو جابوا ليه (سيف) بتشاهدوا (كرري) تاني.
• معركة كررى بنرجعها ليكم (كورة).
• فارس مع سيف …دي قيامة رابطة.
• يا الكاردينال الزول دا جيبوا ليه (سيف) وابعدوا منو.
• نعود للبداية.
• نحن في هذه المساحة قلنا ان الكاردينال اشتغل شغل عالي في تسجيل شيبوب في الهلال.
• دي حقيقة.
• اذ يعتبر انتقال شيبوب للهلال هو العملية الاخطر في التسجيلات الى جانب تسجيل علاء الدين يوسف في الهلال.
• الكاردينال اشتغل صاح مع (فارس).
• صلاح ادريس ما فهم أي شيء.
• صلاح ادريس قعد يفتش في تلفونات فارس.
• الكاردينال جلس مع فارس قبل فترة بعيدة، وشاف العقد واتفق معه قبل فترة.
• وصلاح ادريس ما جايب خبر.
• شغل عالي.
• والكاردينال عندما ظهر في قناة الهلال وسأله مذيع قناة الهلال وائل محمد الحسن عن فارس ، الكاردينال نكر فارس حطب.
• وقال ولا بيعرفو.
• ولا شافو.
• ولا سمع بيه.
• الكاردينال بقى خطير.
• الكاردينال بقى يعرف شغل التسجيلات.
• واضاف الكاردينال في مهاتفته لقناة الهلال وقال : (أنا لا بعرف فارس ولا نجود).
• نحن عاوزين رئيس شفت كدا.
• عارف هو بيعمل في شنو؟.
• ما عاوزين الموضوع يبقى (صور) ساكت.
• وتصريحات.
• عاوزين (تسجيلات).
• فارس ظهر في الهلال.
• فاضل (نجود).
• تصريحات الكاردينال كانت ذكية وتحركاته وحسمه لملف فارس كانت تحركات مدروسة.
• فارس واضح انه كان في غرفة تسجيلات الهلال لفترة قاربت من الشهر.
• لا حس ولا خبر.
• ولا في زول جاب سيرة.
• لا جريدة ولا مواقع تواصل اجتماعي.
• وفارس لم يشارك مع الأهلي شندي في آخر جولتين في الممتاز.
• كدا النظام.
• التسجيلات عاوزة الفهلوة دي.
• لو لم يكن فارس في غرفة الهلال لاستطاع صلاح ادريس ان يحول اتجاهه، لأن صلاح ادريس ممكن يقبل أي شيء، عدا ان ينتقل فارس للهلال.
• وصلاح ادريس (البنطون) ذاتو ممكن يقنعو ليكم.
• طبعاً صلاح ادريس في الاقناع والتسجيلات ما بتلحق.
• لكن الكاردينال المرة دي قدر عليه.
• وجود فارس في غرفة تسجيلات الهلال منذ فترة طويلة كان عمل ذكي ومدروس من الهلال.
• عمل كبير.
• مع ذلك حاول صلاح ادريس ان يفتن بين فارس وابن خالته عبداللطيف بويا عندما كتب الأرباب ان فارس سوف ينتقل للهلال وان الشخص الذي كان حلقة وصل بين اللاعب والهلال سوف يكون الضحية الاولى لانتقال فارس للهلال.
• قصد صلاح ادريس ان يقول ان بويا سوف يشطب من اجل اخلاء خانة لفارس الذي يلعب في نفس الخانة التى يلعب فيها فارس.
• الهلال لم ينتبه لهذه الفتنة لأن اللاعب كان في قبضة الهلال ومن الصعب التأثير عليه وهو في قبضة الهلال وفي غرفته ، غير ان الواقعة تلك تؤكد ان الهلال كان سيفقد فارس لو ان اللاعب لم يكن في الغرفة الزرقاء.
• النجاح في التسجيلات يحتاج لمثل هذا التخطيط – الموضوع ما قروش بس.
• التسجيلات عالم تاني تحتاج لذكاء خاص وادارة حصيفة.
• فارس سوف يمثل اضافة كبيرة للهلال، الهلال فعّل اطرافه بشكل قوي ، الطرف الشمال في الهلال سوف يصبح قوة رهيبة.
• هناك بويا ومحمود ام بدة وكابو وانضمام فارس لهم سوف يجعل المنافسة قوية في الطرف الشمال.
• فارس يمتاز على هذه العناصر لأنه يمتلك كل مواصفات لاعب الطرف الشمال.
• فارس صاحب شخصية (قيادية) داخل الملعب وخارجه، والهلال سوف يكون في حاجة لمثل هذه الشخصية وهو يمتلك عناصر شابة وصغيرة تحتاج لقائد مثل فارس.
• فارس عبدالله أيضاً يمتلك قوام رياضي يعتبر هو الأمثل من حيث القوة والحركة.
• لاعب بمواصفات خاصة قوة ومهارة وسرعة ودقة في التوصيبات.
• فارس عبدالله عنده يسارية قاتلة (اسألو منها جمال سالم) ، سوف تكون استفادة الهلال من فارس عبدالله في الضربات الثابتة كبيرة ، خاصة ان الهلال يعاني في هذا الجانب.
• الآن في الهلال لاعب متخصص في الضربات الثابتة ومتميز فيها.
• توفر لفارس عبدالله في الأهلي شندي وهو فريق كبير وحقق كأس السودان الموسم الماضي ومشارك باستمرار في الكونفدرالية خبرات لم تتوفر للاعب في سنه، وقد شارك فارس مع المنتخب الوطني وعضد من خبراته في ميادين الكورة.
• فوق ذلك فان فارس يعتبر لاعباً منضبطاً وملتزماً وهو محترف بمعني الكلمة ، له (استايله) الخاص وطريقته المميزة.
• فارس هو اللاعب الذي تمنيناه للهلال.
• وأمانينا سوف تكتمل في حضرة الهلال لو اكمل الكاردينال انتقال سيف تيري للهلال لتصبح القوة المالية الضاربة القوة الفنية الضاربة.
• افريقيا كلها سوف ترجع وتقعد تسمع للهلال.
• ح تقعد في الواطة افريقيا.
• الهلال الآن لا يحتاج غير سيف تيري عشان يكون مستقبل الهلال الهجومي لا يقاوم.
• محمد موسى وسيف تيري والشعلة وشلش وولاء الدين – مجموعة يمكن تلعب 10 سنوات للهلال.
• كملوا بسيف تيري لأن انتقال سيف تيري لنادي آخر سوف يضعف فرحة الهلالاب.
• المريخ انضرب في عمر صالون الذي اكتفى المريخاب بالفطور معاهم.
• كمان يا ناس المريخ عاوزين تسجلوا ليكم لاعب بـ (فطور).
• اللاعب فطر معاهم ومشى هلال الابيض.
• عاوزين الفرحة تكتمل وسيف يوقع للهلال.
• عشان ندور (كرري) للصباح.
• تاني ولا بنتفاهم.
• ولا بنتقابل.
• الكلام دا طبعاً من غير المحترفين.
• الكلام دا (محلي) ساكت.
• شيلوا شيلتكم.
• وشوفوا ليكم بلد من الآن.
• ما تعملوا آدم سوداكال سبب.
• ……….
• ملحوظة : فارس وسيف دي (كرري) عديل كدا.
هوامش
• كنت عاوز أكتب عن عمر صالون، لكن فرحة فارس شغلت كل المساحات.
• لكن عمر صالون دا بنرجع ليكم ليهو.
• الظاهر فطوركم يا ناس المريخ كان (مويات) ساكت.
• عشان كدا الزول دا ما اقتنع ليكم.
• عاوزين تسجلوا ليكم لاعب بـ (صورة).
• هو لاعب ام عريس؟.
• محمد حمدي طرف المصري الشمال الخطير انتقل لفريق طلائع الجيش بسبب الخدمة الوطنية.
• يعني المصري فقد أهم عناصره.
• الهلال بعد التسجيلات الأخيرة والمدرب المونديالي جاهز ان شاءالله للفوز بالكونفدرالية.
• بس عاوزين استقرار.
• وعاوزين دعم مستمر.
• الادارة بعد كدا تبعد بعيد.
• خالد النقر يتحرك بصورة جيدة في دائرة الكورة.
• خالد النقر وقاقارين حسموا مشكلة كاريكا وحلوها بصورة ممتازة.
• وننتظر ان تحل مشكلة مؤيد الصيني.
• ننتظر (سيف تيري) عشان نكتب (من الغلاف للغلاف).
• العيد عيدنا ان شاءالله.
• وابقوا على سفر.
• …………….
• عاجل : فارس وسيف ..الكاردينال جاب ليكم (معركة كرري) في الجوهرة الزرقاء.

 

 

 

حمل تطبيق كورة سودانية لتصفح أسرع وأسهل 

لزوارنا من السودان متجر موبايل1

http://www.1mobile.com/net.koorasudan.app-2451076.html

2,456حملوh التطبيق               

لزوارنا من جميع انحاء العالم من متجر قوقل

https://play.google.com/store/apps/details?id=net.koorasudan.app 

17756 حملو التطبيق

على متجر apkpure

https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app

على متجر facequizz

http://www.facequizz.com/android/apk/1995361/

على متجر mobogenie

https://www.mobogenie.com/download-net.koorasudan.app-3573651.html

على متجر apk-dl

http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9

على متجر apkname

https://apkname.com/ar/net.koorasudan.app

 

المشاركة

أكتب رد

أدخل تعليقك من فضلك!
أدخل إسمك هنا من فضلك